Rechters    8

²² Izrelieten vruigen Gideon: "Ie hebben ons verlöst oet Midjan zien macht. Wees doarom ons boas, en noa joe joen zeun, en joen zeuns zeun!" Mor Gideon zee: "Nikstervan! Ik zel joen boas nait wezen. Ik nait en mien zeun net zo min! De HEER is joen boas! ²⁴ Mor k wil joe wel wat aans vroagen: loat elk mie n ring geven oet wat ie op Midjanieten veroverd hebben." Dij Midjanieten wazzen ja noazoaten van Ismaël en haren heur riekdommen in vörm van golden sieroaden bie zok. ²⁵ "Geern! Doun wie!", zeden ze. Der wer n mantel oetvòld en elk smeet ter n ring op oet zien roofgoud. ²⁶ Golden ringen dij e van Izrelieten kreeg, wogen mit nkander wel zeuventienhonderd golden shekel. ²¹ Golden moanjes, oorringen en roodsangen klaaier van Midjans laaiders èns nait mitrekend en sieroaden dij kemélen om haals haren, ook nait. ²⁷ Van t gold luit Gideon n efod ²² moaken. Dij zette hai in Ofra hèn. Doar kwam hail Izrel t as n god vereren. Op t lest wer dat Gideon zien ondergang en dij van zien volk ook.
²⁸ Midjan kwam nait meer over neerloag hèn en mos kop boegen veur Izrel. Onder Gideon haar t laand vatteg joar vree.
²⁹ Gideon zulm, Joäs zien zeun, doar ze ook wel Jerubbaäl tegen zeden, ging weer noar hoes tou en bleef doar in Ofra wonen. ³⁰ Hai wer voader van seuventeg zeuns, want hai haar n haile bult vraauwen. ³¹ Ain van zien bievraauwen woonde in Sichem. Doar haar e ook n zeun bie. Dij nuimde hai Abimélek: "Mien voader is keunenk". ³² Gideon, Joäs zien zeun, kwam op hoge older oet tied. Hai wer begroaven in t graf van zien voader Joäs in Ofra, doar noazoaten van Abiëzer wonen.
³³ Noa Gideon zien dood begunden Izrelieten vannijs achter Baäl aan te lopen. Baäl-Berit stelden ze aan as heur god. ³⁴ De HEER, heur God, dij heur red haar van heur vijanden rondom heur tou, doar dochten ze nait meer aan. ³⁵ Net zo min wazzen ze Gideons volk dankboar veur aal t goie dat e veur Izrel doan haar.

9

© 2001 Liudgerstichten. All rights reserved.