Predeker 12

t Ènd van t laid

⁸ t Is aal lucht, loos en leeg, zegt Predeker,
en van gain betaiken.

⁹ Predeker zulm was n wies man; doarbie het hai t volk n bult kennes biebrocht. Hai het onderzöcht, wikt en wogen en veul spreuken bie nkander op schrift stèld. ¹⁰ Predeker het zöcht noar spreuken, dij mìnsken aanspreken en dij woarhaid onder woorden brengen. ¹¹ Woorden van wieze lu binnen schaarp as prikken, as spiekers, vaastzet deur verzoameloars; dij spreuken binnen ons deur aín hedder aanlangd.
¹² En boetendes, mien zeun, wees hierop verdocht: aan boukenschrieverij komt gain ènd en van aal dat geleer wordt n mìnsk doodmuid. ¹³ Aal wastoe heurd hest, komt hierop deel: heb ontzag veur God en hol rekenschop mit zien geboden; doar komt t veur n mìnsk op aan. ¹⁴ Want over aal wastoe dust, ook wat nait aan t licht komt, of t nou goud is of verkeerd, zel God zien oordail geven.