Rechters 20

Gibea en Benjamin straft

¹ Oet hail Izrel vandoan, van Dan tot Berséba aan tou en alderdeegs oet Gilead, kwammen Izrelieten as ain man noar t haailegdom van de HEER in Mispa om doar n volksvergoadern te holden. ² Dij vergoadern van God zien volk, vaaierhonderddoezend man staark, dij t sweerd goud hantaaiern konden, wer laaid deur aanvoerders van t volk, de veurlu van stammen van Izrel. ³ In Benjamin vernam men wel dat aander Izrelieten noar Mispa kommen wazzen. Izrelieten vruigen: "Vertel ais, hou is dat ter ainlieks heer goan bie dat schandoaleg gevaal?" ⁴ Leviet, man van vraauw dij vermoord was, begunde: "Ik was mit mien bievraauw op deurraais in Gibea in Benjamin. Doar zol k naacht overblieven. ⁵ Loat nou toch börgers van Gibea op mie ofkommen! Snaachts laipen ze op n bult bie t hoes doar of wie stoet en stee kregen haren. Mie wollen ze doodmoaken en mien bievraauw hebben ze zo aldernoarst schonnen, dat ze der in bleef. ⁶ Ik heb heur liggoam in stokken sneden en dij in ale kontrainen van Izrel rondstuurd om zain te loaten wat n grof schandoal in Izrel veurvalen was! ⁷ Izrelieten, ie binnen hier bie nkander kommen: onnaaier wat joe te doun staait!" ⁸ As ain man kwam t volk in t èn en verzekerde: "Gainain van ons weerom noar tìnt of hoes! ⁹ Zo makkelk komt Gibea der nait van òf! Wie goan lötten! ¹⁰ Dat zel oetmoaken wèl der tegen aan mouten: tien van de honderd van elke stam van Izrel, of honderd van doezend, of doezend van tiendoezend. Dij zellen veur t etendrinken zörgen veur t leger dat t volk van Gibea t schandoal betoald zetten zel, dij ze Izrel aandoan hebben!" ¹¹ Zo kwammen ale Izrelieten as ain man in actie tegen Gibea.
¹² Stammen van Izrel stuurden bodes deur hail Benjamin. Ze zollen vroagen: "Hou het ter zo'n schandoal bie joe gebeuren kind? ¹³ Lever dij minne lu oet Gibea aan ons oet. Den zel we heur dood moaken en zo ofreken mit t schandoal dat ze in Izrel begoan hebben." Mor Benjaminieten wollen nait noar oproup van heur volksgenoten lustern. ¹⁴ Oet ale steden in heur kontraain kwammen ze noar Gibea tou om t gevecht mit de aander Izrelieten aan te goan. ¹⁵ Bie t neuzen tellen bleek, dat ter tou steden van Benjamin oet zesentwinnegdoezend man over tou kommen wazzen, dij zok mit t sweerd goud redden konden. t Volk van Gibea zulm nait mitrekend. Zeuvenhonderd van heur wazzen biezunder goie kriegslu. ¹⁶ Dat wazzen zeuvenhonderd man dij links wazzen, ⁴³ altmoal slingeroars. Ze konden zo sekuur mit n stain slingern, dat t ter nooit noast ging. ¹⁷ Aander Izrelieten, dus Benjamin der nait bie, werden ook teld: vattegdoezend man dij handeg mit t sweerd wazzen, altmoal stok veur stok ervoaren kriegers.
¹⁸ Izrelieten trokken noar Betèl tou om God om road te vroagen: "Wèl van ons mout veurop in t gevecht mit Benjamin?", vruigen ze. "Judoa mout begunnen!", was de HEER zien antwoord.
¹⁹ Aanderdoagsmörgensvro sluigen Izrelieten heur kaamp op veur Gibea. ²⁰ Ze rukten oet tegen Benjaminieten en stelden zok op veur aanvaal op stad. ²¹ Dou kwammen Benjaminieten tou stad oet en sluigen dij dag twijentwinnegdoezend man van Izrel tegen de vlakte. ²² Mor Izrelieten gavven zok nait verloren. Vannijs stelden ze zok weer op zulmde stee as eerst in riegen noast nkander, op. ²³ Noa ofloop van slag wazzen ze noar Betèl tou goan en deden doar bie de HEER heur beklag, aan oavend tou. Ze vruigen de HEER: "Mout we ons bruiers, Benjaminieten, vannijs aanvalen of nait?" En de HEER zee: "Joa, aanvalen!"
²⁴ Aanderdoags gingen Izrelieten dou vannijs tou aanvaal over. ²⁵ Weer kwammen Benjaminieten tou stad oet en sluigen nog ais achttiendoezend Izrelieten dood, altmoal ervoaren kriegers. ²⁶ Dou gingen ale Izrelieten, t haile leger, noar Betèl tou. Doar, bie t haailegdom van de HEER, gingen ze op grond zitten. Ze jammerden t oet! Haile dag vastten zai tot soavends aan tou. Dou brochten ze braand- en vredeovvers veur de HEER. ²⁷ Doarnoa vruigen ze de HEER om road. Aark van t verbond mit God ston doudestieds in Betèl, mout ie waiten. ²⁸ Pinechas, Eleazars zeun en klaainzeun van Aäron, dee dainst in t haailegdom. "Mout we ons bruiers, Benjaminieten, nog ais aanvalen of mout we t overgeven?", vruigen ze. De HEER zee: "Der op lös! Mörgen speul Ik joe ze in handen!"
²⁹ Gounent van Izrelieten legden zok dou in hinderloag om Gibea tou. ³⁰ Ook op daarde dag trokken ze tegen Benjaminieten op en net as veurege keren stelden ze zok op om stad aan te valen. ³¹ Weer kwammen Benjaminieten tou stad oet. Mor nou werden ze van stad vandoan lokt. Even boeten stad, doar aine weg noar Gibea gaait en aander noar Betèl, begunden ze der op in te haauwen en te steken. Net as aander keren vuilen der doden bie Izrelieten: om en bie datteg man. ³² Benjaminieten dochten al: "Wie binnen weer boas worden! Veur daarde moal!", mor Izrelieten haren mit nkander ofproat: "Wie doun net of we aan hakken trekken en lokken heur den noar grode wegen tou." ³³ Intied dat Izrelieten zok terugtrokken en zok in riegen opstelden bie Baäl-Tamar, kwammen manlu dij zok bie Gibea in hinderloag bezied holden haren, veurndag. ³⁴ En dij op stad òf: tiendoezend van Izrels beste kriegers! Bie Baäl-Tamar ging t ter op lös, mit ale geweld! Benjaminieten haren nog nait in de goaten wat heur boven kop hong. ³⁵ Dij dag gaf de HEER overwinnen aan Izrel. Izrelieten sluigen vieventwinnegdoezend en honderd bewoapende Benjaminieten dood. ³⁶ Benjaminieten kregen in de goaten, dat ze t verloren haren. Izrelieten haren Benjaminieten ja de roemte geven omdat ze rekenden op manlu dij zok bie Gibea in hinderloag legd haren. ³⁷ Dij trokken as de weerlicht op Gibea òf, nammen stad rompslomps in en muiken ale inwoners dood. ³⁸ Mit aander Izrelieten haren ze ofproat dat ter n rooksignoal geven worden zol as t zo wied was. ³⁹ Izrelieten begunden veur Benjaminieten te wieken en Benjaminieten dij onder Izrelieten al doden begunden te moaken, zo as zegd: om en bie datteg man, dochten al dat ze slag wonnen haren, net as veurege moalen. ⁴⁰ Mor op dat ogenblik begunden in stad dikke poesten rook omhoog te kommen - t ofsproken signoal. Dou Benjaminieten achterom keken: t haile loug in vuur en vlam! ⁴¹ t Aigenste ogenblik keerden Izrelieten om. Dou begrepen Benjaminieten wat heur boven kop hong. ⁴² Ze gingen veur Izrelieten op loop, kaant van woestijn op. Mor ze konden t gevecht nait ontlopen. Izrelieten oet Gibea kwammen heur in muit en sluigen heur tegen de vlakte. ⁴³ Ze sloten Benjaminieten in en kwammen heur achternoa; zunder heur kaans te geven om ook mor eefkes oet te poesten, juigen ze heur op tot vèr oostelk van Gibea. ⁴⁴ Achttiendoezend Benjaminieten kwammen om haals, stok veur stok verege kriegers.
⁴⁵ Aandern perbaaierden te ontkommen noar woestijn, op ròts van Rimmon òf. Mor Izrelieten huilen heur in en muiken nog viefdoezend man dood, en bie Gidom nog ais twijdoezend. ⁴⁶ Aal mit aal sneuvelden der dij dag vieventwinnegdoezend bedreven Benjaminitische soldoaten, altmoal dappere kriegers, zunder oetzundern.
⁴⁷ Zeshonderd Benjaminieten mor zaggen kaans te ontkommen noar woestijn. Doar huilen ze vaaier moand in ròtsholen van Rimmon tou. ⁴⁸ Izrelieten kwammen weerom om òf te reken mit Benjaminieten dij nait aan t gevecht mitdoan haren. Ze trokken van aine stad noar aander en mensk en daaier muiken ze dood - joa aal wat ze tegen kwammen. En ale steden doar of ze west haren, stoken ze in de fik.