Nehemia 11

Liest van inwoonders van Jeruzalem en van aandere steden

¹ Hoogste laaiders van t volk gongen in Jeruzalem wonen. Ale aandere lu mozzen lötten om ain op de tien mensen aan te wiezen dij in Jeruzalem, dij haailege stad, wonen mos; d'aander negen konden in aandere steden blieven. ² Femilies dij oet zokzulm aanboden om in Jeruzalem wonen te goan, werden deur t volk om t haardst prezen.
³ Dit hier wazzen de laaiders oet pervinzie, dij in Jeruzalem wonen gongen. Mainste Israëlieten, priesters, Levieten, tempelknechten, en noazoaten van Salomo zien sloaven gongen in Juda wonen, elk op zien aigen haimstee in zien aigen stad. ⁴ Gounent van t volk oet Juda en oet Benjamin gongen noar stad Jeruzalem tou te wonen.
Oet Juda wazzen dat: Ataja, zeun van Uzzia, dij in rechte lien via Zecharja, Amarja, Sefatja, Mahalalel, oet t geslacht van Peres stamde, ⁵ en Maäseja, zeun van Baruch, dij via Kolchoze, Chazaja, Adaja, Jojarib, Zecharja, oet t geslacht van de Siloniet stamde. ⁶ Aal mit nkander woonden der vaaierhonderd achtensesteg noazoaten van Peres in Jeruzalem, aalmoal fikse kerels.
⁷ Dit is t volk van Benjamin: Sallu, zeun van Mesullam, dij via Joëd, Pedaja, Kolaja, Maäseja, Itiël, oet t geslacht van Jesaja stamde; ⁸ Wieder nog Gabbai en Sallai; mit nkander negenhonderd achtentwinneg man. ⁹ Joël, zeun van Zichri, was heur laaider, en Jehuda, zeun van Hassenua, was onderkommedant van de stad.
¹⁰ Dit wazzen de priesters: Jedaja, zeun van Jojarib, en Jachin; ¹¹ Seraja, zeun van Chilkia, dij via Mesullam, Sadok en Merajot, oet t geslacht van Achitub stamde en dij verantwoordelk was veur tempelorganisoatsie, ¹² mit heur femilieleden dij dainst in tempel deden, mit nkander aachthonderd twijentwinneg man. Wieder Adaja, zeun van Jerocham, dij via Pelalja, Amsi, Zecharja en Paschur, oet t geslacht van Malkia stamde ¹³ mit zien femilieleden en femilie-oldsten, mit nkander twijhonderd twijenvatteg man. Wieder ook Amassai, zeun van Azarel, dij via Achzai en Mesillemot oet t geslacht van Immer stamde, ¹⁴ mit zien femilieleden, mit nkander honderdachtentwinneg man, aalmoal fikse kerels: Zabdiël, zeun van Gedolim was heur laaider.
¹⁵ Dit wazzen de Levieten: Semaja, zeun van Chassub, dij via Azrikam en Chasabja, van Bunni ofstamde. ¹⁶ Sabbetai en Jozabad, overstes van de Levieten, wazzen verantwoordelk veur aal t waark boeten om tempel tou. ¹⁷ Mattanja, zeun van Micha, dij via Zabdi van Asaf ofstamde, was veurzanger; dij gong bie t daankgebed veur in t daanklaid. En wieder was doar Bakbukja, zien twijdeman en Abda, zeun van Sammua, dij via Galal van Jedutun ofstamde. ¹⁸ Aal mit nkander woonden der twijhonderd vaaierntachteg Levieten in de haailege stad.
¹⁹ Poortwachters wazzen Akkub, Talmon en heur femilie, dij wacht huilen in poorten van de stad: mit nkander honderdtwijenseuventeg man.
²⁰ Ale aandere Israëlieten, priesters en Levieten, woonden op heur aigen gerechteghaid in d'aander steden van Juda. ²¹ Tempelknechten woonden op d'Ofel; zai stonden onder t gezag van Sicha en Gispa. ²² Overste van Levieten in Jeruzalem was Uzzi, n zeun van Bani dij via Chasabja en Mattanja van Micha ofstamde. Hai was ain van noazoaten van Asaf, zangers dij bie tempeldainsten koorzang deden. ²³ Der was n regelmìnt van keunenk over dij tempelzangers, woarin ston hou heur doagliekse dainsten regeld worden mozzen. ²⁴ Petachja, zeun van Mesezabel, ain van noazoaten van Zerach, zeun van Juda, haar van de keunenk volmachten kregen veur ale zoaken dij t volk aanbelangden.

²⁵ Wat de dörpen op t laand aangaait, der woonden Judeeërs in Kirjat-Arba en in gehuchten doar rondomtou, in Dibon en buurtschoppen doar omtou, in Jekabseël en dörpen dij doarbie heurden, ²⁶ in Jesua, Molada en Bet-Pelet, ²⁷ in Chasar-Sual en Berseba en ploatsen doar rondomtou, ²⁸ in Siklag en Mechona en ploatsen doar rondomtou, ²⁹ in En-Rimmon, Sora en Jarmut, ³⁰ in Zanoäch en Adullam en dörpen dij doarbie heurden, in Lachis en t laand doar omtou en in Azeka en gehuchten doar rondomtou. Zai gongen wonen in kontrainen van Berseba òf tot aan Hinnomdaal tou. ³¹ t Volk van Benjamin gong in Geba wonen, in Michmas en Ajja, in Betel en in dörpen doar rondomtou, ³² In Anatot, Nob en Ananja, ³³ In Hasor, Rama en Gittaïm, ³⁴ In Chadid, Seboïm en Neballat, ³⁵ In Lod, Ono en in t daal van d'ambachtslu. ³⁶ Ook ofdailens van Levieten oet Juda kwammen bie t volk van Benjamin te wonen.