Nehemia 8

Wet wordt veurlezen

¹ In t begun van de zeuvende moand, dou ale Israëlieten in heur steden woonden, kwam aal t volk zunder oetzundern bie nkander op t plaain veur Wotterpoort. Ze vruigen dou aan Ezra, de schriftgeleerde, om t bouk op te hoalen van de wet, dij de HEER deur Mozes aan Israël oplegd haar. ² Op dij eerste dag van de zeuvende moand brochde priester Ezra dat wetbouk op dij vergoadern van ale manlu en vraauwlu en van elk dij t volgen kon. ³ Op t plaain veur Wotterpoort leesde hai manlu en vraauwlu en elk dij t begriepen kon oet t bouk veur, vanòf dat t licht wer tot aan nommerdag tou. En aal t volk lusterde vol aandacht noar t bouk van de wet.
⁴ Ezra, de schriftgeleerde, was bovenop n holten platvörm stoan goan, dij veur dij gelegenhaid timmerd was. En noast hom aan rechterkaant stonden Mattitja, Sema, Anaja, Uria, Chilkia en Maäseja en aan linkerkaant Pedaja, Misaël, Malkia, Chasum, Chasbaddana, Zecharja en Mesullam. ⁵ Ezra dee t bouk open en elk kon t zain; hai ston ja hoger as zai. En dou e t bouk opendee, gong aal t volk stoan. ⁶ Ezra prees de HEER, de grode God, en aal t volk stook aarms in de lucht en raip: "Amen, amen!" Ze gongen op knijen en ze beedden tou de HEER mit t gezicht omdeel. ⁷ En dou ze weer stoan goan wazzen, wer aan t volk de wet oetlegd deur de Levieten Jesua, Bani, Serebja, Jamin, Akkub, Sabbetai, Hodia, Maäseja, Kelita, Azarja, Jozabad, Chanan en Pelaja. ⁸ Ze leesden de wet van God dudelk veur oet t bouk en ze gavven oetleg van tekst en inhold, zodat elk begriepen kon wat of heur veurlezen was. ⁹ Landvoogd Nehemia, priester en schriftgeleerde Ezra en de Levieten dij t volk ales oetlegd haren, zeden tegen heur: "Dit is n boetengewone dag, dij touwijd is aan de HEER joen God. Schraift mor nait, zit nait in treur!" Want aal t volk ston te schraiven, dou de wet aan heur veurlezen wer. ¹⁰ "Goat noar hoes tou! Goat lekker eten en drinken, en brengt ook wat bie lu dij niks hebben, want dizze dag is aan ons HEER touwijd. Weest nait verdraiteg, want de bliedschop dij de HEER joe geft, dat is joen kracht." ¹¹ En Levieten kregen aal t volk weer rusteg, mit t zeggen van: "Weest stil en zit nait in treur, want dit is n boetengewone dag." ¹² Dou gong aal t volk noar hoes tou om te eten en te drinken; ze brochten ook wat noar lu dij niks haren en ze muiken groot feest. Ze haren goud begrepen wat heur al oetlegd was.