Predeker 10

Van onverstand kommen ongelukken

⁴ As n bovenboas tegen die tekeer gaait, most nait votlopen. Hol die kaalm veurdat ter wat misgaait. ⁵ Ik heb nog meer verkeerds zain onder de zun; n fout dij bovenboazen ieder bod vannijs moaken: n mizze boudel. ⁶ Onwiezen worden op hoge posten zet, en kundege lu zitten op achterste rieg. ⁷ Ik heb knechten zain dij hoog op peerd zatten en veurnoame lu dij - net as knechten - lopen mozzen.
⁸ Dij n koel graft, kin der in valen; dij n stainen muur sleupt, kin deur n slang beten worden. ⁹ Dij stainen kapt, kin zok ter zeer aan doun; dij holt kleuft, lopt ook gevoar. ¹⁰ As n stompe biel nait slepen wordt, mostoe veul te veul kracht zetten; hest meer veurdail astoe dien verstand bruukst. ¹¹ As n slang bit veurdat e besworen is, kin n besweerder nait veul meer oetrichten.
¹² Oetsproaken van n wies man binnen die mooi tou, mor n onwieze komt deur zien geplaas in t ongelok. ¹³ In t begun liekt t nog gewoon gekwedel, mor aan t ènd is t boare onzin. ¹⁴ n Onwieze kwedelt aal mor deur, mor is ja gain mìnsk, dij wait wat ter komt. Wèl kin hom vertellen, wat ter noa zien dood gebeurt? ¹⁵ n Onwieze knooit mor wat aan en wordt ter muid bie, mor hai wait èns nait, hou of e in stad kommen mout.