Nehemia 6

Meer tegenwaarken

¹ Sanballat, Tobia, d'Arabier Gesem en ale aandere vijanden van ons heurden, dat ik muur weer kloarmoakt haar en dat ter gain minne steeën meer in zatten; mor ik haar tot dij tied nog gain deuren in poorten hongen. ² Sanballat en Gesem stuurden mie dou n bosschop: "Loat ons ais bie nkander kommen in Kefirim in t Onodaal." Mor ze haren nait veul deegs mit mie in t zin. ³ Doarom stuurde ik bosschoplopers noar heur tou mit dit antwoord: "Ik heb n dik kerwaai onder handen en ik kin t nait wachten om te kommen. Woarom zol ik ter bie vandoan lopen om noar joe tou te goan? Den ligt t waark ja stil!" ⁴ Vaaiermoal stuurden ze mie dij aigenste bosschop, mor ik gaf heur aingoal t aigenste antwoord. ⁵ Dou stuurde Sanballat mie veur de viefde moal zien knecht, dij diskeer n open braif in handen haar. ⁶ Doar ston in:
"Der wordt maank t volk verteld - en Gesem zegt, dat t woar is, - dat ie t mit Jeuden in t zin hebben om in opstand te kommen en dat ie doarom dij muur weer kloar moaken. Wordt ook zegd, dat ie den keunenk worden willen. ⁷ Ie zollen alderdeegs profeten in Jeruzalem aansteld hebben om over joe te verkundegen, dat ter weer n keunenk in Juda is. Aal zok zoaken komt de keunenk vanzulm ook te waiten; doarom liekt mie t goud, dat wie ais mit nkander proaten."
⁸ Ik stuurde hom bericht weerom: "Aal wat ie doar zeggen, is niks van woar; dat heb ie bie joezulm opbedocht." ⁹ Dat volk perbaaierde ons schrik op hoed te joagen, want - dochten zai - den zol wie handen nait bie t waark holden kinnen en den zol t nooit kloar kommen. Nou kwam ter op aan om stief deur te zetten.
¹⁰ Dou ik op n moal bie Semaja in zien hoes kwam ? hai is ja n zeun van Delaja, dij weer ain van Mehetabel is ? stelde dij veur:
"Loat wie mit ons baaident noar t hoes van God goan,
in tempel,
en deuren op slöt doun:
Ze willen joe ja doodmoaken,
ze willen joe vannaacht al om haals brengen."
¹¹ Mor ik zee tegen hom: "Zol n man as ik op de loop goan? Hou zol ain as ik in tempel goan kinnen en ter leventeg ofbrengen? Doar goa ik vervaast nait hèn!" ¹² Want ik vernam wel, dat God hom nait stuurd haar. Hai was deur Tobia en Sanballat inhuurd om n profetisch verhoal tegen mie te holden. ¹³ Ze haren hom inhuurd om mie schrik op hoed te joagen en mie oet benaauwdens zundegen te loaten. Den konden ze mie n minne noam bezörgen, zodat ze mie in opsproak brengen konden. ¹⁴ Denk toch, mien God, bie Tobia en Sanballat om wat ze aanrichten wollen en vergeet de profetes Noädja en dij aander profeten nait, dij perbaaierd hebben om mie baang te moaken.
¹⁵ Muur was op n vieventwinnegsten van elulmoand kloar; der was twijenfiefteg doag aan waarkt. ¹⁶ Dou aal ons vijanden dit heurden en aal t omwonend volk dat ook zag, vuil t heur slim òf. Ze mozzen dou toch wel tougeven, dat dit waark mit hulp van God kloarmoakt was.
¹⁷ Mor der wazzen dou ook veurnoame Jeuden, dij over en weer braiven schreven mit Tobia. ¹⁸ Der wazzen nogaal wat aanhangers in Juda deur n aid aan hom verbonden, want hai was n schoonzeun van Sechanja, dij weer n zeun van Arach was, en zien zeun Jochanan was traauwd mit n dochter van Mesullam, n zeun van Berechja. ¹⁹ Ze snaarden over hom, woar ik bie was en brochten hom weer over, wat ik ter van zegd haar. Tobia stuurde mie den weer braiven om mie baang te moaken.

7
1 Dou de muur haildaal kloar was en ik deuren derin hongen haar, werden poortwachters en tempelzangers aansteld en kregen Levieten heur toak touwezen. 2 t Bestuur over Jeruzalem druig ik op aan mien bruier Chanani en aan Chananja, overste van de vesting, want dij ston bekend as deur en deur betraauwboar en godvrezend, meer as n hail bult aandern. 3 Ik zee tegen heur: "Poorten van Jeruzalem maggen nait open, veurdat zun op t haitst is; deuren mouten dichtdoan en vergrundeld worden as t wachtvolk nog op post is. En ook mout ie börgers van Jeruzalem op wacht zetten, elk bie zien aigen hoes." 4 Stad was groot en oetgestrekt, mor der woonde nait veul volk en der wazzen hoast gain hoezen baauwd. Op ingeven van mien God raip ik notoabeln, bestuurders van de stad en aal t volk bie nkander om zok 5 in geslachtsregisters inschrieven te loaten. Zo von ik t register van ballengs dij t eerste oet Babel weeromkommen wazzen en doar ston in: