Predeker 11

Dij woagt, wint

¹ Streu dien brood mor op t wotter; noa n zet laank kinstoe t ja wel weeromvinden. ² Verdail dien geld en goud in zeuven of acht pozzies; kinst nooit waiten wat veur rampen de wereld nog te wachten stoan. ³ As wolken vol wotter zitten, gaiten ze dat oet over t laand. n Boom kin noar t noorden tou omvalen of noar t zuden tou, mor woaras e vaalt, doar blift e liggen. ⁴ Ain dij aalmor acht geft op de wind, komt aan t zaaien nait tou; dij aalmor noar de wolken kikt, komt nait aan t maaien. ⁵ Doe waist hail nait oet wat houk de wind waait, doe waist hail nait hou t leven gruit in t lief van n swangere vraauw, net zo waistoe hail niks van t waark van God dij t ales moakt het. ⁶ Begun smörgens op tied te zaaien en gun dien handen gain rust tot aan oavend tou; doe waist ja hail nait of t zoad aine moal goud opkomt of aander moal; t kin ook baaide keren goud wezen.