Rechters 2

Izrel holdt zok nait aan t verbond

⁶ Dou Jozua n ènd muik aan volksvergoadern, trokken Izrelieten der op oet noar t gebied dat heur toupaart was. Dat laand nammen ze in beslag. ⁷ t Volk bleef de Heer traauw dainen net zo laank as Jozua leefde en der noa zien dood nog oldsten wazzen, dij getuge west haren van de grode doaden, dij de HEER veur Izrel doan haar. ⁸ En Jozua, zeun van Nun, de HEER zien knecht, kwam oet tied dou e honderdtien joar was. ⁹ Hai wer begroaven in aigen grond: in Timnat-Cheres in t baarglaand van Efraïm, noordelk van baarg Gaäs.
¹⁰ Dou ook zien tiedgenoten mit heur veurolden verainegd wazzen, kwam der n aander geslacht. Dij haar gain ondervinden had mit de HEER. En mit wat Hai veur Izrel doan haar, ook nait. ¹¹ Izrelieten deden dou nait langer wat of de HEER wol: ze begunden Baäls te vereren. ¹² Ze keerden de HEER rug tou, de God van heur veurolden, dij heur oet Egypte hoald haar. Ze gingen achter aander goden heer. Goden, dij vereerd werden deur volken om heur tou. Doar gingen ze veur op knijen. En de HEER mor taargen! ¹³ De Heer luiten ze zitten en ze vereerden Baäl en Astarte. ¹⁴ Doarom wer de HEER aibelse kwoad op Izrelieten. Hai speulde heur in handen van rovers dij heur oetplunderden. Hai leverde heur oet aan vijanden in de buurt, dat ze wazzen nait langer tegen heur opwozzen. ¹⁵ Ieder bòt as ze der op lös trokken, kwam de HEER heur integen, zo as Hai woarschaauwd haar en zo as Hai der n aid op doan haar. Aaldeur weer kregen ze t swoar te verduren.
¹⁶ Den luit de HEER rechters optreden, dij heur verlösten oet handen van lu dij heur oetplunderden. ¹⁷ Mor ook noar heur rechters lusterden ze nait. Ze gavven zok òf mit aander goden en gingen doar veur op knijen. t Duurde mor even of ze dwoalden weer van t pad òf dij heur veurolden goan wazzen: dij haren wel noar de HEER zien geboden heurd. Mor zai? Nee, hur! ¹⁸ Aaldeur as de HEER n rechter optreden luit, was Hai der zulm mit bie. Hai verlöste heur oet macht van heur vijanden, zo laank as dij rechter leefde. t Begrootte de HEER ja as t volk kreunde en steunde onder t juk van lu dij heur onderdrukten en vertrapten. ¹⁹ Mor rechter was nog mor naauw oet tied, of ze deden weer wat haildaal verkeerd was. Nog meer as heur veurolden laipen ze aander goden achternoa. Dij vereerden ze en gingen der veur op knijen. En heur minne praktieken en gewoontes opgeven? Nee, hur: dat kwam nait bie heur op! ²⁰ Hoagels wer de HEER op Izrel! Hai zee: "Omdat dit volk mien verbond nait noakommen is dij Ik mit heur veurolden overainkommen was en nait lusterde noar wat of Ik zee, ²¹ doarom zel Ik van mien kaant, gain enkel volk dat bie Jozua zien dood nog over was, meer tou t laand oetjoagen." ²² -²³ Omreden de HEER Izrelieten oetperbaaiern wol, haar Hai dij volken mit vree loaten en ze nait doalek votjagd. Hai haar ze ook nait aan Jozua oetleverd omdat Hai zain wol: holden ze zok nou, net as heur veurolden, aan t pad dat Ik heur wezen heb, of nait?

3

¹ -² Om Izrelieten dij nog nait bekend wazzen mit vechten tegen Kananieten, te leren hou of ter ainlieks in oorlog heer gaait, - dus allenneg om t nije geslacht dat oorlog nait mitmoakt haar dat besef bie te brengen -, haar de HEER dizze volken in t laand blieven loaten: ³ de vief keunenks van Filistijnen, ³ ale Kananieten, de Sidoniërs, de Chiwwieten in t baarglaand van Libanon, van Baäl-Hermon òf, aan weg noar Hamat tou. ⁴ Dij volken wazzen overbleven om Izrel op proef te stellen. Zo zol dudelk worden of zai noar geboden heuren zollen dij Hai heur veurolden deur Mozes oplegd haar. ⁵ Mor dou Izrelieten ainmoal middenmaank t volk van Kanan woonden, dat wazzen de Hethieten, Amorieten, Perizzieten, Chiwwieten en Jebuzieten mout ie waiten, ⁶ nammen ze heur dochters as vraauw en gavven heur aigen wichter aan heur zeuns en vereerden heur goden.