Nehemia 12

Inwijden van stadsmuur

²⁷ Bie t inwijden van stadsmuur van Jeruzalem werden Levieten oet aal heur woonsteden noar Jeruzalem nuigd veur t inwijden, mit n feest van lofzang en laiden, mit meziek van cimbels, haarpen en lieren. ²⁸ Zangers kwammen bie nkander oet kontrainen van Jeruzalem en oet dörpen bie Netofa, ²⁹ oet Bet-Haggilgal en oet omstreken van Geba en Azmawet. Zangers haren zok ja dörpen rondom Jeruzalem sticht. ³⁰ Priesters en Levieten muiken zok kouster en zai schoonden ook t volk, de poorten en stadsmuur.
³¹ Dou luit ik d'overstes van Juda boven op stadsmuur kommen en stelde doar twij grode koren op om in optocht over muur te lopen, elk n kaant oet. Ain koor gong over muur noar t zuden noar Drekpoort. ³² Hosaja kwam achter heur aan mit haalfschaid van overstes van Juda, ³³ mit Azarja, Ezra en Mesullam, ³⁴ en mit Jehuda, Benjamin, Semaja en Jirmeja. ³⁵ Dou kwammen gounent van de priesters mit trompetten: Zecharja, Jonatan zien zeun, dij in rechte lien via Semaja, Mattanja, Michaja en Zakkur, n noazoat van Asaf was, ³⁶ mit zien femilieleden Semaja, Azarel, Milalai, Gilalai, Maäi, Netanel, Jehuda en Chanani; dij haar meziekinstrumìnten van David, man van God, bie zok. Schriftgeleerde Ezra laip veurop. ³⁷ Bie Wèlpoort gongen zai liekoet, bie trappens van Doavedsvesting omhoog, over t hoogste van de muur bie pelaais van David langs tot aan Wotterpoort in t oosten. ³⁸ t Twijde koor gong aanderkaant oet. Ik gong mit haalfschaid van t volk ter achteraan over de stadsmuur bie Bakoventoorn en dat zo noar Braide Muur. ³⁹ Wieder gong t over d'Efraïmpoort, over d'Ol Poort en Vispoort, over Chananeltoorn en Meatoorn tot aan Schoappoort tou. Bie Gevangenpoort bleven ze stoan.
⁴⁰ Baaide zangkoren stelden zok in tempel op; ik ook mit haalfschaid van d'overstes, ⁴¹ en mit priesters Eljakim, Maäseja, Minjamin, Michaja, Eljoënai, Zecharja en Chananja, mit heur trompetten, ⁴² en wieder mit Maäseja, Semaja, Elazar, Uzzi, Jochanan, Malkia, Elam, en Ezer, dij zok, as zangers, heuren luiten onder direksie van Jizrachja. ⁴³ Op dij dag werden verschaaiden ovvers brocht en elk was blied, God haar heur ja slim blied moakt. Ook vraauwlu en kinder haren groot feest, zodat t feest van Jeruzalem wied van vèrren al te heuren was.