Rechters    7

¹ Aanderdoags, smörgensvro, zette Jerubbaäl, dat is Gideon, mit zien soldoaten zien bivak op bie wèl van Charod. Midjanieten lagen wat meer in t noorden, in vlakte onder aan heuvel bie More. ² Dou zee de HEER tegen Gideon: "Der binnen te veul soldoaten bie die. Ik lever Midjanieten zo nait aan die oet. Aans zol Izrel snakken kinnen: 'Wie hebben ons zúlm redden kind!' ^{16 3} Moak doarom bekend dat elk dij benaauwd is, ¹⁷ votgoan mag en deur baargen van Gilead weerom noar hoes tou goan kin." Dou gingen twijentwinnegdoezend man weerom, dat ter bleven aachtdoezend over. Mor de HEER zee tegen Gideon: "Der is Mie nóg te veul volk! Loat heur noar t wotter tou goan, den zel Ik heur veur die schiften. Ik zel die zeggen wèl of der mit die mitgoan mouten en wèl nait." ⁵ Gideon luit t volk noar t wotter tou goan en de HEER zee tegen hom: "Aleman dij t wotter mit tong opslobbert net as n hond, dij most apaart zetten van heur dij t op knijen doun." ⁶ Drijhonderd man slobberden t wotter mit tong op; de aandern deden t op knijen. ⁷ "Mit dij drijhonderd dij t wotter mit tong opslobberd hebben", zee de HEER, "zel Ik joe bevrijden. Deur heur zel Ik joe Midjan in macht geven. Aal t aander volk mag weer noar hoes tou." ⁸ Zodounde huil Gideon allenneg drijhonderd man bie zok. Dij aander Izrelieten stuurde hai vot, weerom noar hoes tou. Mor eerst haar e heur etendrinken overnomen en heur ramshoorns. Midjanieten heur bivak lag beneden heur in vlakte.
⁹ Dij naacht zee de HEER tegen Gideon: "In t èn! Goa op heur bivak lös! Ik geef heur in dien macht. ¹⁰ Mor mogstoe der tegenaan zain aanval te woagen, goa der den eerst zulm op òf mit Pura, dien knecht. ¹¹ Den kinst heuren woar of ze t over hebben. Dat zel die moud geven om t kaamp aan te valen." Mit zien twijbaaident gingen Gideon en zien knecht Pura der op òf, tot stoefbie veurposten van vijand. ¹² Midjanieten en Amalekieten en nog aander volken oet t oosten wazzen as sprinkhoanen op vlakte deelstreken. Heur kemélen allain al wazzen nait te tellen: net zo veul as zaandkorrels bie zee.
¹³ Dou Gideon aankwam, was ter krekt ain aan t vertellen wat of e dreumd haar. "Wat k nou toch dreumd heb!", zee e. ""n Koornbrood ¹⁸ rolde as roazend tou ons kaamp in. Hai botste tegen n tìnt aan en keerde dij ondersteboven. En woeps - doar lag mie tìnt!" ¹⁴ "Dat kin aans niks mainen as t sweerd van Izreliet Gideon, Joäs zien zeun!" zee zien moat. "God het ons, mit t kaamp en aal, in zien macht geven!" ¹⁵ Dou Gideon dreum en oetleg heurd haar, boog e zok dankboar deel. Weerom in t bivak pittjede hai Izrelieten aan: "In t èn! De HEER geft t kaamp van Midjan in joen macht!" ¹⁶ Hai verdailde de drijhonderd man in drij plougen ¹⁹ en gaf elk van heur n ramshoorn en n lege wotterkroek mit n braandende fakkel der in. ¹⁷ Dou zee e: "Kiek goud noar wat ík dou! Zo gaauw as ik bie veurposten van t bivak kommen bin, mout ie net zo doun as ik!" ¹⁸ Bloazen wie, ik en mien ploug, op ramshoorn, den mout ie dat ook op joenent doun om t haile bivak tou, en roupen: 'Veur de HEER en veur Gideon!'"
¹⁹ Middel in naacht kwam Gideon mit zien honderd man bie veurposten van t kaamp aan. Vlak noa t oflözzen van wacht begunden ze op heur ramshoorn te bloazen en sluigen ze kroeken aan diggels. ²⁰ Ale drij plougen begunden op heur ramshoorn te bloazen en sluigen heur kroeken stokkend. Fakkels haren ze in linkerhaand en ramshoorns in rechter en ze raipen zo haard as ze konden: "Vaalt aan! Veur de HEER en veur Gideon!" ²¹ Elk bleef stoan doar e ston, rondom t bivak tou, en ze brochten Midjanieten in paniek, dat elkenain perbaaierde der tussenoet te naaien. En bèlken dat ze deden! ²² Intied dat dij drijhonderd Izrelieten op heur ramshoorn bloazen deden, zörgde de HEER der veur dat Midjanieten in t haile bivak mit t sweerd op nkander insluigen. Op t leste ging t leger der vandeur, kaant op van Serera, noar Bet-Hassita tou, aan kaant van revier bie Abel-Mechola, boven Tabbat.
²³ Gideon luit Izrelieten dij zok verweren konden oet Naftali, Aser en Manasse weerom roupen om achter Midjanieten aan te joagen. ²⁴ Hai stuurde ook bosschoppers noar t baarglaand van Efraïm. Dij zollen zeggen: "Goat Midjan in muit! Bezet wotterkaant van Jordoan aan Bet-Bala tou en holdt heur tegen!" Noa dij oproup bezetten manlu van Efraïm Jordoankaant aan Bet-Bala tou. ²⁵ Baaide aanvoerders van Midjanieten, Oreb en Zeëb, kregen ze te pakken. Oreb wer doodmoakt bie ròts Oreb en Zeëb bie wienpaars van Zeëb. Ze bleven Midjanieten op hakken zitten en brochten koppen van Oreb en Zeëb noar Gideon tou. Dij was ondertied Jordoan overstoken.

8

© 2001 Liudgerstichten. All rights reserved.