Nahum 2

Ninevé veroverd en verinneweerd

¹ Der komt ain op joe òf,
Ninevé,
dij joe verplettern zel.
Zet manlu mor op wacht op stadsmuren.
Kiek mor deeg oet bie weg laans.
Moak joe mor kloar om te vechten
zo goud as ie kinnen.
t Helpt joe toch niks. ⁸
² De Heer staait ja kloar
om Joakob en Izrel heur glorie weerom te geven.
d'Olde glorie van veurdat ie heur kepot moakt en leegstolen haren
en heur droevetoenen vernaild haren.
³ Joen vijanden, dij naargens benaauwd veur binnen,
störmen op joe òf mit roazend geweld.
Mit vuurrooie schilden
en rooie uniförms aan.
Heur iesdern woagens glìnstern as vuur,
heur peerden staaigern.
⁴ Striedwoagens roazen
deur joen stroaten hèn
en dendern over plaainen,
glìngloeiend as fakkels.
Ze vlaigen ale kanten hèn
as n weerlichtslag.
⁵ Ofsieren worden opkomdaaierd;
ze breken heur nek hoast over heur aigen vouten,
zo haard vlaigen ze op muren òf.
Störmram wordt kloarzet.
⁶ Sluusdeuren worden opengooid, ⁹
keunenk zien pelaais staait te trillen.

⁷ Keunegin wordt spiernoakend vot brocht
ondertied dat heur sloavinnen jammern;
ze kloagen as triesterge doeven
en sloagen zok op borst van ellèn.
⁸ As t wotter van n viever dij leeg lopt,
zo gaait t leger dij Ninevé verdedegen mout der vandeur.
"Blief toch stoan, blief den toch stoan!" wordt ter roupen,
mor gainain kikt meer achterom.
⁹ "Griep dat zulver!
Pak dat gold!"
roupen veroveroars.
Aalmoal mooi spul,
allerhand aibels mooi goud,
doar komt gain èn aan.
¹⁰ Vernailen, verroppen en verpoazen.
Hoamernde haarten, knikkende knijen,
lamme leden,
liekwidde gezichten.

¹¹ Woar is Ninevé bleven,
t hool van laif? ¹⁰
Hool doar laif mit zien jongen in kroop,
en doar gainain heur votjoagen duurde?
¹² Woar is dij laif,
dij alles verropte
dat zien jongen mor genog te vreten haren?
Aal dat e in zien klaauwen kreeg
smoorde hai òf veur zien laiwinnen.
Zien hool stopte hai vol mit roofgoud. ¹¹
¹³ Denk ter om! zegt de Heer, d' Aalmachtege,
Ik krieg die wel!
Ik zel dien hool schoon oetbraanden
en dien jongen zellen deur t sweerd vergoan.
Ik zörg der veur dastoe op haile wereld
gain roofgoud meer vinden kinst.
t Roupen en reren van dien ofgezanten
zellen ze naargens meer heuren. ¹²