Ie maggen n man gelokkeg priezen,
dij nait mitlopt mit kwoadwilleg volk,
dij mit zundoars nait op pad gaait,
nait mit spotters om ain toavel zit. 2 Hai het zien wil aan de wet van de HEER
en denkt doar hailtied over noa,
bie dag en bie naacht.
3 Hai is as n boom, dij poot is stoef bie t daip,
dij, as tied ter heer is, zien vruchten dragt
en dij zien blad nait valen let.
Aal wat hai dut, geft goie opbrengst.
4 Hail aans as lu mit kwoad in t zin:
dij binnen as kaf,
dat votwaait in de wind.
5 Zok volk holdt veur t gericht gain stand,
zok zundoars nait bie rechtschoapen volk. 6 De HEER kent de weg ja van rechtschoapen lu,
t pad van kwoad volk lopt naargens op oet.
2
Woarom goan de volken zo te keer?
Zai roupen mor wat, mor t het ja gain zin. 2 De keunenks van de wereld kommen in verzet;
heur prinzen smeden mitnkander heur plannen
tegen de HEER en zien gezaalfde: 3 "Loat wie ons t juk ofdoun,
en heur kettens votgooien!"
4 Dij in de hemel op zien troon zit, de HEER,
mout lagen; hai het de gugel ja mit heur. 5 Mor den, in ainen, prat hai tegen heur, kwoad!
Deur zien kwoadhaid jagt hai heur schrik aan: 6 "Ik heb hom ja zúlm keunenk zaalfd
op Sionsbaarg, mien haailege baarg."
7 Ik mout t rondvertellen, t besloet van de HEER.
Hai richtte zok ja tegen mie:
"Doe bist mien zeun,
ik heb die vandoag t levent geven. 8 Huifst mie mor te vroagen
en ik zel die ale volken as dien aarfdail geven
en de haile wereld as dien aigendom. 9 Den kinst heur kepothaauwen mit n iesdern staang,
heur stokkendbreken as diggelgoud!"
10 Doarom, ie keunenks, bruuk joen verstand!
En ie, laaiders van de wereld, wees woarschaauwd! 11 Dain de HEER, loat joen ontzag blieken
en huver as ie hom hulde brengen. 12 Wees onderdoaneg aan de zeun, kus hom,
dat hai nait grammiedeg wordt
en ie onderwegens omkommen zollen,
hai kin ja mor zo in vergramdhaid ontbranden.
Aal dijgenen zellen gelokkeg wezen,
dij in schoel kroepen bie de HEER.
3
n Psaalm van David, dou hai op loop was veur Absalom, zien zeun.
2 Och HEER, mien tegenstanders binnen nait te tellen,
en aalmoal kommen ze tegen mie in t èn. 3 Aalmoal zeggen ze over mie:
"Hai kin van God gain hulp verwachten wezen." sela
4 Mor ie, HEER, binnen mie n schild om mie tou.
Ie binnen mien tröts, deur joe hol ik ja kop ter veur. 5 Haardop roup ik de HEER aan,
hai geft mie antwoord van zien haailege baarg òf. sela
6 Ik lig deel, ik vaal in sloap, en wor weer wakker -
de HEER geft mie ja steun. 7 Ik bin nait baang veur t volk, nog nait veur tiendoezend man,
dij rondomheer tegen mie in t èn kommen.
8 Stoa op, HEER; mien God, verlös mie!
Haauw mien vijanden tegen de kop
en breek goddelozen heur tanden oet. 9 Redden, HEER, dij is aan joe,
joen zegen rust op joen volk. sela
4
Veur meziekmeester, op klanken van snoarmeziek. n Psaalm van David.
2 Geef mie toch antwoord as ik roup,
God, dij mie aaltied recht doan het.
Geef mie toch roemte in mien benaauwdens,
wees mie genoadeg, heur mien beden.
3 Hou laank nog, grode lu, zel t wezen,
dat ie de gugel mit mie hebben,
dat ie de leegte zuiken, de loze leugen? sela 4 Wees hierop verdocht:
de HEER geft aaltied zien gunst, aan dij hom traauw is.
De HEER zel t heuren, as ik hom aanroup.
5 Wees huverg van ontzag, dou gain verkeerds,
onderzuik joen aigen haart snaachts op joen bèr
en hol joe angsteg stil. sela 6 Breng joen ovvers, zo as t heurt
en heb vertraauw in de HEER.
7 Paardie lu vroagen zok òf:
"Wèl zel ons nou oetzicht geven?"
Loat ie den, HEER, over ons schienen,
de glaans van joen gezicht.
8 Ie hebben mie blied moakt in mien haart,
meer as doudestieds zai wazzen,
om heur koorn en heur most, zoveul ja!
9 Ik kin in vree nou liggen goan
en valen zaacht in sloap.
Allenneg ie, HEER, willen mie wonen loaten,
hier, op zo?n vaaileg stee.
5
Veur meziekmeester, mit speulen op heddersfloiten. n Psaalm van David.
2 Heur mien woorden, HEER,
geef acht op mien kloagen. 3 Luster noar mien roupen om hulp,
mien keunenk en mien God,
tot joe richt ik ja mien beden.
4 Smörgens vroug, HEER, heur ie mien stem,
smörgens vroug richt ik mie tot joe en wacht ik op joe.
5 Ie binnen ja gain God, dij zok vernuvert mit t kwoad,
zoks kwoad loat ie nait bie joe tou. 6 Gewaitenloos volk mag nait bestoan
veur joen ogen.
Ie hoaten elk dij onrecht dut, 7 leugenders richt ie te gronde.
Moordenoars en bedraigers heb ie, HEER,
n gruwelke hekel aan.
8 Mor deur joen grode gunst, joen laifde,
mag ik joen hoes ingoan,
mag ik noar joen haaileg hoes,
in ontzag veur joe mie deelboegen. 9 HEER, laaid mie deur joen gerechteghaid,
mit t oog op mien vijanden,
moak joen weg veur mie vrij.
10 Heur mond komt ja gain betraauwboar woord oet,
ze binnen deurhèn verdurven.
Heur haalsgat is n open graf,
mit heur tong proaten ze n aander noar de mond.
11 Geef heur straf, God, om heur schuld,
loat heur vastlopen in heur kwoade opzet.
Joag heur vot vanwegens aal heur misdoaden;
zai binnen ja tegen joe in opstand kommen.
12 Loat elk dij bie joe in schoel kropt, veur aaltied blied wezen,
loat heur jubelzang klinken, omdat ie heur beschaarmen,
loat elk joe touzingen, dij joen noam hoog holdt! 13 Ie zellen n rechtveerdeg mensk ja zegen, HEER,
ie zellen hom mit joen gunst omgeven as mit n schild.
6
n Psaalm veur meziekmeester, op klanken van snoarmeziek en op wies van: d?Aachtste. n Psaalm van David.
2 Straf mie nait in joen kwoadhaid, HEER,
pieneg mie nait as ie vergramd binnen. 3 HEER, heb toch mit mie te doun, ik bin ja schoon aan t èn.
Moak mie beter, HEER, mien liggoam let mie ja in steek. 4 Mien gaist is haildaal oetstuur,
HEER, hou laank nog ...
5 Kom weer bie mie, HEER, red mien leven,
red mie om joen gunst en traauw. 6 In de dood wordt nait meer aan joe docht!
Wèl zel joe in t graf nog dankboar wezen?
7 Ik bin muid van t kloagen,
elke naacht is t kuzzen nat van troanen,
mien bèr is nat van t schraiven. 8 Mien ogen binnen dik van verdrait
en kieken woazeg noar mien vijanden.
9 Goa toch bie mie vot, ie kwoadwilleg volk!
De HEER heurt mie as ik haardop schraiven mout. 10 De HEER heurt mie as ik om meedlieden roup,
de HEER heurt mie en nemt mien gebed aan. 11 Mien vijanden, dij zellen schrikken en benaauwd worden,
in ainen goan zai beschoamd op loop.
7
n Kloaglaid van David, dat hai zongen het veur de HEER om de woorden van Kus, oet de stam Benjamin.
2 HEER, mien God, bie joe kin ik bezied kroepen,
verlös mie van mien achtervolgers, red mie toch. 3 As laiwen willen ze mie verscheuren,
mie mitslepen ... en gainain om mie te redden!
4 HEER, mien God, as ik wat misdoan heb,
as ter onrecht aan mien handen zit, 5 as ik kwoad doan heb aan ain dij vree mit mie veurhaar,
as ik mien vijand zo mor oetschud heb, 6 loat zo'n vijand mie den achternoazitten,
en mie inhoalen, mie op grond vertrappen,
loat mien eer doar mor in t stof achterblieven. sela
7 Stoa op, HEER, moak joe kwoad,
kom in t èn tegen mien roazende vijanden,
help mie, ie hebben t recht ja zulm insteld. 8 Road van ale volken mout om joe tou kommen,
kom ie den ook in t èn, hoog boven heur oet, 9 HEER, ie, rechter over ale volken.
Dou mie recht, HEER, ik heb ja gain schuld,
ik heb aaltied eerlek west. 10 Loat dij schuldegen oetschaaiden mit heur kwoadhaid
en help wèl onschuldeg is,
ie, rechtveerdege God,
dij t haart en de nieren onderzöcht.
11 Mien schild, dat is God,
de redder van d'oprechten van haart. 12 God is n rechtveerdege rechter;
n God, dij aal doag weer t kwoad straft.
13 Mor n mensk, dij zok toch nait betern wil,
wet zien sweerd en spant zien boog, kloar om te schaiten. 14 Hai zel zien woapens bruken veur t doodmoaken,
en zien vurege pielen richten.
15 Hai brudt op zien kwoade plannen,
hai is swanger van ongerechteghaid, hai zel bedrog op wereld zetten. 16 Hai graft n koel zo daip as hai mor immer kin
en vaalt den in de put, dij hai zulm groaven het. 17 Aal zien muite keert zok tegen hom,
aal t geweld komt op zien aigen kop weer deel.
18 Ik zel de HEER priezen veur zien rechtveerdeghaid.
Ik zel de noam van de HEER, de Alderhoogste God, mit psaalms bezingen.
8
Veur meziekmeester, op wies van n laid oet Gat. n Psaalm van David.
2 HEER, ons Heer,
wat is joen noam ja machteg
over d'haile wereld!
Hoog aan hemel loat ie aal joen glorie zain, 3 mit stemmen van kinder en van lutje potjes
heb ie joe n macht opbaauwd tegen joen vijanden,
om zo vijandeg en vroakzuchteg volk tegen te holden.
4 As ik omhoog kiek noar de lucht, noar t waark van joen vingers,
moan en steerns dij ie doar vastzet hebben, 5 wat is n mensk den nog, dat ie doar omdenken om hebben,
of n menskenkind, dat ie noar hom omzain zollen.
6 Evenzogoud heb ie zowat n god van hom moakt
en hom n kroon opzet van glaans en glorie, 7 ie hebben hom boas moakt over t waark van joen handen,
ie hebben hom t aalmoal aan zien vouten deellegd:
8 schoapen, segen en koubaisten,
boetendes ale wilde daaiern in t veld, 9 ale vogels in de lucht, vizzen in de zee,
en aal wat ter op zeeboom touholdt. 10 HEER, ons Heer,
wat is joen noam ja machteg
over d'haile wereld!
9
Veur meziekmeester. Op wies van: De dood van de zeun. n Psaalm van David.
2 Aan joe mout ik daank zeggen, HEER,
vanoet mien haile haart,
aal joen wonderdoaden mout ik rondvertellen. 3 Ik bin zo blied om joe, ik zing joe tou,
ik zing joen noam, o Alderhoogste!
4 Nou goan mien vijanden op loop,
zai sloagen zo mor tegen de grond,
zai kommen om bie t zain van joen gezicht. 5 Ie hebben veur mie in t plaait beslist,
ie, rechtveerdege rechter, vanòf joen hoge rechterstoul.
6 Ie hebben de volken de wacht aanzegd,
en goddelozen om haals brocht,
alderdeegs heur noam heb ie veur aiweg oetwist. 7 Mit de vijand is t nou doan,
heur steden heb ie in puun legd, veur aaltied.
Is gainain dij zok heur nog heugen kin.
8 De HEER, dij zit veur aiweg op zien troon,
zien rechterstoul staait kloar veur t gericht. 9 Hai regaaiert de wereld rechtveerdeg,
hai oordailt de volken noar gerechteghaid.
10 De HEER wil n vaaileg hoes wezen veur verschoppelingen,
n steveg stainhoes veur mensken in benaauwdens. 11 Dij joen noam kennen, HEER, dij kinnen op joe reken,
dij joe zuiken, HEER, loat ie nait in de steek.
12 Zing joen psaalms veur de HEER dij op Sion woont,
vertel van zien doaden maank ale volken. 13 Hai vragt rekenschop veur t bloud dat vergoten is,
hai denkt om de doden,
hai verget t geschraif van verschoppelingen nait.
14 Heb meedlieden mit mie, HEER,
kiek toch, hou mien vijanden mie te noa kommen,
droag mie op joen aarm bie poorten van de dood vandoan. 15 Den kin ik, in de poorten van stad Sion,
vertellen over aal joen grode doaden,
van haarten blied dat ie mie red hebben.
16 De volken valen in t gat
dat ze zulm groaven hebben,
ze zitten mit vouten vaast in t klapnet
dat ze zulm opzet hebben. 17 De HEER let van zok heuren, hai dut recht,
de goddelozen kommen vaast te zitten
in t waark van heur aigen handen. higgajon, sela
18 Loaten de goddelozen votgoan noar t dodenriek tou,
ale volken dij God vergeten haren. 19 n Aarme man wordt nait veur aiweg vergeten,
de hoop van verschoppelingen is nait veur aaltied verloren!
20 Kom in t èn, HEER, loaten mensken joe nait oetdoagen,
loaten de volken oordaild worden onder joen ogen. 21 Joag volken schrik aan, HEER,
loaten ze mor waiten, dat zai mensken binnen. sela
10
Woarom, HEER, stoan ie zo van vèrrens,
woarom blief ie zo laank bezied
in tieden dat ter knipt? 2 In zien hoogmoudswoan zit n goddeloze
swakkere lu fèl op hoed -
loat hom zulm toch lieden
onder de streken dij hai bedocht het!
3 Want zo'n goddeloze snaart ja
over zien aigen plannen
en as hai zien geld binnen het,
vervlökt en bespot hai de HEER. 4 In zien aigenwiezeghaid denkt hai:
Wordt mie gain rekenschop vroagd.
Der is ja gain God!
5 t Gaait hom aaltied veur de wind,
mor joen oordail over hom, doar kin hai nait bie.
Dij hom te noa kommen, dij blast hai vot. 6 Hai maint bie zokzulm: Ik zel nait omvalen,
ons zel in aiweghaid niks overkommen.
7 Zien mond lopt over van t gevluik, van list en van bedrog,
onder zien tong is t ain en aal onrecht en venien. 8 Achter n muur ligt hai in hinderloag,
op n stille plek brengt hai n onschuldege om haals,
hai loert op weerloze lu.
9 As n laiw in stroeken bezied,
ligt hai op zien prooi te loeren
om dij mit zien streken te pakken,
om dij mit zien net te vangen en mit te sleuren - 10 dij drokt zok deel, dij krimpt in nkander
en vaalt weerloos in zien poten. 11 Mor dij goddeloze maint bie zokzulm:
God wait van niks,
dij kikt aander kaant oet, zugt haildaal niks.
12 Kom den in t èn, HEER,
steek joen haand omhoog, God,
vergeet dij aarme stumpers nait. 13 Hou kin zo?n goddeloze joe, God, zo verachten
en denken: God vragt toch gain rekenschop.
14 Ie zain t ja wel: aalmoal pien en verdrait,
ie vernemen t en wegen t op joen haand.
n Weerloze, n wees, dij vertraauwt zok aan joe tou.
Ie binnen zien helper.
15 Moak toch n èn aan de macht van goddeloos volk,
vroag heur rekenschop veur heur minne streken,
tot ie t voldounde vinden. 16 De HEER is keunenk in tied en aiweghaid,
goddeloos volk wordt bie hom tou t laand oetjagd.
17 Ie hebben heurd noar stem van t stille volk, HEER,
ie geven heur moud, ie lustern noar heur. 18 Dou recht aan wezen en verschoppelingen,
dat gain mensk heur nog tou t laand oetjoagen kin.
11
Veur meziekmeester. Van David.
Ik zuik mien beschut bie de HEER.
Hou kin ie den tegen mie zeggen:
"Vlaig as n vogel, vlaig noar de baargen." 2 Wis en woar, goddelozen stoan kloar
mit boog al spand en pielen al richt,
zai willen in t boare duustern
d?oprechten van haart roaken. 3 Wis en woar, as grondslag van zien levent votzakt,
wat kin n rechtveerdeg man den nog doun?
4 Mor de HEER in zien haaileg hooghoes,
de HEER op zien troon in de hemel,
hai zöcht mit zien ogen vol aandacht,
deur glief van zien ogen keurt hai de mensken.
5 De HEER keurt rechtveerdeg volk en de goddelozen.
Dij geweld bruken, doar het hai n gruwelke ofkeer van. 6 n Regen van vuur en swevel stört hai over heur,
in heur beker zit niks as n störmwind. 7 Want de HEER - zulm rechtveerdeg -
is wies mit wat rechtveerdeg is.
Dij oprecht is, zel zien gezicht ooit n moal zain.
12
Veur meziekmeester. Op wies van: d?Aachtste. n Psaalm van David.
2 Dou wat, HEER, griep in,
der binnen ja hail gain mensken meer,
dij eerlieks binnen en traauw. 3 Ze laigen, elk tegen zien noaber,
mit gladde proat, mit dubbeld haart.
4 HEER, loat ze heur grode mond holden,
snie heur vaalze tongen òf! 5 "Wie worden boas mit ons tongen," zeggen ze.
"Ons grode mond moakt ons boas.
Wèl zol ons aanduren?"
6 "Omdat verschoppelingen schandaaierd worden
en om t geschraif van aarme lu,
kom ik nou in t èn," zegt de HEER.
"Ik zel heur redden geven doar zai noar longern." 7 Woorden van de HEER binnen zuver,
net as zulver, smolten in ovent
en zeuvenmoal zuverd.
8 Denk om heur, HEER,
beschaarm heur tegen dat volk, veur aaltied. 9 Overaal lopt ja goddeloos volk rond,
en maank mensken gript t kwoad om zok tou.
13
Veur meziekmeester. n Psaalm van David.
2 Hou laank nog zel t duren, HEER,
dat ie mie vergeten binnen,
hou laank nog hol ie
joen gezicht veur mie bezied? 3 Hou laank nog mout ik ainzoam
mie zörgen moaken, mit pien in t haart,
dag in, dag oet?
Hou laank nog is mien vijand mie de boas?
4 Kiek noar mie toch, HEER,
mien God, geef mie toch antwoord,
verlicht mien ogen,
dat ik nait votsoes in de dood. 5 k Heur mien vijand ja al roupen:
"k Heb hom versloagen!"
k Heur mien tegenstanders al zingen,
as ik onderoet goa.
6 Op joen laifde vertraauw ik, HEER,
mien haart zel blied wezen en zingen,
omreden ie hebben redden brocht.
Ik zel zingen veur de HEER,
dij is ja goud veur mie, dij het mie hulpen.
14
Veur meziekmeester. Van David.
Onwieze lu denken bie zokzulm:
Der is ja hail gain God.
Verdurven binnen ze, haildaal,
ze doun iezelke dingen,
der is gainain dij deugt. 2 Vanoet de hemel kikt de HEER
deel op menskenkinder om te zain
of ter nog áín bie is mit n helder verstand,
áín dij nog noar God vragt.
3 Mor aalmoal binnen ze ofdwoald,
mitnkander binnen ze verdurven,
der deugt gainain van, haildaal gainain. 4 Hebben dij lu, dij kwoadstichters, den gain verstand?
Ze vreten mien volk op of t brood is,
mor de HEER, dij toalen ze nait meer aan.
5 Den inainen slagt heur schrik om t lief:
God staait ja aan kaant van t rechtveerdeg volk. 6 t Overleg van swakkere lu, doar lagen zai om -
mor eerlieks woar: dij kinnen bie de HEER terecht!
7 Dat redden veur Israël oet Sion kommen mag.
As de HEER n omkeer brengt in t löt van zien volk,
wat zel Jakob den blied wezen, wat zel Israël den feestvieren.
b n Psaalm van David.
HEER, wèl mag in joen tènt te gast wezen,
wèl mag doar wonen op joen haailege baarg?
2 Dij eerlek handelt en oprecht zien weg gaait,
dij vanoet zien haart de woarhaid sprekt. 3 Dij nait aan lasterproat mitdut,
dij n aanderman nait te noa komt
en nait de gugel het mit zien noabers volk.
4 Hai veracht ain, dij zien achten nait weerd is,
mor hai het respekt veur ain, dij ontzag veur de HEER het.
Hai holdt zok aan zien aid, al dut hom t zulm ook schoa. 5 hai laint geld oet en vragt gain rente;
hai let zok nait omkopen tegen onschuldeg volk.
Ain dij zó leeft, dij zel aaltied op n bainen blieven.
16
n Stil gebed van David.
Neem mie toch in beschut, mien God,
bie joe kroep ik in schoel.
2 Tegen joe, HEER, mout ik zeggen:
"Ie binnen mien God, mien gelok,
gaait mie ja niks boven joe oet." 3 Mor tegen de goden in dit laand,
de machtegen, doar ik tegen opkeek, zeg ik: 4 "Wèl achter joe aanlopt, kin n bult verdrait verwachten."
Ik zel veur heur gain bloud meer ovvern,
ik zel heur noam nait meer op lippen nemen.
5 Ie, HEER, t ainegste wat ik heb, beker van mien levent,
ie hebben mien levenslöt in handen. 6 Golden laand is mie toumeten,
mit dat aarfdail bin ik dik tevree.
7 Ik daank de HEER, dij mie road geft,
alderdeegs snaachts radt mie mien gewaiten. 8 Ik hol de HEER aingoal veur ogen,
ik hol hom aan mien rechterzied,
dat ik nait strompeln zel.
9 Doarom bin ik aaid blied in t haart,
doarom zingt mien ziel in mie,
en vuilt mien liggoam zok hier vaaileg. 10 Ie geven mien levent ja nait over aan t dodenriek,
ie loaten joen traauwe knecht nait achter in t graf. 11 Ie wiezen mie de weg noar n levent:
ain en aal bliedschop, stoef bie joe,
in t golden laand en aan joen rechterzied, veur aiweg.
17
n Gebed van David.
Luster, HEER, ik vroag om recht,
geef toch acht op mien kloagen,
heur noar mien beden -
t komt mie aal tou mond oet zunder leugen. 2 Geef ie joen oordail over mie,
joen ogen zain wat oprechthaid is.
3 Ie hebben mie in t haart keken,
ie binnen snaachts bie mie langskommen
en hebben mie beoordaild,
mor ie hebben niks verkeerds vonden -
komt mie ja gain kwoad woord tou mond oet.
4 Hou of aander lu ook leven,
ik heb mie noar joen woord
aaid wied holden
van misdoad en geweld. 5 Ik zet mien vouten in joen spoor,
dat ik nait oetglieden zel.
6 Ik roup joe aan,
ie geven ja antwoord.
Luster noar mie, God,
heur noar mien woorden! 7 Loat mie t wonder van joen traauw zain.
Dij bie joe beschut zuiken tegen heur vijanden,
worden red deur joen rechterhaand.
8 Bewoar mie as t swaarde van joen ogen,
baarg mie bezied in schaar van joen vleugels, 9 veur de goddelozen dij over mie heer willen,
veur de vijanden om mie tou dij mie noar t levent stoan.
10 Heur haart hebben zai ofsloten, dij is zunder gevuil,
zai roupen mit grode monden. 11 Woar ik ook hèngoa, zai binnen hailtied om mie tou,
zai loeren op mie en wachten tot ik oetglie. 12 Ze binnen net n laiw dij ain zöcht om te verscheuren,
net n jonge laiw dij in hinderloag ligt.
13 Kom in t èn, HEER, kom hom haalfweg,
sloag hom tegen de grond.
Verlös mie mit joen sweerd van dij goddeloze, 14 verlös mie mit joen haand, HEER, van dij kerels,
dij allain veur d'overdoad van de wereld leven.
Stop heur t lief vol mit aal wat ie heur overloaten,
loaten heur kinder zok ook volstoppen
en geef aal wat ter nog over is aan heur klaainkinder. 15 Mor loat mie, as mie recht doan wordt, joe in t gezicht zain,
aingoaldeur noar joe kieken as ik wakker wor.
18
Veur meziekmeester. n Laid van David, knecht van de HEER, dij dizze woorden tegen de HEER zee dou de HEER hom red haar oet handen van aal zien vijanden en van Saul. 2 Dat ging zo:
Wat bin ik wies mit joe, HEER, mien staarkte, 3 mit joe, HEER, mien stainrots, mien staarke börg en mien bevrijder,
mit joe, mien God, mien rots, doar ik schoel bie zuiken kin,
woapen, dat mie redt, mien schild, mien kestail. 4 Eer aan de HEER, ik roup hom ja aan
en zodounde wor ik van mien vijanden verlöst.
5 Dood haar mie te pakken,
daipten van verdaarf iesden mie tou, 6 van ale zieden wer ik vastholden mit netten,
ik zat sikkom vaast in strikken van de dood.
7 In benaauwdens raip ik de HEER aan,
ik reerde noar God om mie te helpen.
Hai heurde mien stem vanoet zien pelaais,
mien roupen om hulp kwam hom in d'oren.
8 Dou begunde de wereld te schudden en te schokken,
baargen trilden op heur fonnementen
dat t doaverde, want God wer glìn verbraand, 9 der kwam rook oet zien neus,
en oet zien mond verterend vuur,
zo as van glìnne kolen.
10 Hai dee de hemel open en kwam omdeel,
onder zien vouten was t baalkeduuster, 11 hai ree op n cherub en vloog in volle gaang,
kwam omdeel op vleugels van de wind.
12 Hai muik om zok tou n schaarm van duustern,
van swaart wotter,
van dichte wolken. 13 Der ging n vuurglaans veur hom oet,
wolken werden opjagd, hoagel en glìnne kolen.
14 De HEER luit t dundern vanoet de hemel,
d'Alderhoogste luit zien stem heuren:
hoagel en glìnne kolen. 15 Hai schoot zien pielen òf en juig mien vijanden oetnkander,
mit t weerlichten juig hai heur schrik op hoed.
16 Boom van t wotter kwam te zain,
deur joen draaigementen, HEER,
deur t gebloas van oam oet joen neus,
kwammen fonnementen van vaaste grond bloot te liggen.
17 Hai hulp mie van bovenòf, greep mie bie de kladden
en trok mie noar boven oet dat woeste wotter. 18 Hai verlöste mie zo van mien machtege vijand,
van mien tegenstanders, want dij wazzen staarker as ik.
19 Ze wollen mie te pakken nemen dou ik ter swak veur ston,
mor de HEER was mie tot steun. 20 Hai brochde mie noar boeten op de roemte,
verlöste mie, omdat hai wies mit mie was.
21 De HEER het mie vergolden noar de moat van mien onschuld
en mit t oog op mien schone handen. 22 Want ik heb mie holden aan de wegen van de HEER
en ik bin mien God nait ontraauw worden. 23 Ik heb mie aal zien rechtsregels veur ogen holden
en zien wetten heb ik nooit ofwezen.
24 Aaltied was ik hom haildaal tougedoan,
aaltied heb ik mie woard veur de zunde. 25 De HEER het mie vergolden noar de moat van mien onschuld,
hai haar oog veur mien schone handen.
26 Dij traauw is, doar bin ie traauw veur,
dij oprecht is, doar bin ie oprecht veur. 27 Dij eerlek is, doar bin ie eerlek veur,
dij gemain is, dij kom ie haalfweg.
28 Ie helpen volk, dat vertrapt wordt,
mor dij krop hoog hebben, worden deur joe vernederd. 29 Want ie, HEER, steken mien laamp aan,
ie, mien God, lichten mie in t duustern bie, 30 mit joe störm ik op n leger òf,
mit joe, mien God, spring ik over muren.
31 Weg van God is volmoakt,
t woord van de HEER is zuver.
Hai is n schild veur elk,
dij bie hom schoelt.
32 Wèl nog meer zol God wezen kinnen, behaalve de HEER,
wèl aans is n rots as ons God? 33 t Is dij God, dij mie kracht geft,
dij mien weg begoanboar moakt.
34 Dij mie vouten geft, zo rap as van herten,
dij mie op högten stoan let. 35 Dij mie leert, hou ik mit handen vechten kin,
hou ik n bronzen boog spannen mout.
36 Ie wazzen t schild, dat mie beschaarmde,
joen rechterhaand huil mie in t èn,
joen zörgzoamhaid muik mie staark, 37 ie hebben roem boan veur mie moakt,
zodat ik wieder kon zunder strompeln.
38 Ik zat achter mien vijanden heer en huil heur in
en ik ging nait weerom veurdat ik heur verdoan haar, 39 ik sluig heur deel, ze kwammen nait weer in t èn,
ze bleven veur mien vouten liggen.
40 Ie gavven mie kracht om te vechten,
ie brochten mien tegenstanders veur mie op knijen, 41 ie juigen mien vijanden veur mie op loop,
dij mie hoatten - ik heb ze oetreud.
42 Ze raipen om hulp, mor gainain kwam heur helpen,
ze raipen de HEER aan, mor dij gaf gain antwoord. 43 Ik vergroezelde heur tot stof veur de wind oet,
ik gooide heur as stroatendrek op grond.
44 Ie hebben mie woard veur rebulies maank mien aigen volk,
ie hebben mie aansteld as laaider van dij stammen.
Ik wer boas over n volk dat ik èns nait kon. 45 Zo gaauw ze van mie heurden, bogen ze veur mie,
vremden werden onderdoaneg aan mie, 46 vremd volk haar hail gain krachten meer,
ze trilden as rusken dou ze oet heur schaanzen kwammen.
47 De HEER leeft, geprezen is mien rots,
mien God, mien hulp, is hoog verheven! 48 Dat is mien God, dij mie vroaknemen let,
dij volken veur mie op knijen dwong, 49 dij mie redde van mien vijanden,
dij mie boven mien tegenstanders stelde
en mie verlöste van geweldenoars.
50 Doarom wil ik maank de volken joe priezen, HEER,
veur joen noam zing ik mien psaalms. 51 Ie hebben joen keunenk grode overwinnens geven,
ie hebben joen traauw bewezen aan joen gezaalfde,
aan David en zien noageslacht, veur aiweg en aaltied.
19
Veur meziekmeester. n Psaalm van David.
2 De hemel vertelt van de glorie van God,
t hemelverwulf snaart van t waark van zien handen, 3 elke dag geft t deur aan de dag dij komt,
elke naacht geft aan de naacht dij komt, zien kennes deur.
4 Dat is sproak dij zunder woord is,
dat binnen woorden dij nait heurd worden,
dat is stem zunder geluud. 5 Dij stem gaait over d'haile wereld,
tot t èn van de wereld gaait dij sproak.
Doar het hai n tènt opzet veur de zun, 6 n jonge brudegom dij tou zien koamer oetkomt,
zien boan begunt, zo blied as n staarke jongkerel. 7 Aan ain kaant van de hemel komt hai op,
aan aander kaant is hai kloar mit zien omloop,
niks kin zok beziedstoppen veur zien licht.
8 Zó is de wet van de HEER volmoakt:
dij geft kracht aan mensken veur heur levent.
Zó is t woord van de HEER betraauwboar:
dat schenkt wieshaid aan slicht volk.
9 Opdrachten van de HEER binnen rechtoet:
brengen bliedschop veur t haart.
t Gebod van de HEER is zunnekloar:
n helder licht veur d'ogen.
10 Ontzag veur de HEER is zuver,
holdt stand veur aiweg.
Regels van de HEER binnen betraauwboar,
rechtveerdeg, deur en deur.
11 Kostboarder as gold,
as baargen van t zuverste gold,
en zuiter as hunneg,
as hunneg zo tou roaten oet.
12 Ook ik, joen knecht, loat mie doardeur moanen,
dij zok deraan holdt, wordt goud beloond. 13 Wèl wait nog wat e aalmoal verkeerd doan het?
Zuver mie van zunden, doar ik gain wait van heb.
14 Woar mie, joen knecht, veur hoogmoud,
loat dij over mie nait boas worden,
den zel ik rechtveerdeg wezen
en vrij van grode zunden. 15 Dat mien woorden joe goud bevalen maggen,
mien gedachten joe mooi toulieken,
HEER, mien rots, mien redder.
20
Veur meziekmeester. n Psaalm van David. 2 Dat de HEER joe mor antwoord geven mag
in tieden van benaauwdens,
dat de noam van Jakobs God
joe beschaarmen mag as n hoog kestail, 3 dat hai vanoet zien haailegdom joe hulp sturen mag
en vanoet Sion joe ondersteunen.
4 Dat hai aan aal joen goaven denken mag
en aal joen brandovvers aannemen, sela 5 dat hai joe geft, wat joen haart geern hebben wil
en aal wat ie bedenken, oetkommen let.
6 Wie zellen feestvieren omdat ie red worden,
t voandel swaaien in de noam van ons God.
Dat de HEER aal wat ie begeren, vervullen mag.
7 Ik wait nou hail wis:
de HEER schenkt redden aan zien gezaalfde,
hai geft hom antwoord vanoet zien haailege hemel
en let hom redden deur zien machtege rechterhaand.
8 Gounent vertraauwen op heur striedwoagens,
aandern op heur peerden,
mor wié vertraauwen op de noam van de HEER, ons God. 9 Gounent boegen zok omdeel en valen op grond,
mor wié goan weer stoan en blieven in t èn.
10 Och, HEER, geef de keunenk d'overwinnen,
antwoord ons as wie joe aanroupen!
21
Veur meziekmeester. n Psaalm van David.
2 Wat is de keunenk blied, HEER, om joen kracht,
hai viert feest vanwegens joen overwinnen. 3 Ie gavven hom wat hai van haarten geern wol,
wat zien mond joe vruig, heb ie nait ofwezen. sela
4 Ie kommen hom ja in de muit mit rije zegen
en zetten hom n kroon van zuver gold op kop. 5 t Levent het hai van joe vroagd,
ie hebben hom t geven: tied van leven,
veur aiweg en aaltied.
6 Hai staait hoog aanschreven deur joen overwinnen,
ie hebben hom bekled mit glaans en glorie, 7 ie geven hom ja veur aiweg joen zegen,
ie moaken hom blied as joen ogen op hom rusten.
8 Kiek, HEER, keunenk vertraauwt ja op joe,
hai zel nait oetglieden deur de traauw van d'Alderhoogste.
9 Joen handen zellen joen vijanden te pakken kriegen, aalmoal,
joen rechterhaand zel heur trevven, dij joe hoaten, 10 as ie kwoad en wel der maank kommen, HEER,
loat ie heur den branden as vuur in n ovent.
In joen kwoadhaid zel ie heur verslinden,
zai zellen verteerd worden in n groot vuur. 11 Ie zellen heur kinder op wereld verswinnen loaten,
heur noazoaten maank mensken oetreuden.
12 Al hebben zai n aanslag tegen joe oetbrud,
en al hebben zai n bult kwoad in t zin, t zel heur niks helpen, 13 ie joagen heur ja op loop;
ie richten joen pielenboog op heur.
14 Kom in t èn, HEER, mit aal joen kracht,
wie willen zingen, wie willen joen macht mit psaalms bezingen.
22
Veur meziekmeester. Op wies van: n Hinde bie t rodoagen. n Psaalm van David.
2 Mien God, mien God,
woarom heb ie mie in steek loaten?
Ik schraif t oet, mor ie binnen zó wied vot,
ie helpen mie ja nait. 3 Overdag roup ik: "Mien God!"
mor antwoord geef ie nait.
Snaachts roup ik,
en ook den vind ik gain rust.
4 Ie binnen toch de Haailege,
ie worden droagen in Israëls loflaiden. 5 Op joe hebben ons veurolden vertraauwd,
ze haren vertraauw en ie hebben heur bevrijd. 6 Ze hebben joe aanroupen en ie hebben heur red,
ze hebben op joe vertraauwd
en ze werden nait te schaande moakt.
7 Mor ik, ik bin n wurm; gain mensk meer,
veracht deur elkenain en deur t volk oetlaagd. 8 Elk dij mie zugt, het de gugel mit mie,
stekt tong oet, schudt mit kop en zegt: 9 "Doe vertraauwdest toch op de HEER?
Loat dij die den helpen en die redden.
Hai is ja zo wies mit die!"
10 Ie hebben mie ja tou moekes lief oethoald,
ie hebben mie den bie heur aan bòrst legd. 11 Dou ik geboren wer, vong ie mie op,
van moekes schoot òf aan bin ie mien God.
12 Blief den nait zo van vèrren,
ik heb t ja zo benaauwd
en der is haildaal gainent dij mie helpt. 13 Der staait n haile koppel bollen om mie tou,
woepsterds van bollen oet Basan hebben mie insloten, 14 brollende en verscheurende laiwen
trekken heur bek wied tegen mie open. 15 Ik bin vergraimd as wotter,
oet mekoar valen in lözze bonken,
mien haart is net as was:
t is mie smolten in t lief. 16 Mien keel is mie zo dreug as diggels,
tong plakt mie aan beun van mond vaast,
in t stof van de dood, doar loat ie mie liggen.
17 Der staait n haile tjucht honden om mie tou,
n woeste horde het mie rondomheer insloten,
ze hebben mie deur handen en vouten hèn stoken. 18 Ik kin mien bonken wel tellen, aalmoal wel.
Mor ze bekieken mie mit leedvermoak, 19 ze verdailen mien klaaier onder nkander
en ze lötten om mien overklaid.
20 Blief toch nait zo van vèrren, HEER,
ie binnen mien kracht, kom mie toch helpen. 21 Red mien levent van t sweerd,
red mie oet de macht van dij honden. 22 Red mie oet de bek van zo'n laiw,
beschaarm mie tegen hoorns van dikke bollen.
Ie hebben mie antwoord geven!
23 Doarom zel ik maank ons volk joen noam nuimen,
joen noam priezen in ons gemainschop. 24 Loof de HEER, ie, dij ontzag veur hom hebben,
eer hom, kinder van Jakob,
en ie, noazoaten van Israël, wees beducht veur hom.
25 Hai minacht nait, dij onderdrokt wordt,
hai het gain ofkeer van dij swak is,
hai keert zok nait van heur òf,
mor heurt heur, as ze hom roupen.
26 Veur joe zel ik loflaiden zingen in ons gemainschop,
geloftes dij ik doan heb, zel ik woarmoaken
maank dijent dij ontzag veur joe hebben. 27 Aarmelu zellen zat te eten hebben.
Dij de HEER zuiken, zellen hom eren.
Dat ie mor in aiweghaid leven maggen!
28 Overaal, in ale oethouken van de wereld,
zel men aan de HEER denken en zok noar hom toukeren.
Ale volken in t haaidenschop
zellen zok veur joe deelboegen. 29 t Keunenkriek is van de HEER,
hai regaaiert ja over ale volken.
30 Dij t op wereld goud hebben,
zellen aan toavel aanschikken
en zok veur hom deelboegen.
Ook dij in t graf liggen
en heur levent nait vastholden konden,
zellen veur hom op knijen goan.
31 Heur noazoaten zellen hom dainen
en aan heur kinder zellen ze vertellen van de HEER; 32 aan t volk dat noa heur komt,
zellen ze vertellen van zien rechtveerdeghaid:
"De HEER, dij het t zó doan!"
23
n Psaalm van David.
De HEER is mien hedder,
k heb naargens gain verlet om.
2 Hai let mie ja deelliggen
in mooi gaail gruinlaand.
Hai brengt mie aal zuitjes
noar wotter in rust.
3 Hai geft mie nije kracht,
en laaidt mie langs n vaaileg pad
tot eer van zien noam.
4 Al mos ik in t duustern bie t pad,
ik zol nait baang wezen:
ie binnen ja bie mie,
joen stòk en joen staf,
dij geven mie moud.
5 Ie nuigen mie aan toavel
veur t oog van de vijand,
ie zaalven mie mit eulie,
mien beker lopt over.
6 Gelok en joen laifde binnen om mie tou
zo laank as ik leef,
zo laank as ik leef,
mag ik wonen in t hoes van de HEER.
24
Van David, n psaalm.
t Is aal van de HEER, de wereld mit aal wat doarop leeft,
t vastelaand en elk dij doar woont, 2 hai het heur op zeeën vastzet
en heur vastlegd op revieren.
3 Wèl mag baarg van de HEER opklimmen,
wèl mag op zien haaileg stee stoan? 4 Dij schone handen het en n zuver gewaiten,
dij zok woart veur leugenproat
en gain vaalze aid sweert!
5 Dij zel de zegen van de HEER kriegen
en gerechteghaid van God, zien redder. 6 Dij binnen bestemd veur heur dij joe zuiken,
dij zok tot joe keren ? veur t volk van Jakob. sela
7 Poorten, moak joe wied en hoog,
oll' deuren, moak joe braid en open,
dat de keunenk in volle glorie binnenkomt. 8 Wèl is dij majesteit, dij keunenk?
Dat is de HEER, krachteg en machteg,
de HEER, heldhafteg in t gevecht!
9 Poorten, moak joe wied en hoog,
oll' deuren, moak joe braid en open,
dat de keunenk in volle glorie binnenkomt. 10 Wèl is dij majesteit, dij keunenk?
Dat is de HEER van de hemelse machten,
hái is de keunenk vol majesteit! sela
25
Van David.
HEER, ik heb ja zo?n verlangst noar joe, 2 op joe vertraauw ik, mien God,
moak mie nait te schaande,
loat mien vijanden nait de gugel mit mie hebben. 3 Dij op joe hopen, zéllen ook ja nait te schaande kommen,
mor dij joe achteloos aan zied schoeven,
díj zellen te schaande kommen.
4 Moak mie vertraauwd, HEER, mit joen wegen;
leer mie langs joen pad te goan. 5 Wies mie t pad van joen woarhaid
en onderwies mie.
Ie binnen de God dij mie redt,
op joe blief ik hopen, aal doag vannijs.
6 Denk toch aan joen goudhaid, HEER,
aan joen laifde van tiedstieden heer. 7 Denk nait aan de zunden oet mien bongeljoaren,
aan aal wat ik verkeerd doan heb.
Denk aan mie mit laifde, HEER,
ie binnen ja goud.
8 De HEER is goud en rechtoet,
doarom wist hai zundoars op t rechte pad, 9 beschaaiden lu brengt hai op t goie pad,
hai onderricht heur over zien weg. 10 De wegen van de HEER binnen laifde en woarhaid
veur lu dij zien verbond, zien wetten in acht nemen.
11 Vergeef mie mien schuld, HEER, want dij is groot,
dou dat om joen noam.
12 De HEER leert dijent t rechte pad te kaizen,
dij in ontzag veur hom leeft. 13 Dij zel wonen op n stee doar hom t goud gaait
en zien kinder zellen zien grond as aarfdail kriegen. 14 Lu dij in ontzag veur hom leven,
doar zel de HEER n vertraauwde vrund veur wezen,
zo moakt hai heur bekend mit zien verbond.
15 Ik kiek aingoaldeur oet noar de HEER,
hai zel mien vouten ja oet struup lösmoaken. 16 Kiek toch noar mie om en wees mie genoadeg,
ik bin allain en der mor min aan tou. 17 t Is mie zo benaauwd om t haart,
help mie toch oet dij benaauwdens!
18 Heb oog veur mien ellèn en mien verdrait,
vergeef mie aal mien zunden. 19 Kiek ais houveul vijanden of ik heb,
hou ze mie hoaten mit n iezelke hoat.
20 Beschaarm mien levent en red mie,
moak mie nait te schaande,
ik vertraauw mie ja aan joe tou. 21 Dat onschuld en oprechthaid mie mor laaiden maggen,
ik richt mien hoop en verwachten op joe.
22 O God, verlös Israël,
moak Israël vrij van zien benaauwdens.
26
Van David.
Dou mie recht, HEER,
ik heb nooit n stap verkeerd doan,
op de HEER heb ik baauwd,
nooit bin k oetgleden. 2 Keur mie, HEER, en perbaaier mie oet,
of deugen mien nieren en mien haart, 3 want aaltied staait joen laifde mie veur ogen,
ik dou t zo as ie t willen.
4 Ik hol mie nait op
mit bedraigers en achterbakse lu, 5 ik hoat dij kliek van minhoeden
en zet mie nait deel bie goddelozen.
6 Mien handen zel ik wasken in onschuld,
ik zel om joen altoar lopen, HEER, 7 den zel ik luud n daanklaid heuren loaten
en vertellen van joen wonderdoaden.
8 HEER, t stee van joen hoes,
t woonstee van joen glorie, doar hol ik van. 9 Veeg mie nait op ain bult mit zundoars
en neem mien levent nait mit dat van heur dij bloud vergaiten. 10 Heur handen binnen voel van schandoaden,
heur rechterhaand is vuld deur omkoperij.
11 Mor ik dou nooit n stap verkeerd.
Verlös mie en wees mie genoadeg. 12 Mien vouten, dij stoan op slichte grond,
doar t volk verzoameld is, zel ik joe priezen, HEER.
27
Van David.
De HEER is mien licht en mien redden,
veur wèl zol ik baang wezen?
Bie de HEER bin ik wis van mien levent,
veur wèl zol ik benaauwd wezen?
2 Dou minhoeden achter mie heer wazzen
om mie mit hoed en hoar op te vreten,
- t wazzen mien verdrokkers en vijanden -
dou stroekelden zai en binnen ze valen.
3 Of zol der ook n hail leger op mie ofkommen,
mien haart zol nait benaauwd wezen,
of zol t ook oorlog worden tegen mie,
t vertraauw zol der nait onder lieden.
4 Om ain ding vroag ik de HEER,
om, rondom blied,
de HEER zien vrundelkhaid te zain,
om bie hom te wezen in zien tempel.
5 In minne tieden
mag ik onderdoeken in zien hut,
hai let mie schoelen in zien tènt,
hai tilt mie op n hoge rots.
6 Nou steek ik kop weer op,
boven vijanden oet rondom mie tou,
in zien tènt wil ik ovvern,
hom ovvers brengen mit te joechaaien,
zingen wil ik, psaalms zingen veur de HEER.
7 Heur noar mie, HEER, as ik roup,
wees mie genoadeg en geef mie antwoord. 8 Mien haart het zegd:
"Tou, zuik hom!"
HEER, ik zuik joe, 9 hol joe nait bezied,
wies joen knecht nait oet vergrellens òf.
Ie hebben mien hulp west,
loat mie nait in steek en verloat mie nait,
God, mien redder. 10 Al zollen mien voader en mien mouder mie verloaten,
de HEER nemt mie op. 11 Wies mie joen weg, HEER,
en laaid mie op t rechte pad
om mien vijanden te ontlopen, 12 geef mie nait over aan kuren van mien vijanden.
Vaalze getugen binnen tegen mie opstoan
en bedraaigen mie mit geweld.
13 Ik kin toch wis wezen
dat ik goudhaid van de HEER
zain zel bie mien levent? 14 Wacht op de HEER,
wees staark, bedapper joe,
joa, wacht op de HEER.
28
Van David.
Ik roup om joe, HEER,
mien rots, hol joe nait doof veur mie.
As ie swiegen blieven,
wor ik as ain dij t graf ingaait.
2 Heur noar mien haarde roupen
as ik smeek om hulp,
as ik mien handen omhoogsteek
noar t haailegste van joen haailegdom.
3 Reu mie nait oet mit goddelozen,
mit lu dij onrecht doun,
dij mooi proaten mit heur noabers,
mor in heur haart nait deugen.
4 Dou heur noar heur doaden,
geef heur wat heur toukomt,
noar t waark van heur handen,
loat heur bouten veur wat ze deden. 5 Want zai holden gain reken, HEER, mit joen doaden,
of t waark van joen handen.
Hai slagt heur deel en baauwt heur nait weer op.
6 Te priezen is de HEER,
hai het mien haarde roupen heurd. 7 De HEER is mien kracht en mien schild,
op hom vertraauwt mien haart,
hai het mie hulpen, nou kin mien haart weer jubeln,
hom wil ik priezen in mien laid.
8 De HEER bruukt zien kracht veur zien volk,
hai is n vesting van redden veur zien gezaalfde. 9 Red joen volk en zegen joen aigendom,
wees heur hedder en droag heur veur aaid.
29
n Psaalm van David.
Geef de HEER, ie goden,
geef de HEER de eer en de macht, 2 geef de HEER de eer van zien noam,
boeg joe veur hom deel in t haaileg feestklaid.
3 Stem van de HEER klinkt over t wotter,
God van de eer dij t dundern let,
de HEER over t grootste wotter, 4 stem van de HEER is machteg,
stem van de HEER is prachteg.
5 Stem van de HEER brekt ceders,
stem van de HEER verbriezelt ceders van Libanon. 6 Libanon let hai huppen as n bolkaalf
en Sirjon as t jong van n bol in t wild.
7 Stem van de HEER split vlammen van vuur. 8 Stem van de HEER let woestijn trillen,
de HEER dut woestijn van Kades trillen. 9 Stem van de HEER moakt dat reeën t kaalf vertijen
en bozzen bast verlaizen.
In zien pelaais zeggen ze aalmoal: "Eer!"
10 De HEER het zok deelloaten op troon boven wottervloud,
de HEER dij troont van dou òf as keunenk veur aiweg en aaltied. 11 Mag de HEER zien volk staark moaken
en de HEER zien volk vree as zegen geven.
30
n Psaalm. n Laid bie t inwijden van tempel. Van David.
2 Ik wil joe biezunder priezen, HEER, ie hebben mie omhoog hoald
en mien vijanden nait gund om wil te hebben van mie. 3 HEER, mien God, ik raip joe om hulp
en ie hebben mie beter moakt. 4 HEER, ie hebben mie oet t dodenriek ophoald,
mien levent red dou ik t graf inging.
5 Zing veur de HEER, aal dij hom traauw binnen,
pries zien haailege noam. 6 Zien gram duurt mor ain ogenslag,
zien laifde levenslaank.
Soavends is ter reden tou reren,
smörgens is ter tied om te jubeln.
7 In mien zörgelooshaid zee ik:
"Ik zel nait twieveln, nooit van zien levent." 8 HEER, deur joen gunst ston ik as n baarg,
dou ie nait noar mie omkeken, was ik oetstuur.
9 Om joe roup ik, HEER,
ik smeek, mien Heer, om genoade. 10 Wat heb ie der aan dat ik om haals kom
en dat ik t graf ingoa?
Kin t stof joe sums priezen,
verhoalen van joen traauw?
11 Heur, HEER, en wees mie genoadeg,
HEER, wees mie tou hulp. 12 Ie hebben mien kloagen veraanderd in daanzen,
mie t raauwklaid oetdoan, mie bliedschop aantrokken. 13 Nou zing ik psaalms veur joe,
ik kin mie nait stil holden.
HEER, mien God, ik wil joe veur aaltied priezen.
31
Veur meziekmeester. n Psaalm van David.
2 Bie joe, HEER, zuik ik mien touvlocht,
loat mie nait beschoamd stoan.
Red mie deur joen gerechteghaid, 3 heur mie aan,
verlös mie,
wees veur mie n rots doar ik aaltied schoelen kin,
n vesting om mie te verlözzen.
4 Want mien rots en mien vesting bin ie,
omwille van joen noam zel ie bie mie blieven en mie zörgzoam laaiden, 5 ie hoalen mie oet t vangnet,
dat zai oet t zicht veur mie deelzet hebben.
6 Mien gaist dij leg ik in joen handen,
ie kopen mie vrij, HEER, traauwe God. 7 Dij aarmzoalege ofgoden vereren - dij hoat ik,
ik vertraauw op de HEER.
8 Joechaaien wil ik, mien nocht hebben aan joen traauwe laifde,
want ie bekommern joe om mien ellèn,
benaauwdhaid van mien ziel ontgaait joe nait, 9 ie levern mie nait oet aan mien vijand,
mien vouten kinnen aal kanten aan.
10 Wees mie genoadeg, HEER,
want t is mie baang te moude,
van verdrait verkwient mien oog,
mien ziel, mien liggoam,
11 joa, mien levent wordt vernaild deur verdrait,
mien levensdoagen kommen aan t èn mit zuchten,
mien kracht verspeul ik deur aigen schuld,
mien gebainte verkwient.
12 Ik wor bespot
deur aalmoal dij mie hoaten,
nog meer deur mien noabers.
Ik bin de schrik veur dij mie kennen,
dij mie zain op stroat
moaken dat ze votkommen. 13 Ik bin oet t haart, men is mie vergeten as ain dij dood is,
ik bin worden as n broken vat. 14 Joa, ik heur achterbakse lasterproat van mennegain,
n ofgriezen van ale kanten.
Ze steken koppen bie nkander
as ze plannen smeden om mie dood te moaken.
15 Mor op joe vertraauw ik, HEER,
Ik zeg: "Ie binnen mien God." 16 Hou mie t vergoan zel, ligt in joen haand,
verlös mie oet macht van mien vijanden en mien vervolgers. 17 Loat joen gezicht schienen over joen knecht,
verlös mie in joen traauwe laifde.
18 HEER, loat mie nait te schaande kommen, ik roup joe ja aan,
loat goddelozen te schaande kommen,
stil worden in t dodenriek. 19 Loat heur leugenlippen t spreken vergoan,
dij bretoalweg proaten over rechtveerdege
mit hoogmoud en minachten.
20 Hou groot is t gelok
dat ie aan zied legd hebben
veur heur, dij bie joe heur touvlocht zuiken,
ale mensken wazzen der bie.
21 Ie verstoppen heur in t schoelstee van joen aangezicht
veur lasterproat van mensken,
in n schoelstee
bespoar ie heur kwoaie tongen.
22 De HEER mout wie priezen,
want hai het in zien traauwe laifde n wonder doan
veur mie, in belegerde stad. 23 En wat zee ik, dou k vrezelk baang was:
"Ie willen mie veur joen ogen nait meer zain."
Mor zekerwoar, mien schraiven heb ie heurd,
dou ik joe raip om hulp.
24 Heb hom laif, aalmoal dij hom traauw binnen.
De HEER beschaarmt dij traauw binnen,
mor hai vergeldt in overvloud dij hoogmoudeg binnen. 25 Aalmoal dij wachten op de HEER:
wees staark en moud holden!
32
Van David, n kunsteg laid.
Gelokkeg is ain dij t verkeerde vergeven is,
van wèl zunde bedekt wordt. 2 Gelokkeg is n mensk as de HEER hom zien schuld nait aanrekent,
gelokkeg as in hom gain bedrog touholdt.
3 Dou ik mie stil huil, verkwienden mien bonken
en dee ik haile dag niks as jammern. 4 Want dag en naacht woog joen haand swoar op mie,
mien kracht verswon van hetten bie zummerdag. sela
5 Mien zunde heb ik joe beleden,
mien schuld heb ik nait bedekt.
Ik zee: "Ik beken de HEER mien verzet" -
dou heb ie mien zunde vergeven, mien schuld. sela
6 Doarom, loat vrome lu beden tou joe
in tied van nood.
As t wilde wotter opkomt,
zel t aan heur nait toukommen.
7 Ie binnen n schoelhut veur mie, ie woaren mie veur nood,
en zetten mie rondom in t joechaaien omdat ik ontkommen bin. sela
8 "Ik breng die wieshaid bie en moak die wegwies,
ik geef die road, hol t oog op die. 9 Wees nait dom as n peerd of n ezel,
dij mout men ja bedwingen mit toom en hèlster,
den komt men die nait te noa."
10 Minne lu hebben t slim te verduren,
mor dij op de HEER vertraauwt, het n kring van laifde om zok tou. 11 Wees blied in de HEER en jubel, rechtveerdegen,
rechtschoapen lu, zing oet ale macht.
33
Jubel, rechtveerdeg volk, veur de HEER,
oprechte lu mouten hom wel priezen.
2 Pries de HEER mit liermeziek,
speul veur hom op tiensnoar, 3 zing veur hom joen nij gezang,
mooi speulen, zo haard as t kin!
4 t Woord van de HEER is ja oprecht,
zuver traauw binnen aal zien doaden. 5 Hai is slim wies mit woarhaid en recht,
wereld is vol van zien gunst.
6 Op t woord van de HEER is hemel moakt,
op oam van zien mond ale steerns aan lucht. 7 Hai zammelt zeewotter achter diek,
oceoanen baargt hai op in kelders.
8 Haile wereld mout ontzag hebben veur de HEER,
ale wereldbewoners oet zied goan veur hom, 9 want hai onnaaierde en doar was t,
hai gaf zien odders en doar ston t.
10 De HEER zet plannen van volken aan zied
en holdt tegen wat of ze bedenken, 11 mor zien aigen plan staait veur aaid,
wat hai bedenkt, dat blift van geslacht op geslacht. 12 Gelokkeg is t volk doar de HEER God van is,
t geslacht dat hai as aigen volk oetkozen het. 13 Tou hemel oet kikt de HEER omdeel
en wordt hai ale menskenkinder gewoar.
14 Tou zien woonstee oet het hai oog
op ale mensken in wereld, 15 hai, dij heur haart vörmd het
en acht geft op aal heur doaden.
16 Der is gain keunenk dij t wint deur n staark leger,
gain held dij t redt deur staarke kracht, 17 gain peerd dat aan overwinnen helpt,
aal zien kracht redt joe nait.
18 Mor de HEER het t oog op wèl ontzag veur hom hebben,
op dij wachten op zien traauwe laifde, 19 heur levent redt hai van dood,
heur levent woart hai in tied van hongersnood.
20 Wie wachten vol verlangst op de HEER,
hai is ons hulp en ons schild. 21 Joa wis, ons haart is blied om hom,
zien haailege noam vertraauw wie op.
22 Loat joen gunst, HEER, over ons wezen,
wie verwachten t bloots van joe.
34
Van David, dou hai bie Abimelech net dee of was hai nait wies, en hai eerst votging dou dij hom votjuig.
2 De HEER wil ik priezen, aaltied en aaltied,
mien mond is aingoal vol mit lofzang veur hom. 3 Mit haart en ziel pries ik de HEER,
t ainvoudeg volk zel t heuren en blied wezen.
4 Moak mit mie de HEER groot,
verhoog mit mekoar zien noam. 5 Ik zöchte de HEER en hai gaf mie beschaaid,
hai het mie verlöst van dat wat mie tou iest.
6 Dij bie hom opkieken, stroalen van bliedens,
zokkent worden nait rood om kop van schoamte. 7 Ellèndeg as ik bin, raip ik de HEER,
hai het mie verheurd en red oet aal mien noden.
8 Engel van de HEER beschaarmt as n leger,
hai redt dij hom eren. 9 Pruif, en verneem dat de HEER goud is,
gelokkeg is ain dij bie hom schoelt. 10 Heb, vrome lu, ontzag veur de HEER:
dij hom eert, het naargens verlet om. 11 Jonge laiwen hebben t krap en lieden honger,
mor dij de HEER zuiken, kommen niks tekòrt.
12 Kom kinder, luster noar mie,
ontzag veur de HEER zel ik joe biebrengen. 13 Wèl het wil aan t leven
en wil doagen om t ter van te nemen?
14 Hol tong in toom veur t kwoad
en lippen veur leugentoal. 15 Goa t kwoad oet zied en dou wat goud is,
goa aan zuik noar vree en moak doar waark van.
16 De HEER het open ogen veur rechtveerdege lu
en open oren veur heur roupen om hulp. 17 Hai kikt vergrèld noar minhoeden,
gedachten aan heur wist hai oet.
18 Rechtveerdegen roupen om hulp en de HEER heurt heur,
hai redt heur oet nood. 19 De HEER is bie lu dij haildaal versloagen binnen,
dij mismoudeg binnen, helpt hai der deur.
20 Rechtveerdegen hebben slim te lieden,
mor oet dij rampen redt heur de HEER. 21 Hai woakt alderdeegs over heur gebainte,
der wordt gainain van broken.
22 Goddelozen kommen om deur t kwoad,
hoaters van rechtveerdegen zellen bouten, 23 de HEER koopt t leven van zien knechten vrij,
dij bie hom schoelen huiven nait bouten.
35
Van David.
Keer joe tegen lu dij zok tegen mie keren, o HEER,
strie tegen heur dij tegen mie strieden, 2 griep lutje schild en grode schild
en moak joe kloar om mie te helpen!
3 Bestrie mit speer en heksebiel
dij mie vervolgen.
Zeg tegen mie:
"Ik bin dien redden."
4 Loaten zai zok schoamen en te schaande kommen
dij mie noar t levent stoan,
loaten zai zok terogtrekken en zok schoamen
dij t maal op mie veurzain haren.
5 Loat heur wezen as kaf dat verwaait
as engel van de HEER heur omstöt, 6 loat heur weg duuster wezen en vol bragel
as engel van de HEER heur achtervolgt.
7 Zunder reden hebben zai n vangnet veur mie zet,
zunder reden n koel veur mie groaven. 8 Breng heur in t verdaarf veur zai der aarg in hebben,
loat t vangnet dat zai oet t zicht deelzet haren, heur vangen,
loat heur der zulm in omkommen.
9 Den zel ik joechaaien veur de HEER,
van haarten blied dat hai mie redt. 10 Oet grond van mien haart zel k zeggen:
"HEER, wèl is aan joe geliek?
Ie redden weerlozen van ain dij maanzer is,
weerlozen en aarme lu dij ropt worden."
11 Vaalze getugen kommen tegen mie op
en vroagen mie noar dingen doar ik gain wait van heb. 12 Zai vergelden mie mit kwoad en nait mit goud,
ik stoa der haildaal allain veur.
13 Wat haar ik heur doan?
Terwiel dat zai zaik wazzen, trok ik raauwklaaier aan,
ik pienegde miezulm mit vasten as mien beden nait verheurd wer. 14 Of wazzen t vrunden of bruiers,
ik laip der bie of ik om n mouder raauwde,
doeknekt en in t swaart.
15 Mor dou ik stroekelde, haren zai groot lol,
laipen te hoop en sluigen mie nog veur ik t deur haar,
zai bruukten lastertoal en t ging mor deur; 16 onder nkander hebben zai de gugel mit mie
en doun niks as kniezen.
17 Heer, hou laank blief ie t nog aanzain?
Verlös mie, zai moaken mie dood,
verlös mien kostboare levent van dij jonge laiwen. 18 Den zel ik joe daanken in n grode gemainte,
veur n machteg volk zel ik joe priezen.
19 Loaten mien vijanden, dij leugenbaisten, gain lol om mie hebben,
dij mie om niks hoaten en vaals noar mie loeren, 20 t woord vree komt nait bie heur op,
tegen heur dij stoadeg leven,
moaken zai de gemainste plannen. 21 Ze hebben n grode bek tegen mie,
ze zeggen:
"Most hom ais zain!"
24 Dou mie recht noar gerechteghaid, HEER, mien God,
ie binnen rechtveerdeg,
loaten ze gain lol om mie hebben. 25 Loaten ze nait in heur haart zeggen:
"Ha! Zo haar wie t docht!"
Loaten ze nait zeggen:
"Wie hebben hom verslonden."
26 Loaten zai zok schoamen, mitnkander rood om kop worden
dij nocht hebben aan mien onhaail.
Dat ze mit schoamte en schaande bekled worden
dij mie verlegen en zokzulm verhogen.
27 Loat joechaaien en zok blied moaken
aalmoal dij oetkieken noar gerechteghaid veur mie.
Loat heur aal mor zeggen:
"De HEER is groot,
hai het zien wil aan vree veur zien knecht." 28 Stil veur mie hèn zel ik miemern over joen gerechteghaid,
haile dag joen lof bezingen.
36
Veur meziekmeester. Van David, dainstknecht van de HEER.
2 t Kwoad schuunt goddelozen in,
daip in zien haart staait hom gain ontzag veur God veur ogen. 3 Hai nemt t nait al te naauw,
hai het gain benul van schuld, gain ofkeer van t verkeerde.
4 Hai het mond vol van leugens en bedrog,
wies wezen en gouddoun - doar is e mit opholden, 5 op bèr brudt hai zien leugens oet,
hai gaait verkeerde kaant oet,
t kwoade gaait hai nait oet zied.
6 Joen gunst, o HEER, is hemelhoog,
joen traauw tot aan wolken tou, 7 joen gerechteghaid as hoge baargen,
joen recht zo wied as oceoan,
mensken en daaiern red ie, o HEER.
8 Wat is joen laifde wat weerd, o God,
mensken schoelen in schaar van joen vleugels, 9 zai eten zok zat aan overvloud van joen hoes,
ie loaten heur drinken oet beken van bliedschop, 10 want bie joe is wèl van ale leven,
deur joen licht zain wie licht.
11 Geef aaltied weer joen gunst aan dij joe kennen
en joen gerechteghaid aan dij oprecht van haart binnen. 12 Loat vouten van trötse lu mie nait vertrappen,
loat handen van minne lu mie nait verjoagen. 13 Doar liggen ze, dij minne lu - deelvalen,
deelstöt, ze kinnen nait meer in t èn kommen.
37
Van David.
Wees nait vergrèld op minhoeden,
wees nait ofgunsteg op dij minne dingen doun, 2 zai verdreugen gaauw as gras,
verkommern as t jonge gruin.
3 Vertraauw op de HEER en dou t goie,
woon in t laand en waaid doar vaaileg. 4 Heb joen nocht aan de HEER,
wat joen haand begeert zel hai joe geven.
5 Leg joen levent in handen van de HEER,
vertraauw hom en hai zel t woarmoaken: 6 hai let dien rechtveerdeghaid doagen as t licht,
dien recht as zun dij op t hoogste is.
7 Hol die stil veur de HEER, wacht òf en vertraauw op hom,
moak die nait kwoad om ain dij aaltied gelok het,
om ain dij vaals te waark gaait.
8 Aarger die nait en blief nait glìn in hoed,
moak die nait kwoad, doar wordt t allain mor minder van. 9 Want minhoeden zellen oetreud worden,
mor dij wachten op de HEER, zellen t laand in bezit nemen.
10 Nog even en goddelozen binnen verswonnen,
as je kieken noar heur stee, den binnen ze al vot. 11 Mor dij beschaaiden binnen, doar zel t laand van wezen,
zai zellen heur te goud doun aan vree in overvloud.
12 Goddelozen moaken plannen tegen rechtveerdege,
zai knirzen mit tanden as ze hom zain. 13 De HEER dij laagt om heur,
hai zugt ja dat heur dag kommen zel.
14 Goddelozen hebben t sweerd trokken
en heur bogen spand,
om lu dij aarm en ellèndeg binnen deel te haauwen,
om òf te slachten dij op t goie pad goan. 15 Mor zai valen in heur aigen sweerd,
heur bogen worden broken.
16 t Beetje dat n rechtveerdege het,
is beter as riekdom van verschaaiden goddelozen. 17 Want goddelozen worden aarms broken,
mor de HEER steunt dij rechtveerdeg binnen.
18 De HEER kent doagen van oprechten
en heur bezit zel aiweg bestoan. 19 Zai zellen nait beschoamd worden in minne tieden,
en in doagen van overvloud hebben zai zat eten.
20 Want goddelozen zellen omkommen,
en vijanden van de HEER:
as mooiste slachtlammer zellen zai vergoan, opgoan in rook
21 Goddelozen lainen en betoalen nait weerom,
mor rechtveerdege is genoadeg en rij. 22 Dij deur God zegend binnen, zellen t laand hebben,
mor dij hai vervlökt, zellen oetreud worden.
23 Stappen van ain aan zied van de HEER
binnen bestendeg, hai het zien nocht aan zien loop. 24 As hai vaalt, blift hai nait liggen,
want de HEER holdt hom bie haand.
25 Ik was jonk, en old bin k worden,
ik heb nooit zain dat n rechtveerdege verloaten wer
en zien noageslacht noar brood zuiken mos, 26 haile dag is hai goudgunsteg en laint hai oet
en zien noageslacht is hai tou zegen.
27 Woar joe veur t kwoade en dou t goie,
den zel der aaltied plak veur joe wezen, 28 want de HEER holdt van t recht,
en dij hom traauw binnen let hai nait in steek.
Zai blieven veur aaltied beholden,
mor t noageslacht van zundoars wordt oetreud. 29 Rechtveerdegen zellen t laand hebben
en der wonen, aal heur levensdoagen.
30 Mond van rechtveerdege verkundegt wieshaid,
zien tong sprekt gerechteghaid, 31 wet van God is in zien haart,
hai stroekelt nait over zien aigen vouten.
32 Goddeloze het rechtveerdege in loer,
perbaaiert hom om haals te brengen, 33 mor de HEER let zien haand nait lös,
en let hom nait schuldeg verkloaren.
34 Wacht op de HEER
en neem zien weg in acht,
den zel hai die verhogen mit t laand in bezit te kriegen,
doe zelst beleven dat goddelozen oetreud worden.
35 Ik zag n goddeloze, n tiran,
dij oetwos as weelderge stroekerij; 36 hai kwam verbie en verswon,
ik zöchte hom, mor von hom nait.
37 Kiek oet noar ain dij onschuldeg is, kiek noar dij rechtveerdeg is:
t èn van dizze man zel vree wezen. 38 Mor zundoars worden op rieg weg oetreud,
t èn van goddelozen is oetreud worden.
39 Rechtveerdegen worden red deur de HEER,
heur touvlocht in tied van nood. 40 De HEER het heur aaltied hulpen en in vaaileghaid brocht,
hai zel heur in vaaileghaid brengen veur goddelozen en heur redden,
want bie hom zuiken zai touvlocht.
38
n Psaalm van David, om te gedenken.
2 HEER, bestraf mie nait in joen glìnneghaid,
sloag mie nait in joen grammiedeghaid. 3 Joen pielen steken daip in mie,
en joen haand is op mie deelkommen.
4 Deur joen oordail is aan mien liggoam niks meer geef,
om mien zunde doun ale bonken mie zeer. 5 Mien schuld gruit mie boven kop,
as n dik pak, te swoar veur mie.
6 Mien wonden swèllen en stinken
om mien dwoashaid. 7 Ik bin der min aan tou, ik loop ter krom van,
ik loop haile dag in raauw.
8 Heupen stoan mie in brand,
aan mien liggoam is niks meer geef, 9 ik bin aan t èn, zuver kepot,
ik roup t oet omdat t haart tekeergaait.
10 Heer, ie kennen aal mien verlangens,
mien zuchten is veur joe nait verburgen, 11 mien haart gaait te keer, mien kracht vluit vot,
t licht van mien ogen verdwient.
12 Mien vrunden en mien dikste kammeroaden
blieven wied van mien ploag vandoan,
mien femilie blift op ofstand. 13 Dij loeren op mien levent zetten strikken,
dij oet binnen op mien ongelok hebben t over onhaail,
haile dag flustern ze leugentoal.
14 Mor ik, ik hol mie doof en wil nait heuren,
of was ik stom, ik dee mien mond nait open, 15 ik dou net of ik nait heuren kin,
ain dij gain verweer het.
16 Want HEER, van joe verwacht ik t,
ie geven antwoord, Heer, mien God. 17 Ik denk bie miezulm: Loat ze nait de gugel mit mie hebben,
gain dikke proat over mie as ik stroekel.
18 Want ik zai miezulm al stroekeln,
ik bin nooit zunder pien. 19 Joa, ik wil mien schuld belieden,
ik zit in over mien zunde.
20 Mor mien vijanden, dij leven, zai binnen talriek,
zai binnen mit n haile bult, dij mie zunder reden hoaten. 21 Zai vergelden goud mit kwoad,
ze binnen vijandeg tegen mie, aalhouwel ik t goud doun wil.
22 Loat mie nait in steek, HEER,
mien God, blief nait op ofstand. 23 Kom gaauw om mie te helpen,
Heer, dij mie redden dut.
39
Veur meziekmeester. Veur Jedutun. n Psaalm van David.
2 Ik nam mie veur: ik wil mie der veur woaren,
dat ik zundeg mit mien tong;
ik zel mien mond bewoaken mit n moelkörf,
as nog ain goddeloze bie mie touholdt.
3 Ik huil mie stom, ik zee gain woord,
ik sweeg, mor helpen dee t nait,
en mien verdrait wer aal slimmer. 4 Mien haart wer mie hait in t lief
en deur mien gepoest, begunde vuur te branden,
deur mien tong kwam ik tot spreken:
5 "Geef mie wait, HEER, van mien èn,
en wat is moat van mien doagen?
Den wait ik hou vergankelk ik bin." 6 Mien doagen heb ie mit handbraiten oetzet,
hou laank ik leef, dat dut joe niks,
n zuchtje wind geliek, zo staait elk mensk der veur, sela 7 de mensk dij komt en gaait ja as n schim,
n ongedureg poestje wind,
hai zammelt wat en wait nait wèl dat touvalen zel.
8 Woar is, o Heer, t wachten nou nog op?
Mien hoop dij is op joe. 9 Red mie van aal mien zunden,
bespoar mie t schimpen van goddelozen.
10 Ik bin riddersloagen, dou gain mond meer open,
want ie hebben t ommaans. 11 Schaai toch oet mit mie te kwellen,
ik bin besweken deur joen toudoun. 12 Ie wiezen ain terecht deur hom te stravven om de zunde,
en doar hai t mainste onder te doun het,
verteer ie as n kleermòt. sela
13 Heur mien beden, HEER,
en lain joen oor aan mien roupen om hulp,
hol joe nait doof veur mien verdrait,
ik bin ja n vremde bie joe,
ik woon bie joe in, net as mien veurolders. 14 Let nait op mie,
den zel ik blied worden,
veurdat ik goa en der nait meer bin.
40
Veur meziekmeester. Van David, n psaalm.
2 Ik heb mor wacht en wacht op de HEER,
dou boog hai zok noar mie tou,
hai heurde mien hulpgeroup. 3 Hai tilde mie omhoog oet n verloaten put,
oet bragel en sliek.
Hai zette mie mit vouten op rotsgrond,
en gaf mien vouten vasteghaid.
4 Hai legde mie n nij laid in mond,
n lofzang veur ons God.
Dat n bult mensken t zain en ontzag kriegen
en vertraauwen op de HEER.
5 Gelokkeg is ain
dij zien vertraauwen op de HEER stelt,
en zok nait ofgeft
mit lewaaischoppers en leugenputen.
6 Wat heb ie n bult doan,
o HEER, mien God:
joen wonderdoaden, joen veurnemens mit ons.
Gainain is mit joe te vergelieken!
Wol ik t onder woorden brengen,
t is te veul om op te nuimen.
7 Aan slachtovvers en meelovvers heb ie gain wil,
- mien dove oren heb ie openmoakt -,
brandovvers en schuldovvers vroag ie nait om. 8 Dou zee ik: "Hier bin ik,
in boukrol is over mie schreven." 9 Om te doun wat ie willen, mien God, doar heb ik wil aan,
joen onderricht droag ik in mie om.
10 As der n bult volk bie nkander is,
vertel ik van joen gerechteghaid,
ik kin mie der nait stil over holden,
ie waiten t, HEER.
11 Joen rechtveerdeghaid hol ik nait veur mie,
over joen traauw en verlözzen heb ik t.
Joen laifde en betraauwboarhaid
getuug ik van bie n bult volk.
12 Ie, HEER,
holden joen ontfaarmen nait bie mie vandoan,
joen traauwe laifde en joen betraauwboarhaid
zellen mie aaid bewoaren.
13 Rampen hebben mie omsingeld,
nait te tellen,
mien zunden zitten mie op nek,
ik bin der schoon mit aan,
t binnen meer as hoaren op mien kop,
ik heb moud verloren.
14 O HEER, wil mie redden,
o HEER, kom mie te hulp!
15 Loaten beschoamd worden
en veur schaande stoan,
dij der op oet binnen
om mie kepot te moaken, 16 loaten beschoamd zok wieken, dij nocht hebben aan mien ongelok,
loaten ze huvern van schoamte, dij mie oetsliepen.
17 Dij joe zuiken,
zellen lagen en blied wezen,
dij van joe verlözzen verwachten,
zellen aingoal zeggen:
"De HEER is groot."
18 En ik, ellèndeg en aarm bin ik,
mien Heer zel aan mie denken,
mien helper en bevrijder bin ie,
mien God, nait laanger wachten!
41
Veur meziekmeester. n Psaalm van David.
2 Gelokkeg dij ain in nood mit wieshaid helpt;
op dag van onhaail zel de HEER hom redden, 3 de HEER zel hom bewoaren en in t levent holden,
men zel hom in t haile laand gelokkeg nuimen.
"Lever hom nait oet aan zien vijanden!" 4 De HEER zel hom stiepen as hai zaik deelligt:
as e zaik op bèr ligt, moak ie hom weer zond.
5 Ik zeg: "O HEER, wees mie genoadeg,
moak mie beter, want ik heb tegen joe zundegd." 6 Mien vijanden proaten onhaail over mie:
"Wanneer zel hai staarven en zel zien noam verdwienen?" 7 As der ain komt om te kieken, sprekt zien haart bedrog,
zien minne gedachten kropt hai op,
en as hai den in boeten is, kroamt hai ze der oet.
8 Ze hebben t aalmoal op mie tegen,
aal dij mie hoaten, smoezen over mie,
ze denken mie t grootste onhaail tou: 9 "n Verkeerde kwoal kreeg hom te pakken,
zodat hai deelligt en nait weer opstoan zel." 10 Mien beste vrund alderdeegs,
dij ik vertraauwde en doar ik mien brood mit dailde,
het zok tegen mie keerd.
11 Mor, HEER, wees ie mie genoadeg, moak dat ik weer in t èn kom,
en ik zel op heur t verhoalen. 12 Zo zel ik waiten dat ie nocht aan mie hebben:
mien vijand zel nooit meer viktorie over mie kraaien, 13 ie stoan mie bie, omdat ik onschuldeg bin,
en loaten mie veurgoud bie joe wonen.
14 Pries de HEER, de God van Israël,
van aiweghaid tot aiweghaid.
Amen, amen.
23