Rechters 17

Danieten en t godenbeeld van Micha

¹ Der was ais n man oet t baarglaand van Efraïm. Hai haitte Micha. ² Dij zee tegen zien moeke: "Is ter lest gain elfhonderd shekel zulver van moeke stolen? Moeke het dou n fluik oetsproken. k Heb t zulm heurd. Nou, dat geld heb ik. Joa, ik heb t stolen!" "Mag de HEER die zien zegen geven, mien jong", was moekes beschaaid. ³⁷ ³ Hai gaf heur dij elfhonderd shekel weerom.
"Ik wijd t zulver veur de HEER! Ik dou t om die", zee moeke. "k Zel der n beeld mit overtrekken loaten. ³⁸ Dè, hier hest t geld weer!" ⁴ Mor hai dee t weer aan zien moeke. Zai brochde dou twijhonderd shekel noar goldsmid. Man zol der n holten beeld mit besloagen. t Beeld kwam bie Micha in hoes te stoan. ⁵ Micha haar bie hom in hoes n haailegdom inrichten loaten, mout ie waiten. Hai haar n priesterklaid en godenbeeldjes moaken loaten. Ain van zien zeuns haar e as priester aansteld. ⁶ Doudestieds was ter gain keunenk in Izrel. Elkenain kon zien aigen gang mor goan..
⁷ Nou wol t gevaal dat ter in Betlehem, in kontrainen van stam Judoa, n jongkerel touhuil. t Was n Leviet en hai woonde doar as boetenlander. ⁸ Op n dag trok e oet Betlehem vandoan om n aander onderkommen te zuiken. Op zien raais kwam e deur t baarglaand van Efraïm, bie Micha zien hoes te lande. ⁹ "Woar kom ie heer?", vruig Micha. "Ik bin n Leviet", zee man. "Ik kom oet Betlehem in Judoa en nou zuik ik woaraargens aans n onderkommen." ¹⁰ "Magst wel bie mie kommen te wonen", zee Micha. "Den kinst mooi mien roadsman en priester wezen. k Geef die tien shekel zulver sjoars, mit kost en klaaier." Leviet mos der even over noadenken. ¹¹ Dou rezelvaaierde hai bie Micha te blieven. Micha beschaauwde hom of was t n aigen zeun. ¹² Hai stèlde hom as priester aan. Zo kwam Leviet bie Micha in hoes te lande. ¹³ Micha dochde bie zokzulm: "De HEER het t goud mit mie veur, doar kin k verzekerd van wezen. k Heb ja n Leviet as priester in dainst."

18

¹ Doudestieds was ter gain keunenk in Izrel. Stam van Dan was nog aaldeur aan zöcht noar n aigen gerechteghaid doar ze wonen konden. t Was ainegste stam aan wèl nog gain aigen grond touvalen was. ² Doarom haren ze vief van heur kregelste kerels oet Sora en Estaöl doar of ze dou wazzen, der op oetstuurd mit odders t laand te beloeren en deurhèn te onderzuiken. Onderwegens kwammen ze deur t baarglaand van Efraïm, en bleven ze naacht over bie Micha thoes. ³ Doar trok menaaier hou of Leviet pruit, heur aandacht. Ze gingen op hom òf en vruigen hom: "Hou bin ie hierzo te lande kommen? Wèl het joe hierhèn hoald en wat doun ie hier ainlieks?" ⁴ Hai vertelde wat Micha altmoal veur hom doan haar. "Dij het mie inhuurd", zee e, "en nou bin k zien priester." ⁵ "Wil ie den God veur ons roadplegen?", vruigen manlu hom, "en Hom vroagen of t mit ons raais goud oflopen zel?" ⁶ "Goat mor rusteg wieder!", zee priester. "De HEER staait ter achter!" ⁷ De vief manlu trokken wieder en kwammen bie Laïs. Ze zaggen dat t volk dat doar woonde kaalm en rusteg leefde, net as Sidoniërs. Gainain legde heur wat in weeg en ze haren van gainent last. Mor t was ook zo, dat ze gain verslag mit n aander haren: Sidon was wied vot.
⁸ Dou verkenners bie aigen volk in Sora en Estaöl weerom kwammen, vruigen dij: "En ...?" ⁹ "Der votdoalek op òf!", zeden ze. "t Laand dat we zain hebben is net knipt veur ons. Woarom den nog langer in t gat hangen? Nait drutjen, der op òf! Loat we t in bezit nemen! ¹⁰ Ie zellen zain dat mensken dij der wonen, naargens op verdocht binnen. t Kin nait aans of God zel ons aal dat laand, doar we ale roemte hebben en doar nou ook haildaal naargens verlet om is, grif in handen geven."
¹¹ Dou trokken Danieten bie Sora en Estaöl vandoan - zeshonderd bewoapende kerels. ¹² Onderwegens sluigen ze heur kaamp op bie Kirjat-Jearim in Judoa. Doarom hait dij ploats nog aaltied Machane-Dan, "Legerkaamp van Dan". t Ligt even bewesten Kirjat-Jearim. ¹³ Doarvandoan trokken ze wieder deur t baarglaand van Efraïm en kwammen zo bie t hoes van Micha. ¹⁴ De vief dij der op oetgoan wazzen om Laïs te verkennen, zeden dou tegen heur kammeroaden: "Wait ie wel, dat in ain van dij hoezen hier, godenbeeldjes te vinden binnen en n priesterklaid? Der is ook n beeld bie, haildaal mit zulver besloagen. Nou, den wait ie wel wat joe te doun staait!" ¹⁵ Ze sluigen òf, t pad op noar Micha zien hoes doar dij jonge Leviet woonde, en vruigen hou of t mit hom ging. ¹⁶ Intied dat dij zeshonderd bewoapende Danieten bie tougangspoort stoan gingen, ¹⁷ laipen de vief verkenners deur. Ze gingen in hoes en nammen t priesterklaid en godenbeeldjes mit. t Beeld dat mit zulver besloagen was, ook. Priester ston intied mit dij zeshonderd bewoapende manlu bie tougangspoort. ¹⁸ Dou dij vief manlu in Micha zien hoes kommen wazzen en t beeld mit zulverbeslag, t priesterklaid en godenbeeldjes pakt haren, raip priester: "Hé! Wat mout dat doar!" ¹⁹ "Stil!", zeden ze. "Mond dicht! Kom mit ons mit en wor ons roadsman en priester. Ie kinnen toch beter priester wezen veur n haile stam Izrelieten as veur ain enkelde hoesholden! Of nait den?" ²⁰ Dat leek priester lang nait maal tou. Hai pakte zulm t priesterklaid, godenbeeldjes en t mit zulver besloagen beeld en sloot zok bie heur aan. ²¹ Danieten trokken wieder. Vraauwlu, kinder en oljes luiten ze veuraan lopen, mit t vij en wat ze aans nog haren. ²² Ze wazzen al n goud èndje op glee, of doar kwammen Micha zien knechten aanbroezen. Dij wazzen gaauw bie nkander roupen en zatten heur vlak op hakken. ²³ Ze begunden tegen heur te bandiezen en te doun! Danieten draaiden zok om en zeden tegen Micha: "Wat is ter? Woarom heb ie aal dij mensken op n bainen brocht?" ²⁴ "Ie hebben goden stolen, dij ik moaken loaten heb!", zee Micha. "En mien priester heb ie ook mitnomen! k Bin haildaal blut! En den vroag ie alderdeegs: wat is ter?" ²⁵ Mor Danieten zeden: "Gain woord meer! Aans zol we der van grammieterghaid wel ais op lössloagen kinnen. Den is t doan mit joe en mit joen haile volk!" ²⁶ Dou gingen Danieten weer wieder. Micha zag wel, dat hai toch niks tegen heur begunnen kon en trok weer op hoes aan.
²⁷ Zo kwammen Danieten mit beelden dij Micha moaken loaten haar en mit priester dij e had haar, bie Laïs aan. Ze deden n overvaal op lu dij der woonden en dij n rusteg en onbezörgd levent laaidden en naargens op verdocht wazzen. Ze brochten heur altmoal om haals en stad stoken ze in braand. ²⁸ Gainent was ter dij lu van Laïs helpen kwam. Sidon lag ja wied vot en ze haren mit gain mensk verslag. Stad lag in t daal noar Bet-Rechob. Danieten baauwden stad weer op en gingen der zulm wonen. ²⁹ Ze nuimden stad Dan, noar heur stamvoader, ain van Izrels zeuns. Mor doarveur haitte stad Laïs.
³⁰ t Zulvern godenbeeld kreeg der n stee en Jonatan, zeun van Gersom en klaainzeun van Mozes ³⁹ wer heur priester. Noa hom bleven zien noazoaten bie Danieten t affeer van priester holden, net zo laank tot t volk wegvoerd wer. ³¹ Zo laank as t haailegdom in Silo beston, zo laank bleef t godenbeeld dat Micha moaken loaten haar, bie Danieten.