Obadja 1

Obadja

¹ Openboaren aan Obadja.
De Here HERE zegt over Edom:
"Wie hebben tieden van de Here kregen
en n bode is onder volken stuurd:
'Komt in t èn om tegen Edom te strieden!'
² Heurt aan:
Ik zel joe klaain moaken onder de volken,
ie zellen daip veracht worden.
³ Joen aigen grootseghaid het joe op biesterboan brocht.
Ie, dij hoog wonen in spleten van ròtsen
en bie joezulm zeggen:
'Wèl zel mie der onder kriegen?'
⁴ Al zol ie joen nust ook zo hoog baauwen as n gier,
al muik ie joen nust maank steerns,
Ik zel joe der wegroppen,"
zegt t woord van de HERE.
⁵ "As ter daiven of rovers
bie naacht bie joe binnen drongen wazzen
- al zol ie ook n bult kwiet worden wezen -
zollen zai meer stolen hebben as wat zai neudeg haren?
As droevenplukkers bie joe kwammen,
zollen ze nait wat overloaten veur noapluk?
⁶ Mor wat wordt Esau plunderd!
Zien gehaaime schatkoamers worden alderdeegs leeghoald.
⁷ Aal joen bondgenoten zetten joe grens over
en joen vrunden binnen joe te maans.
Dij joen brood eten, leggen joe n vaalstrik.
Der is gain inzicht meer in Edom."
⁸ Zo zegt de HERE:
"Op dij dag zel Ik wiezen van Edom oetreuden
en wieshaid in baargen van Esau.
⁹ Joen helden, o Teman, zel schrik zo op hoed valen
dat elk oet baargen van Esau om haals brocht wordt.
¹⁰ Om t geweld dat ie joen bruier Joakob aandoan hebben,
zel der schaande over joe kommen
en zel ie veur aaid oetreud worden.
¹¹ Ie hebben joe ofziedeg holden
op dag dat vremden zien riekdommen votnammen
en lu oet aander landen lötten om Jeruzelem.
Ie wazzen ain mit heur.
¹² Over dag van joen bruiers heur neerloag
haar ie joe nait blied moaken mogt.
Ie haren gain grode mond hebben mouten
over kinder van Judoa
op dag van heur ongeluk.
¹³ Ie haren nait in poort van mien volk kommen mouten
op dag van heur neerloag.
Ie haren de spotters nait volgen mouten
op dag van heur ongeluk.
Ie haren joen handen nait noar heur grond oetsteken mouten
op dag van heur ongeluk.
¹⁴ Ie haren nait op vaaiersprongen stoan mouten
om vluchtelingen om te brengen.
En dij ontkommen wazzen
haar ie nait oetlevern mouten
in dij benaauwde tied.
¹⁵ Want dag van de HERE is stoefbie
over ale volken.
Zo as ie doan hebben,
zel joe doan worden!
¹⁶ Want zo as ie dronken hebben
op mien haailege baarg,
zo zellen ale volken mor deurdrinken.
Joa, zai zellen zoepen en swelgen.
t Zel wezen of haren ze nooit bestoan.
¹⁷ Mor op baarg Sion zellen zaí wezen dij ontkommen binnen
en t zel n haailegdom wezen.
t Volk van Joakob zel zien aigendommen weerom kriegen.
¹⁸ t Volk van Joakob zel t vuur wezen
en t volk van Jozef vlam,
t volk van Esau stoppels
dij ze aansteken zellen en opbranden.
Van Edom zien volk ontkomt gain ain."
Zo het de HERE t zegd.
¹⁹ "Den zel t Zuderlaand
t baarglaand van Esau in bezit nemen
en t lege kustlaand van Filistijnen.
t Laand van Efraïm
en t laand van Samerioa
zel van heur wezen.
En Gilead van Benjamin.
²⁰ Ballingen van dit leger,
veurzover t Izrelieten binnen,
zellen t laand van Kananieten in bezit nemen
tot aan Sarefat tou.
Ballingen van Jeruzelem
dij in Sefarad binnen,
zellen steden van t Zuderlaand in bezit nemen. ¹
²¹ Bevrijders zellen baarg Sion opgoan
om te richten ²
over t baarglaand van Esau.
En de HERE zel keunenk wezen."