Nahum 1

God zel stad Ninevé betoalen wat zai Judoa aandoan hebben

² De Heer is n God dij nait velen kin dat mensken aander goden hebben.
Hai straft gemaine verdrukkers.
Joa, stravven zel de Heer aal dij kop dwaars zetten.
Hai is hoagels op zien vijanden en zel heur wel kriegen.
³ De Heer wordt nait gááuw kwoad,
mor as Hai kwoad wordt
baarg joe den mor op, den is t eerns. ¹
As Hai komt, den komt ter störm en dunder.
Wolken binnen t stof, opjagd deur zien vouten. ²
⁴ Hai huift zee mor te zeggen om dreug te worden,
en vot is aal t wotter.
Hai kin alle rivieren opdreugen loaten.
Den kwienen gruinlaand van Basan
en toenen van Karmel,
en aal wat ter gruit en bluit op
Libanon komt omhaals.
⁵ As de Heer der aan komt
stoan baargen te schudden
en heuvels smelten vot.
Wereld schokt
en aal dij der op wonen trillen as rusken.
⁶ As Hai vergrèld is,
wèl kin den in t èn blieven?
Wèl is tegen zien grammiedeghaid opwozzen?
Zien kwoadens broest over wereld as n vuurstroom
en baargen vlaigen veur Hom aan splinters. ³

⁷ De Heer is wel goudgunsteg,
n staarke börg
in tieden van benaauwdhaid,
en veur wèl schoel bie Hom zuiken
doar zörgt Hai veur,
⁸ mor Ninevé veegt Hai van stee
mit n wottervloud dij over alles hèn gaait.
Zien vijanden let E verswienen
in t routduuster van dood. ⁴
⁹ Netgeliek wat veur kwoad ie tegen de Heer oetstuvaaierd hebben,
ie Assyriërs,
Hai moakt ter in ain moal veurgoud n èn aan.
¹⁰ Of zitten ze ook zo in toeze as brommelbozzen,
of binnen ze zo kletsdeurnat as draank doar ze doen van binnen,
zai worden verteerd as dreug stro deur t vuur. ⁵
¹¹ Want bie joe is ain vot kommen, Ninevé,
dij kwoad tegen de Heer in t zin het.
n Deurtrapt gemaine kerel. ⁶