Nehemia    2

¹ Nou wol t gevaal in t twinnegste joar van keunenk Artaxerxes, in nisanmoand, dat ter wien veur hom kloar ston. Ik pakte dat wien en langde dat aan keunenk tou. Ik haar nog nooit verdraiteg west woar hai bie was. ² "Woarom kikstoe zo triesterg?", zee keunenk tegen mie. "Bist toch nait zaik? t Is ja ain en aal treureghaid mit die!" Dou wer ik slim benaauwd. ³ Ik zee tegen keunenk: "Dat keunenk mor aiweg leven mag! Hou zol ik nait triesterg wezen nou de stad, t stee woar mien veurolden begroaven liggen, haildaal in puun ligt en poorten deur braand vernaild binnen?" ⁴ Keunenk vruig mie dou: "Wat wolstoe mie den vroagen?" Dou beedde ik tou de God van de hemel om hulp. ⁵ En ik vruig aan keunenk: "As keunenk t goud vindt en as keunenk mie goudgezind is, loat mie den noar Juda goan om de stad woar mien veurolden begroaven liggen, vannijs op te baauwen." ⁶ Dou vruig keunenk - en keunegin zat noast hom - : "Hou laank gaait dij raais duren en wanneer zelst weeromkommen?" Dou ik hom n tiedsduur nuimde, gaf hai mie permizzie om vot te goan. ⁷ Wieder vruig ik aan keunenk: "As keunenk t goud vindt, wil ik geern, dat e mie braiven mitgeft veur de landvoogden aan aanderkaant Eufraat, dat dij mie vrijoet deurraaizen loaten, totdat ik in Juda bin. ⁸ En ook geern n braif veur Asaf, keunenk zien holtvester, dat dij mie timmerholt levern zel veur poorten van tempelbörg, veur de muren van de stad en veur n hoes woar ikzulm in wonen kin." Keunenk gaf mie ales, woar ik om vruig, omdat ik in t beschut van mien God zien haand was. ⁹ Dou ik bie landvoogden aan aanderkaant Eufraat aankwam, langde ik heur dij braiven van de keunenk over. Keunenk haar mie veur onderwegens n gelaaide van legerofsieren en peervolk mitgeven. ¹⁰ Dou Sanballat, de Choroniet, en Tobia, n Ammonitische amtenoar, heurden dat ter ain kommen was, dij t opnemen zol veur belangen van d'Israëlieten, wazzen zai doar hail min over te spreken.

© 2006 Liudgerstichten. All rights reserved.