2 Zo as n hinde longert
noar wotterbeken,
zo longert mien ziel
noar joe, o God.
3 Mien ziel smacht noar God,
noar God dij leeft,
wanneer mag ik kommen
om Gods aangezicht te zain?
4 Ik mout troanen slikken
dag en naacht,
omdat ze haile dag tegen mie zeggen:
"Woar is dij God van die?"
5 Ik denk aan
doar t gemoud mie vol van is,
dat ik mit aal t volk optrok,
noar t hoes van God tou -
jubelnd en zingend,
in optocht mit feestgangers.
6 Woarom zo oetstuur, mien ziel,
woarom zo onrusteg?
Wacht op God,
want vannijs zel ik hom priezen,
mien Verlözzer en mien God.
7 O, mien God, mien ziel is oetstuur,
doarom mout ik aan joe denken,
hier in t laand van Jordaan en Hermonbaargen,
op baarg Misar.
8 Wottervloud ropt wottervloud op
bie t broezen van joen wotterstromen,
aal joen brekers en golven
sloagen over mie hèn. 9 Bie dag let de HEER zien traauwe laifde blieken,
en bie naacht leeft zien laid in mie,
n gebed aan God dij over mien leven gaait.
10 Ik zeg tegen God, mien rots:
"Woarom vergeet ie mie,
woarom loop ik in raauw,
onderdrokt deur vijand?"
11 t Gaait mie deur ales hèn
dat vijanden mie naren
en haile dag tegen mie zeggen:
"Woar is dij God van die?"
12 Woarom zo oetstuur, mien ziel,
woarom zo onrusteg?
Wacht op God,
want vannijs zel ik hom priezen,
mien Verlözzer en mien God.
43
Dou mie recht, o God,
kom veur mie op
tegen t volk dat ontraauw is,
red mie van lu vol list en leugen.
2 Ie binnen ja de God dij mien touvlocht is,
woarom versteut ie mie,
woarom loop ik in raauw,
onderdrokt deur vijand?
3 Geef toch joen licht en joen woarhaid,
dat dij mie laaiden,
mie brengen noar joen haailege baarg,
noar joen woonstee.
4 Den kom ik bie t altoar van God,
bie God, dij moakt dat ik blied bin en jubel.
Ik pries joe op citer,
o God, mien God.
5 Woarom zo oetstuur, mien ziel,
woarom zo onrusteg?
Wacht op God,
want vannijs zel ik hom priezen,
mien Verlözzer en mien God.
44
Veur meziekmeester. Van Korachieten, n kunsteg laid
2 God, mit aigen oren heb wie t heurd,
ons veurzoaten hebben ons t verteld:
t waark dat ie verzet hebben in heur doagen,
in doagen van aleer.
3 Ie hebben deur joen macht aander volken verdreven en heur der wonen loaten,
dij volken heb ie kwoad aandoan en heur heb ie doar hènstuurd. 4 Zai hebben zok t laand nait mit sweerd touaigend,
mit heur kracht konden zai t nait redden,
mor aal mit joen rechterhaand en deur joen macht,
hulpveerdeghaid stroalde van joe òf - ie wazzen heur goud gezind. 5 Ie binnen mien keunenk, o God,
geef opdracht dat Jakob hulpen wordt.
6 Mit joe krieg wie ons vijanden der onder,
oet joen noam vertrappen wie ons tegenstanders. 7 Want op mien boog vertraauw ik nait
en mien sweerd zel mie nait redden,
8 ie hebben ons red van ons vijanden
en dij ons hoaten muik ie te schaande. 9 Wie binnen groots op God hail dag deur,
joen noam, dij priezen wie aaid en aaltied.
10 Mor nou heb ie ons verstöt en te schaande moakt,
ie trekken nait op mit ons legers, 11 ie luiten ons vluchten veur ons vijanden,
dij ons hoaten, hebben ons plunderd.
12 Ie doun ons vot as slachtschoapen,
maank volken heb ie ons oetstreud, 13 ie hebben joen volk veur niks votdoan
en der niks aan verdaind.
14 Ie hebben ons te schaande moakt bie ons noabers,
dij om ons tou wonen, belastern en bespotten ons, 15 ie hebben ons tou n gezegde moakt onder volken,
aander lu schudkoppen om ons.
16 Haile dag staait mien schaande mie veur ogen,
men kin mie t van t gezicht òf lezen, 17 omdat ik heur hou gemain ik bespot en belasterd wor,
mien vijanden zai, en lu dij zok op mie vreken willen.
18 Dit is ons aalmoal overkommen, mor wie binnen joe nait vergeten,
wie binnen nait vaals omgoan mit joen verbond, 19 ons haart wol nait van joe wieken,
ons voutstappen gingen nait van t pad òf. 20 Toch heb ie ons broken op n stee doar jakhaalzen touholden,
heb ie ons bedekt mit daibe duusternis.
21 As wie noam van ons God vergeten haren
en wie haren ons handen oetstoken noar n vremde god, 22 zol God doar den nait achter kommen wezen?
Gehaaimen van t haart ken hai ja. 23 Joa, om joe worden wie haile dag deur doodmoakt,
wie gelden as slachtschoapen.
24 Wor wakker, woarom sloap ie, Heer?
Wor toch wakker! Versteut ons nait veur aiweg en aaltied. 25 Woarom loat ie joen gezicht nait zain,
vergeet ie ons ellèn en verdrokken?
26 Want wie vervalen tou stof,
ons liggoam bakt aan grond. 27 Stoa op om ons te helpen,
verlös ons om joen traauwe laifde.
45
Veur meziekmeester. Op wies van: De lelies. Van Korachieten, n kunsteg laid. n Laifdeslaid.
2 Mien haart lopt over van bliede woorden,
mien gedicht dat droag ik veur aan keunenk,
mien tong is grivvel van n veerdeg schriever.
3 Ie binnen mooiste van aal menskenkinder,
van joen lippen kommen vrundelke woorden,
doarom het God joe zegend veur aaltied.
4 Hang t sweerd in gorre aan heup, mien held,
taiken van joen majesteit en glorie. 5 Dat is joen glorie! Wees staark, rie oet
veur zoak van woarhaid, zaachtmoudeghaid en gerechteghaid.
Joen rechterhaand mag van geduchte doaden waiten. 6 Joen pielen binnen schaarpt,
zai trevven t haart van keunenk zien vijanden.
Volken valen veur joe deel.
7 Joen troon is van God, veur aiweg en aaltied,
joen keunenklieke scepter is scepter van recht, 8 gerechteghaid heb ie laif en onrecht hoat ie.
Doarom het God, joen God, joe zaalfd
mit eulie van bliedschop, as ainegste van joen pazzipanten.
9 Joen klaaier roeken haildaal noar mirre, aloë en kenail,
oet pelaaizen van ivoor moakt snoarenspul joe blied, 10 keunenksdochters droagen joen jewailen,
keunegin staait aan joen rechterhaand in gold van Ofir.
11 Heur, o dochter, zai dat aan, heur noar mie,
vergeet joen volk en joen voader zien hoes. 12 Zol keunenk joen schoonhaid begeren,
hai is ja joen heer, boeg joe den veur hom deel. 13 Dochter van Tyrus, mit n geschenk
binnen rieksten van t volk oet op joen gunst.
14 Ain pracht en proal is keunenksdochter doar,
heur klaid is opbeduurd mit gold. 15 In kleurege klaaier wordt ze bie keunenk brocht,
jonge wichter in heur gevolg,
heur vrundinnen worden bie joe brocht. 16 Zai worden brocht mit bliedschop en gezang
in t pelaais van keunenk.
17 In stee van joen veurvoaders zellen joen zeuns doar stoan,
ie zellen vorsten van heur moaken over t haile laand. 18 Joen noam wil ik bezingen van geslacht op geslacht,
doarom zellen volken joe priezen veur aiweg en aaid.
46
Veur meziekmeester. Van Korachieten. Op wies van: De wichter. n Laid.
2 God is ons touvlocht en ons börg,
ain doar men aaltied van op aan kin. 3 Doarom bin wie nait baang of wankelt wereld ook,
of störten baargen daip in zee. 4 Loat t wotter mor broezen en schoemkoppen,
loat baargen mor schudden bie springtij. sela
5 n Revier, wiedvertakt, brengt bliedschop in stad van God,
haailegste woonstee van Alderhoogste. 6 God holdt doar tou, wankeln dut zai nait,
want God helpt heur
as dag begunt te doagen. 7 Volken goan tekeer, keunenkrieken wankeln,
zien dunderstem weerklinkt, wereld huvert.
8 De HEER van hemelse machten is mit ons,
God van Jakob is ons börg. sela
9 Kom en zai doaden van de HEER,
t is aldernoarst wat hai in wereld dut, 10 wereldwied let hai oorlogen wieken,
bogen brekt hai stokkend, speren verbriezelt hai,
striedwoagens verteert hai deur vuur. 11 "Hol op en wait dat ik God bin,
verheven boven volken, verheven boven eerde."
12 De HEER van hemelse machten is mit ons,
God van Jakob is ons börg. sela
47
Veur meziekmeester. Van Korachieten, n psaalm.
2 Klap in handen, volken,
jubel veur God mit t hoogste laid, 3 want geducht is de HEER, de Alderhoogste,
machtege keunenk van haile eerde.
4 Volken jagt hai veur ons oet,
noatsies legt hai aan ons vouten. 5 Hai kust t aarfdail veur ons oet,
doar Jakob, dij hai geern lieden mag, slim grootsk op is. sela
6 Onder joechaaien is God opstegen,
de HEER steeg op bie t geluud van bezunen. 7 Zing veur God mit meziek, zing veur hom,
zing mit meziek veur ons keunenk, zing veur hom. 8 God is ja keunenk van haile eerde,
zing n kunsteg laid. 9 God is keunenk over volken,
God zit op zien haailege troon. 10 Vernoamsten van volken hebben zok aansloten
bie t volk van God van Abraham:
want schilden van eerde binnen van God.
Hai is hoog verheven.
48
n Laid, n psaalm van Korachieten.
2 De HEER is groot, ale lof komt hom tou.
In stad van ons God, zien haailege baarg, 3 baarg Sion, - dij ligt op t noorden -
mit zien prachtege top moakt hai haile wereld blied,
stad van grode keunenk - 4 in heur verstaarkte toorns wait men:
God is ons börg.
5 Heur ais aan, keunenks hebben zok verzoameld,
zai trokken mit mekoar verbie. 6 Zai zagen t en wazzen stomverboasd,
zai werden kèl en muiken dat ze votkwammen.
7 Zai trilden der over,
haren krampen as n vraauw in de kroam, 8 zo as oostewind in stokken slagt
schepen van Tarsis.
9 Zo as wie t heurd hebben,
heb wie t zain in stad van de HEER van legermachten,
in stad van God:
God het heur grondvest, tot in aiweghaid. sela
10 Wie gedenken joen gunst, o God,
midden in joen tempel. 11 Zo as joen noam is, o God, zo is joen foam
tot aan oetènnen van eerde,
joen rechterhaand is vol rechtveerdeghaid. 12 Baarg Sion is blied,
dochters van Sion joechaaien
om joen rechtveerdege oordailen.
13 Goa hèn, trek om Sion tou,
tel zien toorns. 14 Bekiek heur schaanzen,
bewonder heur pelaaizen
om te vertellen aan t volgende geslacht: 15 "Joa, dit is God,
ons God veur aiweg en aaltied,
veur aiweg zel hai ons laaiden."
49
Veur meziekmeester. Van Korachieten, n psaalm.
2 Heur tou, ale volken,
zet oren open, wereldbewoners, 3 mensken, kinder van Adam,
riek en aarm, mitnkander.
4 Mien mond sprekt woorden vol wieshaid,
mien haart wait van onderschaaid, 5 mien oren stoan open veur n spreuk,
bie liermeziek lös ik mien roadsel op.
6 Woarom baang in minne tieden,
as t kwoad van vijand mie benaauwt, 7 dij vertraauwen op heur kracht
en snaren van heur geld en goud?
8 Is gain mensk dij n aander vrijkopen kin,
t lösgeld aan God is nait te betoalen. 9 t Lösgeld veur t levent is te duur,
in aiweghaid nait op te brengen. 10 t Bestaait nait dat ain mor aalaan deur leeft
en gain graf veur ogen krigt.
11 Dit is t wat men zugt: wieze mensken staarven,
domme en dwoaze mensken kommen ook oet tied
en loaten heur geld en goud aan aandern noa. 12 Heur graf is veur aaid heur hoes,
heur woonstee van older op older,
al was t laand ook noar heur vernuimd. 13 n Mensk kin in zien pracht
nait overnachten,
hai is geliek aan daaiern dij doodgoan.
14 Zo gaait t mit lu dij op zokzulm vertraauwen,
zo is t èn van lu dij zokzulm geern heuren: sela 15 as schoapen goan ze omdeel in t dodenriek,
dood waaidt heur as hedder,
ze goan liekoet noar t graf en vergoan,
t dodenriek wordt heur woonstee. 16 Mor God zel mie vrijkopen oet macht
van t dodenriek as hai mie mitnemt. sela
17 Wees mor nait baang as ain riek wordt,
as zien hoes aalaan mooier wordt. 18 Want bie zien staarven kin hai niks mitnemen,
zien riekdom gaait hom nait achternoa.
19 Al is hai loos op t gelok in zien levent,
- wèl snaart nait van joe as joe t goud gaait? - 20 hai komt toch bie zien veurgeslacht te laande,
bie heur dij nooit gain licht weer zain. 21 n Mensk van aanzain, dij gain inzicht het,
hai is geliek aan daaiern, dij doodgoan.
50
Psaalm van Asaf.
God boven ale goden, de HEER,
dij sprekt en ropt eerde op,
van woar zun opkomt tot woar zai ondergaait. 2 Tou Sion oet, stad van volmoakte schoonhaid,
verschient God in aal zien glorie. 3 Ons God, dij komt, hai holdt zok nait doof,
verterend vuur gaait veur hom oet,
rondom hom störmt t van ale kanten.
4 Hai ropt hemel en eerde op
veur t oordail over zien volk. 5 "Breng dijent bie mie, dij mie traauw binnen,
dij n ovver brengen vanwegens mien verbond." 6 Dou verkundegden hemels God zien rechtveerdeghaid,
God is ja rechter. sela
7 Heur, mien volk, want ik heb t woord,
Israël, tegen die wil ik getugen:
God, dien God, bin ik!
8 t Is nait om dien slachtovvers dat ik die terechtwies,
dien slachtovvers zai ik ja hailtied. 9 Mor om dien bol heb ik gain verlet,
en ook nait om rammen oet dien schoaphokken.
10 Ale wilde daaiern in t bos binnen ja mienent,
ale daaiern in doezenden baargen, 11 ik ken ale vogels in baargen,
aal wat touholdt in t open veld is van mie.
12 As k honger haar, zol ik t ja nait zeggen,
want wereld, en aal wat der touholdt, is mienent. 13 Ducht die dat ik vlaais van bollen eten zol,
of bloud van schoaprammen drinken?
14 Betuug dien daank aan God
en moak mit Alderhoogste liek wastoe hom beloofd hest. 15 Dou n beroup op mie as dien nood hoog is,
ik zel die redden en doe zelst mie eren.
16 Mor dij kwoad dut, doar zegt God tegen:
"Wat het t veur zin dastoe mien geboden opzegst
en opsnidst van mien verbond,
17 astoe der toch n bloudhekel aan hest as ik die terechtwies
en bie die deelglieden letst wat ik die zeg!" 18 Astoe n daif zugst, den wordst doar goie moatjes mit,
t is die mooi tou om mit echtbrekers te verkeren.
19 Dien mond gefst vrije loop in t kwoad,
dien tong sprekt aans nait as bedrog. 20 Doe getuugst tegen dien aigen bruier,
bekladst zeun van dien moeke.
21 Zo hestoe doan en ik heb mie stilholden,
doe denkst dat ik net zo ain bin as doe.
Ik zel die terechtwiezen, die t onder ogen brengen. 22 Begriep dit toch, aal dijent dij God vergeten,
aans zel ik joe verscheuren en der zel gain redder wezen:
23 wèl mie daank brengt, dij eert mie echt en moakt n weg vrij,
ik zel hom haail van God zain loaten.
51
Veur meziekmeester. n Psaalm van David 2 dou profeet Natan bie hom west haar, noadat hai bie Batseba sloapen haar.
3 God, wees mie genoadeg in joen traauw,
wisk mien zunden oet in joen grode barmhaarteghaid, 4 wask mie haildaal schoon van mien mizze doad,
zuver mie van mien zunde.
5 Ik wait wat ik verkeerd doan heb,
mien zunde staait mie aingoal veur ogen, 6 tegen joe, tegen joe allain heb ik zundegd,
ik heb doan wat min is in joen ogen.
Joa, joen oetsproak is rechtveerdeg,
joen oordail is zuver. 7 Zekerwoar, in zunde bin ik geboren,
ik was al schuldeg dou moeke mie druig, 8 mor ie willen geern dat ik ain en aal woarhaid bin,
wieshaid loat ie mie dailachteg worden.
9 Neem mit majoraan mien zunde weg, den wor ik zuver,
wask mie dat ik witter wor as snij. 10 Loat mie vreugde en bliedschop heuren:
loat mien bonken, dij ie broken hebben, weer jubeln. 11 Sloet joen ogen veur mien zunden,
wisk aal mien mizze doaden oet.
12 Schep mie, o God, n zuver haart,
moak mien gaist vannijs standvasteg, 13 joag mie nait vot van veur joen ogen,
neem joen haailege gaist nait van mie òf. 14 Geef mie bliedschop over joen hulp weerom,
steun mie deur mien gaist gewilleg te moaken.
15 Den zel ik obsternoaten joen wegen wiezen
en kommen zundoars bie joe weerom. 16 Verlös mie van mien bloudschuld,
o God, dij mie bevrijdt,
en ik zel zingen van joen gerechteghaid. 17 HEER, open mien mond,
den komt joen lof over mien lippen.
18 Van slachtovvers heb ie gain wil,
zol ik brandovvers brengen, den heb ie doar gain nocht aan. 19 t Ovver veur God is n gaist dij broken is;
n haart, broken en verbriezeld,
dij veracht ie nait, God.
20 Wees goud veur Sion noar joe t goud tou liekt,
baauw muren veur Jeruzalem! 21 Den zellen slachtovvers joe aanstoan,
brandovvers haildaal verbraand,
den legt men jonge bollen op joen altoar as brandovver.
52
Veur meziekmeester. n Kunsteg laid van David, 2 dou Edomiet Doëg bie Saul kommen was en hom verteld haar: "David is bie Achimelech in hoes!"
3 Woarom bistoe groots op dien gemaineghaid, doe held,
en moakst God min, de haile dag? 4 Doe beroamst verdaarf,
dien tong is as n slepen mès, bedraiger dast bist!
5 Doe hest meer op mit t kwoaie as mit t goie,
meer mit leugen as mit woarhaid. sela 6 Holdst van woorden dij verbiestern,
van n tong dij bedrogt.
7 God zel die vergraimen veur aaltied,
hai zel die deelhaauwen, wegscheuren oet dien tènt,
die mit worrel en tak oetreuden oet t laand van dij leven. sela
8 Rechtveerdegen zellen t zain en der kèl van worden,
zai zellen hom oetlagen: 9 "Kiek mor, dij staarke kerel, hai zugt God nait as zien touvlocht,
mor vertraauwt op zien grode riekdom,
wat zien touvlocht was, wordt zien verdaarf."
10 Mor ik bin as n oliefboom, vol in t blad,
in tempel van God,
ik vertraauw op Gods laifde
veur aiweg en aaltied.
11 Ik zel joe aiweg priezen om joen waarken,
ik zel wachten op joen noam, want dij is goud,
veur ogen van dij joe traauw binnen.
53
Veur meziekmeester. Op Machalat. n Kunsteg laid van David.
2 Dwoazen denken bie zokzulm: God bestaait nait!
Heur doun en loaten is min, en zai doun ofgriezelk onrecht,
der is gainain dij goud dut. 3 God kikt tou hemel oet op mensken deel,
om te zain of der ain bie zien goie verstand is,
ain dij God zöcht.
4 Ain bie aander is ofvaleg, verdurven binnen ze aalmoal,
der is gainain dij goud dut, nog nait ain. 5 Hebben ze der den gain wait van, dij minhoeden,
dij mien volk verslinden of t brood is?
God dij roupen zai nait aan. 6 Joa, griezel lopt heur over de graauwel
en der was niks om benaauwd te wezen!
Want God verstreut bonken van joen beloagers,
moak ie heur mor beschoamd, want God wil niks meer mit heur van doun hebben.
7 Och, kwam der toch mor hulp veur Israël oet Sion!
As God in t lot van zien volk n keer brengt,
zel Jakob joechaaien, zel Israël blied wezen.
54
Veur meziekmeester. Kin zongen worden mit meziek derbie. n Kunsteg laid van David, 2 dou inwoners van Zif aan Saul zegd haren: "Wait ie nait dat David bie ons beziedzit?"
3 O God, red mie deur joen noam,
dou mie recht deur joen kracht. 4 O God, luster noar mien gebed,
heur wat mien mond zegt.
5 Vremd volk komt tegen mie in t èn,
zai stoan mie mit geweld noar t levent,
zai holden God nait veur ogen. sela
6 Mor God is mien helper,
de Heer is t dij mien levent dragt. 7 Loat t kwoad noar mien vijanden weeromgoan,
vergraim heur in joen traauw.
8 Ik zel joe van haarten slachtovvers brengen,
ik zel joen noam priezen, HEER, want dij is goud: 9 want oet ale nood het hai mie red,
ik kin deelkieken op mien vijanden.
55
Veur meziekmeester. Mit snoarenspul. n Kunsteg laid van David.
2 Verheur, o God, mien beden,
kroep veur mien smeken nait bezied, 3 heur goud noar mie en geef mie antwoord.
Kloagend loop ik om en om en wait mie gain road
4 mit gebèlk van vijand
en tekeergoan van goddeloze,
want zai störten onhaail over mie,
bestoken mie mit heur gram.
5 Mien haart verkrimpt mie in t lief,
doodsangsten stoa ik oet, 6 schrik en aalteroatsie overvalen mie,
griezel lopt mie over graauwel.
7 Ik docht: Haar ik mor vleugels as n doef,
den vloog ik vot en zöchte n stee doar ik wonen kon, 8 joa, vluchten zol ik, hail wied vot,
k zol overnachten in woestijn, sela 9 geswind n schoelstee zuiken
as aine bui de aander jagt. 10 Moak heur in toeze, spliet heur toal,
want in stad komt roezie en geweld in t zicht, 11 doags en bie nachten dut men de ronde over muren,
doar binnen is onhaail en ellèn, 12 t is doar aal verdaarf: onderdrokken en bedrog,
dij hebben vaaste vout op t maartplaain.
13 t Is ja gain vijand dij mie taargt, doar zol ik nog wel over kinnen,
en nait ain dij mie hoat oet grootseghaid,
dij zol ik wel ontlopen. 14 Mor doe, doe dochst en deest as ik,
mien grode vrund, doar ik op baauwen kon! 15 Mien beste vrund: mit ons baaident
was wie in t gedrang in t hoes van God.
16 Dat dood heur overlopen mag
en zai bie t levent in dodenriek deelzakken,
t kwoad hoest ja bie heur,
deur ales hèn.
17 Wat mie aangaait: ik roup God aan,
en de HEER zel mie redden. 18 Soavends en smörgens en smirregs
stìn ik en kloag ik
en hai heurt mie.
19 Hai verlöst mie in vree
van dij tegen mie strieden,
mit aal houveul ze tegen mie binnen. 20 God heurt en vernedert heur.
- Hai troont van oldsheer - sela
van opholden willen ze ja nait waiten,
ze hebben veur hom gain ontzag.
21 Men rekent òf mit dij heur traauw wazzen,
en brekt t verbond. 22 Zien proat is smuier as botter,
mor stried is in zien haart,
zien woorden binnen zuiter as hunneg,
mor t binnen blaanke sweerden.
23 Gooi joen last op de HEER,
hai zel veur joe zörgen,
hai zel nooit touloaten
dat rechtveerdege oetglidt.
24 Mor ie, o God, zellen heur
in grafkoel zakken loaten.
Dij kerels van bloud en bedrog
zellen nog nait op t haalfschaid van heur doagen kommen,
mor ik, ik vertraauw op joe.
56
Veur meziekmeester. Op wies van: Stille doef van vèrren. Van David, n stil gebed, dou Filistijnen in Gat hom grepen haren. 2 Wees mie genoadeg, o God, want mensken loeren op mie,
haile dag brengen strieders mie in t naauw. 3 Mien vijanden loeren haile dag,
verschaaident strieden tegen mie, tröts as ze binnen.
4 Op dag dat ik baang bin, vertraauw ik op joe. 5 Op God, - zien woord pries ik -
op God vertraauw ik, ik bin nait baang,
wat zol n mensk mie aandoun?
6 Haile dag bruken ze woorden dij zeer doun
en bedenken ze kwoad tegen mie. 7 Ze valen aan, ze loeren,
ze goan mien gangen noa,
ze loeren op mien levent. 8 Ze zellen heur straf toch nait ontlopen?
Teun joen vergrèldhaid, God, en sloag heur deel.
9 Mien omswaarven heb ie optaikend,
gait mien troanen in joen wotterzak.
Staait ales nait op joen boukrol? 10 Op dag dat ik roup, zellen mien vijanden wieken,
want dit wait ik: God is bie mie.
11 Op God, - zien woord pries ik -
op de HEER, - zien woord pries ik - 12 op God vertraauw ik, ik bin nait baang,
wat zol n mensk mie aandoun?
13 Aan joe, o God, heb ik beloftes doan,
mit daankovvers zel ik joe betoalen, 14 ie hebben mien levent red van dood,
mien vouten woard veur stroekeln,
zodat ik veur joen ogen wandeln kin
in t licht van t levent.
57
Veur meziekmeester. Op wies van: Verdelg nait. Van David, n stil gebed, dou hai veur Saul in n spelonk vlucht was.
2 Wees mie genoadeg, God, wees mie genoadeg,
want bie joe heb ik mien touvlocht zöcht.
In schaar van joen vleugels schoel ik
tot t vernailen verbie is.
3 God roup ik aan, de Alderhoogste,
God, dij der mienentwege n èn aan moakt. 4 Tou hemel oet zel hai mie biestand geven,
dij n vaal veur mie opzetten te schaande moaken. sela
Joa, God zel mie zien laifde en traauw geven.
5 Middenmaank laiwen mout ik liggen,
bie menskenvreters,
heur tanden binnen speer en pielen,
heur tong is n schaarp sweerd. 6 Verhef joe boven hemel, o God,
loat joen glorie over haile eerde goan.
7 Ze hebben n vangnet veur mien vouten spand
dat ik mie boegen zol.
Ze hebben n koel veur mie groaven
en binnen der zulm in valen. sela
8 Ik bin gerust, o God,
ik bin gerust,
ik wil zingen en meziek moaken. 9 Wor wakker, mien glorie,
haarp en lier, wor wakker,
eerste zunnestroalen wil ik wakker moaken.
10 Maank volken wil ik joe priezen, Heer,
maank noatsies psaalms zingen. 11 Want joen laifde gaait tot hoog aan hemel,
en joen traauw aan wolken tou. 12 Verhef joe boven hemel, God,
loat joen glorie over haile eerde goan.
58
Veur meziekmeester. Op wies van: Verdelg nait. Van David, n stil gebed.
2 Ie, dij t veur t zeggen hebben, spreek ie woarliek recht,
geef ie n rechtschoapen oordail over mensken? 3 t Is ja mit n haart vol onrechtveerdeghaid dat ie op eerde te waark goan,
ie geven vrij boan aan t geweld van joen handen.
4 Goddelozen hebben zok ofkeerd van stonden òf dat zai geboren wazzen,
leugenputen dolen om van dou ze droagen werden. 5 Zai hebben vergif, n adder geliek,
n dove slaang dij zien oren dichtstopt, 6 dij nait heurt noar stem van besweerders,
hou bekwoam of dij ook binnen mit heur spreuken.
7 Haauw, God, heur tanden oet de bek,
breek houktanden van dij jonge laiwen, HEER - 8 loat heur verdwienen as wotter dat oflopt,
as pielen dij op boog al breken,
9 as n slak dij aal kroepend oplöst in sliem,
as n ontiedeg geboren kind dij zun nooit zain het, 10 as n hoageldoorn dij votwaait in störm
en nooit onder kookpot komt.
11 Rechtveerdege zel der nocht aan hebben as hai zugt dat t aal vergolden wordt,
zien vouten zel hai wasken in t bloud van goddeloze. 12 En men zel zeggen: "Joa, rechtveerdege dij krigt zien loon,
joa wis, der is n God, en dij dut recht op eerde."
59
Veur meziekmeester. Op wies van: Verdelg nait. Van David, n stil gebed dou Saul gounent stuurde om te posten bie zien hoes, omreden hai zol van kaant moakt worden.
2 Mien God, red mie van mien vijanden,
neem mie in beschaarmen tegen dij in opstand kommen binnen. 3 Red mie van miesgasters,
en verlös mie van haalsoetsnieders.
4 Zai loeren ja op mien levent,
staarke kerels valen mie aan.
Nait omdat ik opstandeg wezen zol of zundegd heb, HEER, 5 - ik heb ja niks misdoan - zai runnen op mie òf en sloeten mie in.
Kom in t èn en kiek zulm, 6 HEER van legermachten, God van Israël,
wor wakker om ale volken te stravven,
heb gain genoade mit ale miesgasters doar gain vertraauw op is. sela
7 Ale oavends kommen ze weerom,
ze blavven as honden
en strunen deur stad. 8 Joa, zai körken oet de bek,
sweerden binnen op heur lippen,
wèl zol t ook heuren?
9 Mor ie, HEER, lagen der om,
ie spotten mit ale volken. 10 Mien kracht, ik hol mie vaast aan joe,
God is mien börg.
11 God, dij traauw is, zel mie in muit kommen,
hai let mie deelkieken op mien vijanden. 12 Moak heur nait dood, den zel mien volk t nait vergeten,
loat heur omswinnen, smiet heur om,
- deur joen kracht -
Heer, ons schild.
13 Zunde is t woord dat heur over lippen komt,
loat heur doarom vertoesd worden
in heur hoogmoudeghaid,
in vluik en leugen dij zai vertellen.
14 Vernail heur oet grammiedeghaid,
vernail heur, tot ze der nait meer binnen,
en waiten zellen
dat God over Jakob regaaiert,
aan oetènnen van eerde tou. sela
15 Ale oavends kommen zai weerom,
ze blavven as honden,
strunen deur stad, 16 omschoemers binnen t,
dij janken as ze nait zat worden.
17 Mor ik, ik zing van joen kracht,
as dag begunt, verkundeg ik joen traauw,
veur mie was ie börg en touvlocht,
op dag dat ik doodsbenaauwd was.
18 Mien kracht, ik wil joe in psaalms bezingen,
want God, dij mie traauw is,
dij is mien börg.
60
Veur meziekmeester. Op wies van: De lelie van t getugenis. n Stil gebed van David, n leerdicht, 2 dou hai stree tegen Arameeërs oet Mesopotamië en oet Soba, en dou Joäb op weeromraais Edomieten in t Zoltdaal versloagen haar, twaalfdoezend man.
3 O God, ie hebben ons verstöt en oetnkander jagd,
ie binnen grammiedeg, moak t weer goud mit ons! 4 Ie hebben t laand schud en spleten,
moak scheuren dicht, t staait ja op instörten. 5 Ie hebben joen volk slim lieden loaten,
ie hebben ons doezelwien te drinken geven.
6 Ie geven n taiken aan dij joe vereren,
om heur te woaren veur pielenboog. sela 7 Loat joen beminden vrijhaid vinden,
loat joen rechterhaand heur redden, dou mie antwoord!
8 God het sproken in zien haailegdom:
"Zingend zel ik Sichem verdailen,
vlakte van Sukkot verkoaveln. 9 Van mie is Gilead, Manasse is mienent,
Efraïm is mien staarke börg,
Juda is mien heersersstaf. 10 Moäb is mien waskoem,
op Edom smiet ik mien schoug,
mien schraiw klinkt over Filistea."
11 Wèl brengt mie noar verstaarkte stad,
wèl laaidt mie aan Edom tou? 12 God, heb ie ons nait verstöt,
goa ie nait mit in ons leger?
13 Geef ons hulp tou benaauwdhaid oet,
want verlözzen van mensken het gain nut. 14 Mit God kin we ons verweren,
hai zet ons vijand vout op nek.
61
Veur meziekmeester. Kin zongen worden mit meziek derbie. Van David.
2 Heur, o God, noar mien smeken,
sloag acht op mien gebed, 3 van t èn van wereld roup ik om joe,
want t haart begeft mie.
Breng mie op rots dij mie te hoog is, 4 ie binnen ja mien touvlocht,
n börg doar vijand nait tegenop kin.
5 Mog ik aaltied mor wonen in joen tènt,
vaaileg bezied onder joen vleugels, sela 6 want ie, o God, hebben mien beloftes heurd,
aan dij joe vereren, heb ie joen aarfdail doan.
7 Vermeerder keunenk zien levensdoagen,
loat zien joaren duren geslachten laank. 8 Loat hom aaltied tronen veur joen ogen, o God,
dat traauw en woarhaid hom bewoaren. 9 Den zel ik joen noam veur aaltied bezingen
en elke dag mien beloftes noakommen.
62
Veur meziekmeester. Op wies van Jedutun. n Psaalm van David.
2 Allain bie God kom ik tot rust,
hai is t dij mie redt. 3 Hai allain is mien rots, mien redden, mien verschoel,
ik zel mie aaltied stoande holden.
4 Hou laank nog zel ie ain beloagen mit verwieten
en bedraaigen hom aaltemoal?
Hai is n muur dij oet t lood is,
as n strinket dij omstöt wordt.
5 Zai beroamen t plan hom te verdrieven van zien hoge post,
hebben heur nocht aan laigen,
zai priezen hom,
mor inwendeg vervluiken ze hom. sela
6 Rust bie God allain, zeg ik tegen miezulm,
doar ik op hoop, komt ja van hom. 7 Hai allain is mien rots en mien redden doar ik vaaileg bin,
ik zel mie aaltied stoande holden.
8 Bie God is mien redden en mien eer,
mien staarke rots, mien touvlocht is bie God. 9 Vertraauw op hom op ale tieden, o volk,
stört veur hom joen haart oet,
bie God, doar kin men ja schoelen. sela
10 Oadamskinder binnen ja niks as lucht,
niks as leugen binnen menskenkinder,
op weegschoal goan ze allain mor noar boven,
aal mitnkander wegen ze minder as niks.
11 Vertraauw nait op wat ie deur joen macht
joe touaigend hebben,
en verwacht niks van wat ie roofd hebben;
zet joen zinnen nait op bezit dat aanwast.
12 Ainmoal het God sproken,
twijmoal heb ik t heurd:
"Kracht is van God." 13 Bie joe, Heer, is traauwe laifde,
ie vergelden mensken
noar heur waark.
63
n Psaalm van David, dou hai touhuil in woestijn van Juda.
2 God, mien God bin ie, ik zuik noar joe,
mien ziel smacht noar joe,
mien liggoam longert noar joe
in n dreug en dörsteg laand zunder wotter.
3 Vandoar dat ik in t haailegdom joe zag,
joen macht en joen glorie. 4 Joen traauwe laifde is beter as t levent,
mien lippen priezen joe.
5 Joe wil ik priezen zo laank as ik leef,
in joen noam mien handen omhoog steken. 6 Den eet ik mie zat in maarg en vet,
en mien lippen jubeln t oet.
7 As ik op bèr lig, denk ik aan joe,
bie naacht miemer ik over joe. 8 Want ie hebben mie hulpen,
ik jubel in schaar van joen vleugels. 9 Mit haart en ziel hang ik aan joe,
joen rechterhaand holdt mie vaast.
10 Lu dij mie noar t leven stoan,
loat dij daip onder grond terecht kommen, 11 dij mie aan t sweerd overgeven willen,
loat dij t mit jakhaalzen te doun kriegen. 12 Keunenk zel blied wezen over God,
elk dij hom traauw sweert, mag zok gelokkeg priezen,
want mond van leugenders wordt dichtstopt.
64
Veur meziekmeester. n Psaalm van David.
2 Heur mie aan, God, heur mien klacht,
woar mien levent veur t draaigen van vijand, 3 hol mie bezied veur t soamenspannen van minhoeden,
veur rebulie van deugennaiten dij onhaail aanbrengen.
4 Ze schaarpen heur tong aan as n sweerd,
n bitter woord leggen ze aan as n piel, 5 oet heur schoel schaiten ze op ain dij onschuldeg is,
in ains schaiten ze op hom, zai hebben gain ontzag.
6 Zai moaken zok staark mit dikke proat,
onnaaiern om strikken te zetten,
zai zeggen: "Wèl zol t zain?" 7 Zai verzinnen ales wat nait deugt:
"Ze kinnen ons niks moaken, as wie heur bekeukeln.
- n Mensk zien inholten en zien haart kin men nait deurgronden."
8 Dou schoot God n piel op heur òf,
in ainen haren ze wonden. 9 Hai muik dat zai stroekelden over heur tong,
elk dij heur zugt, schudt mit kop.
10 Ale mensken werden baang,
en zai vertelden wat God heur doan haar,
zai haren deur dat dit zien waark was. 11 Rechtveerdege zel zien nocht hebben in de HEER,
en dij zien touvlocht zöcht bie hom.
Aal dij van haarten oprecht binnen, zellen der grootsk op wezen.
65
Veur meziekmeester. n Psaalm van David, n laid.
2 Joe komt lofzang tou,
o God, op Sion,
ie kriegen wat joe beloofd is.
3 Noar joe, dij heurt noar t gebed,
komt elke staarveling mit woorden van schuld. 4 Binnen ons zunden mie te maans,
ie doun ze vot.
5 Gelokkeg is dij ie oetkaizen en bie joe kommen mag,
zo ain mag wonen in joen veurhoven.
Doar krieg wie meer as zat van t goie van joen hoes,
van t haailege van joen tempel.
6 Mit ontzaggelke doaden geef ie n rechtveerdeg antwoord,
o God van ons haail,
op joe vertraauwen oetènnen van eerde
en achterste zeeën.
7 Op joe, dij baargen vastzet mit kracht,
mit macht bekled binnen, 8 dij t roazen van zee tou bedoaren brengen,
t tekeergoan van golven
en t aggewaaiern van volken. 9 Bewoners van oetènnen van wereld hebben ontzag veur joen wonderdoaden,
doar zun opkomt en ondergaait, loat ie t jubeln.
10 Ie zörgen veur t laand,
ie geven t wotter en moaken t meer as riek.
Gods revier is vol wotter.
Ie loaten heur koorn gruien, zo bewaark ie t laand, 11 ie loaten vurgen drinken en ie moaken kloeten fien
en waik mit regenwotter, ie geven zegen aan t gewas dat opkomt.
12 Ie zetten kroon op t joar van joen genoade,
joen voutsporen doar drupt t vet van òf, 13 waaiden in woestijn soppen dervan,
heuvels binnen bekled mit gejubel, 14 de velden binnen aankled mit schoapen,
doalen zitten onder t koorn bezied.
Ze jubeln nkander tou, en zingen dat ze doun!
66
Veur meziekmeester. n Psaalm, n laid.
Jubel veur God, haile eerde, 2 bezing zien heerleke noam,
moak der n mooi loflaid op. 3 Zeg tegen God: "Wat binnen joen doaden ontzaggelk,
joen vijanden mouten wel boegen veur joen grode macht. 4 Haile eerde mout veur joe boegen,
joe lof touzingen, joen noam priezen." sela
5 Kom om Gods doaden te zain,
mensken hebben ontzag veur zien doaden, 6 van zee muik hai dreug laand,
zai konden mit dreuge vouten noar aander kaant.
Doar was wie wies mit hom, 7 dij aaltied heerst mit macht,
zien ogen goan over volken.
Loat rebellen nait tegen hom in opstand kommen. sela
8 Pries, o volken, dij God van ons,
loat zien lof in t ronde klinken, 9 hai het ons leven roemte geven,
en ons vouten woard veur wankeln.
10 Ie hebben ons oetperbaaierd, God.
ons zuverd, zo as men zulver zuvert, 11 ie hebben ons t vangnet injagd,
en lasten ons op nek legd. 12 Ie luiten mensken over ons hèn rieden,
wie mozzen deur vuur en deur wotter,
mor ie hebben ons brocht noar overvloud.
13 Ik zel noar joen hoes goan mit brandovvers,
wat ik beloofd heb moak ik woar, 14 wat mien lippen touzegd hebben,
wat mien mond zee, dou ik t stoer haar: 15 "Brandovvers van vedde schoapen zel ik brengen,
mit ovvergeur van rammen,
bollen en bokken ovver ik." sela
16 Kom en heur wat ik joe vertellen wil,
ie, dij aalmoal ontzag veur God hebben,
wat hai veur mie doan het. 17 Hom heb ik aanroupen,
zien lof lag mie op lippen. 18 As mien haart kwoad in t zin had haar,
den haar de HEER nait noar mie heurd.
19 Mor God het aal noar mie heurd,
acht geven op mien gebed. 20 Hoog te priezen is God,
hai het mien gebed nait ofwezen,
mie zien traauw nait ontzegd.
67
Veur meziekmeester. Mit snoarenspul. n Psaalm, n laid.
2 Loat God ons genoadeg wezen en ons zegen,
dat hai zien aangezicht noar ons lichten dut sela 3 en men op eerde joen weg ken,
maank ale volken joen haail.
4 Dat volken joe priezen, o God,
dat volken joe aalmoal priezen. 5 Dat noatsies heur nocht hebben en joechaaien,
omdat ie eerlek rechtspreken over volken
en noatsies op eerde aansturen. sela 6 Loat volken joe priezen, o God,
loat volken joe aalmoal priezen.
7 Eerde gaf rij beschot,
God, ons God, zegent ons. 8 God zegent ons,
dat ale ènden van wereld ontzag veur hom hebben.
68
Veur meziekmeester. Van David, n psaalm, n laid.
2 God komt in t èn,
zien vijanden vlaigen aal kanten oet,
zien hoaters verdwienen veur zien ogen. 3 Ie verdrieven heur as rook.
Zo as n vetkeers smelt bie vuur,
zo vergoan onrechtveerdegen veur t oog van God. 4 Mor rechtveerdegen maggen zok verheugen,
zai jubeln veur t oog van God,
deurhèn blied.
5 Zing veur God, pries zien noam,
moak vrij boan veur hom dij op wolken voart,
HEER is zien noam, jubel veur zien oog: 6 voader van weeskinder, dij wedevraauwen aan recht helpt,
God in zien haailege woonstee. 7 Hai geft omswaalkers n thoes,
dij in t gevang zitten, geft hai overvloud.
Mor dij nait om liek willen, zellen wonen op verdörst laand.
8 God, dou ie veur joen volk oetgingen,
dou ie veurop laipen deur woestijn, sela 9 dou dreunde grond,
kwam t wotter deel oet hemel,
veur God, heerser van Sinai,
veur God, God van Israël.
10 Rije regen luit ie omdeelkommen, God,
en t muide laand gaf ie nije kracht. 11 Joen volkje ging doar wonen,
in joen goudens heb ie t aan t aarme volk geven.
12 De HEER gaf zien odders
en n haile mennegte vraauwlu gaf bosschop deur. 13 Keunenks, mit heur legers, vluchten vot,
thoes verdailt vraauw t roofgoud, 14 as ie bie schoapskooien liggen.
Vleugels van doeven wazzen bedekt mit zulver,
en heur slagpennen mit gruinglaanzend gold: 15 dou Aalmachtege doar keunenks oetnkander juig,
dou snijde t op Salmonbaarg.
16 Machtege baarg, Basanbaarg,
baarg mit aal dij toppen, Basanbaarg, 17 woarom kikst ofgunsteg, bultege baarg,
noar dij baarg, doar God op wonen wil?
De HEER zel doar veur aaltied wonen.
18 Mit machtege striedwoagens, meer as honderddoezend,
doezenden en doezenden,
toog de Heer van Sinai vandoan noar t haailegdom. 19 Ie binnen opvoaren noar hemel om doar te wonen,
ie hebben kriegsgevangen moakt;
alderdeegs mensken dij nait om liek wollen,
hebben joe geschenken aanboden, o HEER God.
20 Te priezen is de HEER, dag in, dag oet dragt hai ons,
dij God is t dij ons verlöst, sela 21 dij God is veur ons ain dij redt.
Bie hom, de HEER, kin men ontkommen aan dood.
22 God zel zien vijanden de kop inhaauwen,
t zel de kop kosten van lu dij schuld hebben. 23 De HEER het zegd: "Ik hoal heur op oet Basan,
joa, oet alderdaipste zee hoal ik heur op, 24 den kin ie joen vouten boaden in bloud
en joen honden slikken heur pozzie van vijanden."
25 Ze zain joen optochten, o God,
optochten van mien God, mien keunenk, noar t haailegdom: 26 zangers veurop, muzikanten der achteraan
middenmaank jonge vraauwlu mit tamboerijnen.
27 Pries God nou ie bie mekoar kommen,
pries de HEER, bron van Israël. 28 Doar is Benjamin, de jongste, hai lopt veurop,
laaiders van Juda, dij lewaaimoakers,
laaiders van Zebulon, laaiders van Naftali.
29 Loat joe gelden, God,
teun joen macht, o God, in wat ie veur ons doan hebben, 30 omwille van joen tempel, omwille van Jeruzalem,
brengen keunenks joe n geschenk.
31 Bedraaig wilde baisten in t raait,
dij koppel bollen, dij jonge bollen van volken.
Vertrap dij glìn binnen op geld,
joag volken oet mekoar dij heur nocht hebben aan gevechten. 32 Gezanten kommen oet Egypte,
Nubiërs kommen runnend noar God tou mit geschenken.
33 Keunenkrieken van wereld,
zing veur God,
zing psaalms veur de Heer, sela 34 veur hom, dij deur hoogste hemel voart.
Heur, zo as hai zien stem oetzet, zien machtege stem.
35 Erken God zien macht:
hai gaait over Israël,
zien macht rekt tot aan wolken tou. 36 Ontzaggelk bin ie, God, vanoet joen haailegdom.
God van Israël, dij het macht
en nije krachten geven aan zien volk.
Hoog te priezen is God!
69
Veur meziekmeester. Op wies van: De lelies. Van David.
2 Red mie, God,
ik stoa aan haals tou in t wotter, 3 ik zak vot in grondeloos sliek,
heb gain haarde boom onder vouten,
ik bin in daip wotter beland,
stroom spoult mie vot.
4 Ik bin bekòf van t roupen,
mien ströt is raauw,
mien ogen binnen bedurven,
zo heb ik oetkeken noar God.
5 Machteger as hoaren op mien kop
binnen zai dij mie hoaten om niks,
dij mie t swiegen opleggen willen,
mien vaalze vijanden binnen machteg in tal:
ik mout weeromgeven,
wat ik nait stolen heb.
6 God, ie kennen mien dwoashaid,
en mien schuld ontgaait joe nait. 7 Loat aal dij op joe hopen zok nait veur mie schoamen,
HEER, God van legermachten,
loat aal dij joe zuiken nait deur mie te schaande kommen,
God van Israël.
8 Om joe mout ik mie ja beschimpen loaten,
schoamte is mie van t gezicht te lezen. 9 Ik bin n vremde worden veur mien bruiers,
aan zeuns van moeke nait bekend. 10 Ik heb mie veur joen hoes verweerd en heb mie derbie verropt,
minachten veur joe van dij minnen is op mie deelkommen.
11 Ik schraifde dou ik vastte,
mor ik wer der om beschimpt, 12 ik bin n raauwklaid droagen goan,
mor zai haren de gugel mit mie. 13 Lu dij in poort touholden dij hebben t over mie,
en dij aan draank binnen, moaken spotlaiden.
14 Mor ik, ik beed joe, HEER,
dat tied ter heer is dat ie t goud mit mie moaken.
God, geef mie antwoord oet joen grode laifde,
red mie in joen oprechte traauw. 15 Hoal mie oet dij bragel, loat mie nait ondergoan,
mor red mie van dij mie hoaten
en van t daibe wotter. 16 Loat t wotter mie nait votspoulen,
daipte mie nait deursloeken,
loat ofgrond zien mond nait boven mie tousloeten.
17 Geef mie antwoord HEER, want joen traauwe laifde is goud,
keer joe noar mie tou, omdat ie zo'n meedlieden hebben. 18 Hol joen gezicht nait veur joen knecht bezied,
ik zit ja in nood, geef mie op slag antwoord. 19 Wees dicht bie mie, verlös mie,
koop mie lös van mien vijanden.
20 Ie waiten ja hou dat men mie beschimpt,
mien eer te noa komt, mie te schaande moakt,
aal mien vijanden binnen joe bekend. 21 Beschimpt worden, brook mien haart en ik bin roadeloos,
ik hoopte op n bliek van meedlieden, mor t was der nait,
op lu dij mie troosten wollen, mor zai wazzen nait te vinden.
22 Zai deden mie alderdeegs vergif deur t troostbrood
en veur dörst kreeg ik edek om te drinken. 23 Dat heur toavel n slagnet veur heur wezen mag
en veur heur vrunden n strik. 24 Loat t licht verdwienen oet heur ogen dat ze niks meer zain
en moak heur lennelaam veur aaid.
25 Stört joen vluik over heur oet,
loat heur vuilen hou verbraand ie binnen. 26 Verrinnewaaier heur tèntenkaamp,
loat in heur tènten gain bewoner over blieven. 27 Want zai zitten heer achter dij ie sloagen hebben
en vertellen over pien van dij deur joe tot staarvens tou verwond binnen.
28 Tel dij misdoad bie heur misdoad,
loat heur gain vrijsproak van joe kriegen, 29 loat heur oetwiskerd worden oet t levensbouk,
loat heur nait optaikend wezen bie rechtveerdegen. 30 En ik, ik bin ellèndeg en vergoa van pien,
joen redden dij zel mie beschaarmen.
31 Ik wil Gods noam priezen mit n loflaid,
ik wil hom grootmoaken mit n daanklaid. 32 Dat zel de HEER meer aanstoan as n jonge bol,
of n twenterbol mit hoorns en houven.
33 Deemoudegen zellen t zain en heur nocht deraan hebben,
dij God zuiken: dat joen haart opleven mag. 34 Want de HEER heurt noar aarme lu
en het gain verachten veur dij gevangen binnen.
35 Loaten hemel en eerde hom priezen,
zeeën en ales wat doar in touholdt. 36 Want God redt Sion
en vannijs zel hai steden van Juda baauwen.
Zai zellen doar wonen en t is heurent van geslacht op geslacht, 37 t zoad van zien knechten zel t aarven,
dij heur nocht hebben aan zien noam zellen der wonen.
70
Veur meziekmeester. Van David, om te gedenken.
2 O God, kom, om mie te redden,
o HEER, kom gaauw, om mie te helpen.
3 Loat beschoamd en veur schut stoan,
dij loeren op mien levent,
loat beschoamd wegwieken,
dij oet binnen op mien ongelok, 4 loat beschoamd weeromgoan,
dij mie oetlagen.
5 Dij joe zuiken,
zellen blied wezen en zok verheugen,
dij t van joe verwachten,
zellen aingoal zeggen:
"God is groot!"
6 Mor ik, ik bin aarm en ellèndeg,
o God, kom toch gaauw noar mie tou,
mien helper en mien redder bin ie ja,
nait laanger wachten, HEER!
71
Bie joe, o HEER, zuik ik mien touvlocht,
loat mie nait beschoamd stoan, 2 red mie, breng mie in vaaileghaid deur joen gerechteghaid,
heur mie aan en verlös mie.
3 Wees veur mie n rots,
doar ik aaltied schoelen kin.
Ie hebben odders geven om mie te verlözzen,
want mien rots en vesting dat bin ie.
4 Mien God, verlös mie oet handen van goddeloze,
oet greep van onrechtveerdege en onderdrokker. 5 Want ie binnen mien hoop,
o God en HEER,
mien vertraauw van jongs òf aan. 6 Ik steun op joe van mien geboorte òf,
van dat moeke mie druig, bin ie mien touvlocht,
ik zing aingoal joen lof.
7 Ik was veur mennegain n taiken,
ie wazzen mien machtege touvlocht. 8 Mien mond is vol van joen lof en van joen glorie,
haile dag deur.
9 Dou mie nait aan zied as ik op joaren kom,
verloat mie nait as mien krachten mie begeven. 10 Want mien vijanden proaten over mie,
dij beloeren en bekonkeln mie, 11 ze zeggen: "God het hom verloaten,
achter hom heer en griep hom, der is toch gainain dij hom helpt."
12 O God, blief nait zo wied bie mie weg,
mien God, hoast joe en stoa mie bie, 13 loat ze zok schoamen, loat heur vergoan, aal dij mie vervolgen,
aal dij op mien ongelok oet binnen, loat heur mit spot en schaande toudekt worden.
14 Mor ik zel aalaan wachten,
doarom blief ik joe lofzingen. 15 Ik zel vertellen van joen gerechteghaid,
van joen verlözzen haile dag deur,
joen doaden binnen ja nait te tellen. 16 Ik zel begunnen mit krachtege doaden van de HEER, mien God,
allain van joen rechtveerdeghaid zel ik vertellen.
17 O God, ales heb ie mie leerd van mien jonge joaren òf aan
en hail tied nog vertel ik joen wonders. 18 As ik old en gries bin, o God,
verloat mie nait,
veurdat ik t volgende geslacht verteld heb van joen macht,
aan elk dij komt van joen kracht.
19 Joen gerechteghaid is hemelhoog,
O God, dij grode dingen dut.
Wèl is aan joe geliek? 20 Deur joe heb ik mitmoakt
veul noden en ongelokken -
ie zellen mie weer tou leven brengen,
tou daibe vloud oet
zel ie mie weer opkommen loaten. 21 Wil mien aanzain toch vergroten,
bie mie kommen om mie te troosten.
22 Den zel ik joe priezen, joe en joen traauw,
en speulen op haarp.
Ik wil veur joe psaalmzingen mit citer,
o Haailege van Israël.
23 Mit mond wiedopen zel ik veur joe zingen,
mien ziel heb ie verlöst. 24 Mien tong: haile dag zel e preveln, as ik joen gerechteghaid overdenk,
want dij mien ongelok zuiken, schoamen zok en worden beschoamd.
72
Van Salomo.
O God, geef keunenk joen rechtsregels,
keunenkszeun joen gerechteghaid. 2 Loat hom joen volk rechtveerdeg oordailen,
joen aarme volk liek en recht doun.
3 Loat baargen vree brengen aan t volk
en heuvels gerechteghaid. 4 Loat hom recht doun aan aarme lu,
heur kinder biestoan,
mor verdrokker vergraimen.
5 Loat hom leven zo laank as zun schient,
zo laank as moan der is,
van geslacht op geslacht. 6 Loat hom wezen as regen op dreuge akker,
as veujoarsregen dij t laand waik moakt.
7 Loat in zien doagen gerechteghaid vrucht droagen
en overvloud aan vree, totdat moan der nait meer is. 8 Loat hom heersen van aine zee tot aander tou,
van Revier òf tot aan oetènnen van eerde.
9 Loat t woestijnvolk veur hom op knijen goan,
zien vijanden t stof sloeken. 10 Loat keunenks van Tarsis en kustlanden
hom geschenken brengen.
Loat keunenks van Seba en Saba
hom belasten ofdroagen. 11 Loat ale keunenks veur hom deelboegen
en ale volken hom dainen.
12 Hai moakt vrij, dij aarm is en om hulp vragt,
ellèndege, dij gain helper het. 13 Hai het te doun mit ain dij hulpeloos en swak is,
t levent van stumpers verlöst hai.
14 Hai verlöst heur van onderdrokken en geweld,
heur bloud is kostboar in zien ogen. 15 Dat hai nog laank leven mag!
Loat men hom gold van Seba schenken en stoadeg veur hom beden,
hom zegen touwènsen, haile dag.
16 Loat ter overvloud van koorn stoan op t laand,
alderdeegs tot op toppen van baargen.
Loat oaren golven as bomen op Libanon.
Loat lu in stad opbluien
as t gruin op t veld.
17 Loat zien noam veur aaid bestoan,
loat zien aanzain wazzen zo laank as zun schient.
Men zel nkander zegen touwènsen,
ale volken zellen hom gelokkeg priezen.
18 Te priezen is de HEER,
de God van Israël.
Hai is t dij wonderdoaden dut, hai allenneg. 19 Te priezen is zien grode noam, veur aaltied.
Loat haile wereld vol wezen van zien glorie.
Amen, amen!
20 Hier holden gebeden op van David, Isaï zien zeun.
42