Nehemia 2

Veurberaaiden veur t grode waark

¹¹ Ik kwam in Jeruzalem aan en bleef doar drij doag. ¹² Snaachts gong ik ter mit n poar manlu op oet. Ik haar aan gainain verteld wat mien God mie ingeven haar om veur Jeruzalem te doun. Ik haar ook gain aander daaier bie mie as t daaier woar ik op ree. ¹³ Zo gong ik ter snaachts op oet deur Daalpoort, noar Slangenkoel en wieder noar Drekpoort. Ik onderzöchte muren van Jeruzalem dij in puun lagen en de poorten dij deur braand vernaild wazzen. ¹⁴ Ik gong deur noar Wèlpoort en Keunenksviever, mor doar was gain roemte genog veur mien daaier om wieder te lopen. ¹⁵ Doarom gong ik snaachts deur de beek en dat zo noar boven om de muur te onderzuiken. Dou gong ik deur Daalpoort weer in stad en kwam zo weerom. ¹⁶ Bestuurders wozzen nait woar of ik hènwest haar en wat of ik doan haar. Aan dij tied tou haar ik ja gainain wat verteld; nait aan de Jeuden en de priesters, en ook nait aan de magistroaten en de notoabeln en aal aandern dij t waark deden. ¹⁷ Dou zee ik tegen heur: "Ie zain nou ja wel, wat veur n toustand of t hier is, dat Jeruzalem in puun ligt en de stadspoorten opbraand binnen. Kom, wie goan stadsmuur van Jeruzalem weer opbaauwen; den stoan wie nait laanger veur spot." ¹⁸ Ik vertelde heur van mien God, dij mie beschaarmd haar en wat keunenk tegen mie zegd haar. Dou zeden zai: "Loat wie den mor vot mit baauw begunnen!" en zai pakten t waark votdoalek goud aan. ¹⁹ Dou Sanballat, de Choroniet, en Tobia, de Ammonitische amtenoar, en ook Gesem, n Arabier, dat heurden, haren zai de gugel mit ons en deden minachtend: "Wat heb ie nou ommaans? Wol ie tegen de keunenk in t geweer kommen?" ²⁰ Mor ik gaf heur as antwoord: "De God van de hemel zel der veur zörgen dat t belukt wat wie veur hebben. Wie as zien dainstvolk zellen begunnen om de stad weer op te baauwen. Mor doar heb ie gain dail aan; ie hebben gain recht, gain herinnerns in Jeruzalem."