Nehemia 8

Loofhuttenfeest

¹³ Aanderdoags kwammen femilie-oldsten van t haile volk, ale priesters en Levieten bie Ezra, de schriftgeleerde, bie nkander om zok te verdaipen in de woorden van de wet. ¹⁴ Zo kwammen ze te waiten, dat in de wet dij de HEER deur Mozes aan heur oplegd haar, aantaikend ston, dat d'Israëlieten op t feest in de zeuvende moand in loofhutten wonen mozzen. ¹⁵ Ze mozzen in Jeruzalem en in aal aander steden omroupen loaten: "Trekt baargen in en hoalt joe doar takken van olievebomen, van d'oleaster en de mirt, van de paalm- en aandere loofbomen, om joe loofhutten te moaken, zo as t veurschreven is." ¹⁶ t Volk gong hèn en huil zok dij takken en muik zok doar loofhutten van boven op t dak of op binnenploats, op tempelplaainen of op t plaain bie Wotterpoort of bie d'Efraïmpoort. ¹⁷ En dij haile gemainschop van weeromkeerde ballengs muik zok loofhutten en gong in dij hutten wonen. Dat haren Israëlieten van tied van Jozua, zeun van Nun, òf aan tot dij dag aan tou nait meer doan. Dou wer t doar groot feest. ¹⁸ En aal doag, van d'eerste tot d'leste dag, wer der oet Gods wetbouk veurlezen. t Feest duurde zeuven doag en op d'aachtste dag haren ze nog n leste feestvergoadern, zo as t veurschrift was.