Nahum 3

Ninevé ontlopt zien verdainde straf nait

¹ O wai, doe stad vol moordenoars en leugenbaisten,
vol mit stolen goud,
en dij nóg nooit opholdt mit stelen en reupen.
Doe gaaist ter aan!
² Heur!
Swepen knallen,
peerden in sprang,
roaden rabbeln,
striedwoagens dendern deur stad.
³ Kiek!
Peervolk komt ter aan vlaigen,
sweerden flikkern,
speren glìnstern,
overaal mensken dij sneuveld binnen,
stoapels lieken,
te veul om te tellen, je breken bainen der over.
⁴ Hou dat komt?
Omdat Ninevé krekt is as n houer
dij t mit elkenain aanlegt.
n Aibels mooie maaid
dij persies wait hou ze manlu kop gek moaken kin.
Zai het haile volken in heur strikken kregen
en de wereld mensken verlaaid
mit heur filaaine knepen.
⁵ Ik krieg die wel,
zegt de Heer d'Aalmachtege.
Ik zel die de rokken over kop hoalen,
dastoe spiernoakend
veur elkenain te pronk staaist
en aal dij volken
en keunenks
dien schoamte zain kinnen.
⁶ Ik zel die mit drek besmeren
en die openlek schandaaiern.
⁷ Elk dij die zigt moakt dat e vot komt
zo gaauw as e kin,
en ropt:
"Haile stad Ninevé ligt in puun!"
Zol der in haile wereld wel ain wezen dij meedlieden het?
Nee, gainain dij heur aanholden wil.
⁸ Denkstoe dat die t beder ofgoan zel as No-Amon ¹³
doar in Egypte bie Nijl?
Krekt zo as doe midden in t wotter.
Mit zee as bolwaark
en revier as muur.
⁹ Heur macht haar gain èn of swet.
Lu van Put en Libië holpen heur.
¹⁰ Mor liekewel binnen lu dij doar woonden
vot sleept noar n laand wied vot.
Heur lutje kinder binnen te pletter sloagen
op ale houken van stroaten.
Heur laaiders binnen deur t löt toupaart aan overwinnoars
en mit kettens om haals vot sleept.
¹¹ Ninevé,
nou zel die t zulmde overkommen.
As n doene kerel, haildaal verbiesterd
zelstoe n stee zuiken om vot te kroepen veur dien vijanden.
¹² Aal dien staarke steden, Assyrie,
binnen krekt as viegebomen
doar eerste riepe viegen aan hangen;
as je der aan schudden
valen ze ain dij der onder staait vanzulm in mond en kin hai ze opeten.
¹³ Dou der denk om:
dien soldoaten binnen zo slap as n schuddeldouk.
Poorten van dien laand
stoan wiedwoagen open veur dien vijanden.
Baalken doar ze mit op slöt zitten
binnen deur t vuur verteerd.
¹⁴ Moak joe mor kloar veur belegern:
hoal mor wotter op,
dat je der kloar veur binnen.
Moak joen vestens mor zo staark as t aaids kin.
Moak mor klaai en laim ree om stainen te bakken.
Zet bakstainvörm mor kloar.
¹⁵ t Helpt joe aalmoal niks.
t Vuur zel joen steden verslinden,
t sweerd zel joen mensken ombrengen,
t zel joe opvreten krekt as sprinkhoanen alles opvreten.

Of bin ie ook zo talriek as sprinkhoanen,
¹⁶ en of binnen der bie joe ook meer kooplu ¹⁴ as steerns aan lucht,
verswonnen binnen ze, aalmoal.
Aal dij sprinkhoanen ¹⁵ hebben vleugels oetspraaid
en binnen vot vlogen.
¹⁷ Joen amtenoaren en kommedanten
binnen zo talriek as n swaarm sprinkhoanen,
dij op n kolde dag zitten te kleumen
op stainen muurkes rondom t laand tou.
Mor as zun opkomt
vlaigen ze vot
en gainain wait woar dat ze bleven binnen. ¹⁶
¹⁸ Doe keunenk van Assyrie,
dien kommedanten binnen dood,
dien hoge omes binnen oet tied.
Dien volk lopt aal enter-en-twenter
as schoapen dij t spoor biester binnen
in baargen,
en gain mensk krigt heur weer bie nkander.
¹⁹ Dien kwoal, doar is gain zaalf aan te strieken.
Dien wond wordt nooit weer beder.
Elkenain dij t heurt
klapt in handen van bliedschop.
Der is ja gainain dij nait slim leden het onder dien gemaineghaid
doar nooit n èn aan kwam.