Nehemia 3

Reperoatsies aan stadsmuur

¹ Dou begunde Eljasib, de hogepriester, mit zien kollegoa-priesters Schoappoort weer op te baauwen. Ze wijdden poort in en hongen deuren der in; ook t gedailte tussen Meatoorn en Chananeltoorn wer inwijd. ² Noast heur wazzen de manlu van Jericho mit n muurpaand aan t oetstokken en doarnoast was Zakkur, Imri zien zeun, aan t baauwen. ³ Vispoort wer weer opbaauwd deur t volk van Senaä; zai timmerden n beun op zolderbaalken en hongen deuren in de stielen mit sloetbaalk en grondels en aal. ⁴ Even wiederop was Meremot aan t baauwen; hai was n zeun van Uria, dij weer ain van Hakkos was. Doarnoast was Mesullam aan gaang, zeun van Berechja, dij ain van Mesezabel was; en nog wat wiederop Sadok, Baäna zien zeun. ⁵ Doar weer noast was t volk oet Tekoä aan t waark, mor notoabeln van dij stad wollen heur scholders nait onder t waark van heur heer zetten. ⁶ d'Ol Poort wer opbaauwd deur Jojada, Paseach zien zeun en Mesullam, Besodja zien zeun; ze timmerden n beun op zolderbaalken en hongen deuren in de stielen mit sloetbaalk en grondels en aal. ⁷ Doarnoast wazzen Melatja oet Gibeon en Jadon oet Meronot en wieder t volk van Gibeon en Mispa aan t waark, oet kontrainen dij onder permoters stonden van landvoogd van aanderkaant Eufraat. ⁸ Doarnoast was Uzziël, Charhaja zien zeun, aan t waark; hai was bie t goldsmeden. Wieder Chananja, n zaalfmoaker. Zai muiken Jeruzalem weer kloar tot Braide Muur aan tou. ⁹ Noast heur was Refaja, n zeun van Chur, aan t waark; hai was olderman van n haalve kluft van Jeruzalem. ¹⁰ Doarnoast ston Jedaja, n zeun van Charumaf te waarken, liek tegen zien aigen hoes over. Chattus, n zeun van Chasabneja, ston noast hom. ¹¹ n Twijde stok wer onder handen nomen deur Malkia, Charim zien zeun, en Chassub, zeun van Pachat-Moäb; doar heurde Bakoventoorn ook bie. ¹² Noast heur was Sallum aan t waark, mit zien dochters; hai was n zeun van Halloches en olderman van d'aander haalfschaid van de kluft van Jeruzalem. ¹³ Daalpoort wer weer kloarmoakt deur Chanun en t volk oet Zanoäch. Zai baauwden poort vannijs op en hongen deuren in de stielen mit n sloetbaalk en grondels. Boetendes stoapelden zai de muur weer op over n lengte van doezend èl, tot aan Drekpoort tou. ¹⁴ Drekpoort zulm wer weer moakt deur Malkia, Rechab zien zeun, olderman van kluft Bet-Hakkerem; hai baauwde poort weer op en hong der deuren in mit n sloetbaalk en grondels. ¹⁵ Wèlpoort wer hersteld deur Sallum, zeun van Kolchoze; hai was olderman van kluft Mispa. Hai baauwde poort vannijs op, zette der n nij dak op en hong der deuren in mit n sloetbaalk en grondels. Boetendes muik hai muur van de wotteropslag bie keunenk zien toen weer kloar, tot onderaan de trappen van Davidstad. ¹⁶ Wiederop was Nechemja aan t waark; hai was n zeun van Azbuk en hai was olderman van haalfschaid van kluft Bet-Sur. Hai muik de muur tegen groaven van David over weer kloar, tot aan de nij groaven viever en tot aan soldoatenkezerne. ¹⁷ Levieten wazzen wiederop aan gaang: Rechum, de zeun van Bani, en noast hom veur zien kluft Chasabja, olderman van aine helft van kluft Keïla. ¹⁸ Even wieder wazzen heur stamgenoten aan t waark: Binnuï, zeun van Chenadad en olderman van d'aander haalfschaid van kluft Keïla ¹⁹ en noast hom Ezer, Jesua zien zeun en olderman van Mispa; hai haar zien paand tot aan Punt woar d'opgang noar t woapenhoes was. ²⁰ Doar weer noast ston Baruch, Zabbai zien zeun, verniend te timmern van Punt òf aan tot aan d'inrit van hogepriester Eljasib zien hoes. ²¹ Nog weer wiederop was Meremot, zeun van Uria, dij ain van Hakkos was, aan t oetstokken mit zien paand van d'inrit van Eljasib zien hoes òf aan tot aan t èn van Eljasib zien haim. ²² En nog wieder wazzen priesters aan t waark, dij in Jordaanleegte wonen. ²³ Benjamin en Chassub wazzen muur tegen heur hoes over aan t oetstokken en Azarja, zeun van Maäseja, dij weer ain van Ananja was, dee dat noast zien aigen hoes. ²⁴ Binnuï, zeun van Chenadad, was doarmit drok aan gaang van t hoes van Azarja òf aan tot aan Punt en tot aan Houk. ²⁵ Palal, zeun van Uzai, was drok aan gaang mit muurpaand tegen Punt over en tegen d'hoge toorn over, dij boven t keunenkelk pelaais oetstekt, vlak bie t Gardeplaain. Even wiederop was Pedaja, Paros zien zeun, aan gaang. ²⁶ Noast heur wazzen tempelknechten dij op d'Ofel woonden in schrip; heur paand laip tot aan Wotterpoort in t oosten en tot aan hoge toorn. ²⁷ Doarnoast muik t volk oet Tekoä t stok muur van de hoge, oetspringende toorn tot aan muur van d'Ofel kloar. ²⁸ Vanòf Peerpoort wazzen priesters aan t oetstokken, elk tegen zien aigen hoes over. ²⁹ Doarnoast, ook in de buurt van zien aigen hoes, was Sadok, zeun van Immer, drok aan gaang en noast hom Semaja, zeun van Sechanja, dij poortwachter was van d'Oosterpoort. ³⁰ Den kwam Chananja, zeun van Selemja, en Chanun, zèsde zeun van Salaf, veur t volgend paand. Mesullam, zeun van Berechja, was tegenover zien aigen wonen aan t waark. ³¹ n Ènje wiederop was goldsmid Malkia aan gaang tot aan t hoes van de tempelknechten en handelslu, dij tegen Wachtpoort over staait en tot aan de bovenzoal op Houk. ³² En tussen bovenzoal op Houk en Schoappoort wazzen de goldsmeden en de handelslu aan t waark.