Jozua 8

Jozua baauwt n altoar en leest wet veur

³⁰ n Zetje loater gingen Jozua en Izrelieten noar baarg Ebal tou. Hai zee, ze mozzen doar n altoar baauwen veur de Heer, Izrel zien God. ³¹ t Mos n altoar worden van stainen dij nait mit iezern riw bewaarkt wazzen. Zo haar Mozes, de Heer zien knecht, Izrelieten order geven en zo staait t ook in zien wetbouk. Op dat altoar brochten ze de Heer braandovvers en daankovvers. ³² Doar schreef Jozua Mozes zien wet op stainen ploaten, dat Izrelieten dij lezen konden.
³³ Izrelieten, heur laaiders, ofsieren en richters, zo goud as t vremd volk dat bie heur tou huil, werden verdaild in twij plougen, dij elk aan n kaant van aark stoan gingen. Ain haalfschaid aan kaant van baarg Gerizim, aander haalfschaid aan kaant van baarg Ebal. Ze haren altmoal zicht op aark en op priesters, dij mit aark tussen baaide koppels in stonden. Mozes haar zegd, dat priesters t volk zegen mozzen veurdat wet veurlezen wer. ³⁴ Dou dat gebeurd was, leesde Jozua heur haile wet veur mit zegen en fluik, haildaal zo as t in wetbouk ston. ³⁵ Hai sluig gain woord over van wat Mozes opschreven haar. Hai leesde t apmoal veur aan haile vergoadern, mit vraauwlu en kinder en vremden dij mit heur optrokken.