Jozua 8

Ai wordt innomen en mit grond liek moakt

¹ Dou zee de Heer tegen Jozua: "Nou nait laanger benaauwd en mismoudeg wezen. Allee! Der op lös! Weer op Ai òf, mor nou mit t haile leger! Stad Ai mit haile kontraain, mit zien keunenk en ale lu doar, apmoal zel Ik die t geven. Doar kinst wis van op aan. ² Net as bie Jericho mout ie keunenk en aal t volk dood moaken. Mor t vij en t aander mag ie diskeer zulm holden. Paardie soldoaten mouten zok schoel holden aan achterkaant van stad en aanvalen veurdat lu der op verdocht binnen."
³ Eer Jozua der zulm op lös ging mit zien leger, stuurde hai snaachts datteg ofdailens van zien allerbeste soldoaten op pad. ⁴ Hai zee tegen heur: "Goud acht geven! Ie mouten bezied kroepen aan aander kaant van stad, zo stoef bie as aaids kin, kloar om in aksie te kommen. ⁵ Ik en mien manlu zellen den aan oostkaant tot vot bie stad optrekken. As ze den tou poort oet kommen en aanvalen, zel wie der weer oetrieten, krekt as eerste moal. ⁶ Den denken zai vanzulm: 'Dij kerels naaien der weer oet!' Zai zellen achter ons aan goan, en zo lokken wie heur bie stad vot. ⁷ Den kom ie veurndag en nemen stad in. De Heer zel joe stad geven. ⁸ Zo gaauw as dat gebeurd is, mout ie braand ter in steken. Zo wil de Heer dat. Dou der denk om dat ie persies doun wat ik joe zegd heb." ⁹ Zo stuurde Jozua dij datteg ofdailens op pad. Zai kropen woaraargens achter stad bezied, aan westkaant tussen Betèl en Ai. Jozua bleef zulm dij naacht in t kaamp bie zien soldoaten.
¹⁰ Aanderdoagsmörgens, dou t nog duuster was, stelde Jozua heur op. Hai brochde heur, mit laaiders van Izrel, zulm op stee. ¹¹ Dou ze aan noordkaant wazzen, gingen ze nait wieder. Der was bloots nog n leegte tussen heur en stad. ¹² Dou huil hai n stok of vief van zien ofdailens der oet en zee, ze mozzen zok schoel holden aan westkaant van stad tussen Betèl en Ai. ¹³ Zo was zien leger dus opsteld: hoofdmacht aan noordkaant stad en n lutje ofdailen aan westkaant. Dij aigenste naacht nog ging Jozua mit zien volk leegte in. ¹⁴ Dou keunenk van Ai t smörgensvro in de goaten kreeg, wos hai t wel. Hai ging mit aal zien manlu votdoalek tou stad oet op Izrelieten òf, om weer mit heur te vechten op hellen van leegte bie Jordoan. Hai wos vanzulm nait, dat ter n aander ofdailen kloar ston om stad van achtern aan te valen. ¹⁵ Jozua en zien volk deden of ze weer manje minst wazzen en gingen der vandeur, kaant van woestijn op. ¹⁶ Ale manlu oet stad wazzen optrommeld om achter Izrelieten aan te goan. Ze juigen achter Jozua en zien volk aan, van dij gevolgen dat ze aal wieder bie stad vandoan lokt werden. ¹⁷ Der bleef gain man over in Ai en Betèl. Ze stoven apmoal achter Izrelieten aan. Ze luiten poorten alderdeegs wiedwoagen open stoan.
¹⁸ Dou zee de Heer tegen Jozua: "Steek dien spies omhoog noar Ai tou. Ik zel stad in dien macht geven." Dat dee Jozua. ¹⁹ Dat was taiken veur lu dij achter stad op loer laggen om rad in t èn te kommen. Ze vlogen der op òf, nammen stad in en stoken boudel vot in braand. ²⁰ Dou manlu van Ai achterom keken, verdold, haile stad ston in braand, altmoal rook en vuur! Ze konden naargens meer hèn. Izrelieten dij op loop goan wazzen noar woestijn tou, draaiden zok om en vuilen heur aan. ²¹ Want Jozua en zien volk haren zain, dat lu dij op loer lagen stad innomen en in braand stoken haren. Zodounde haauwden ze op soldoaten van Ai in. ²² Vot kwammen ook soldoaten dij stad innomen haren, der oet en begunden mit te vechten. Zo zatten vijanden rondom hèn tussen Izrelieten, as moezen in vaal. Ze werden verdizzelwaaierd. Gain moudermensk bleef der over. ²³ Allenneg keunenk van Ai kregen ze leventeg in handen. Dij brochten ze bie Jozua. ²⁴ Zo sluigen Izrelieten börgers van Ai dood in t veld en in woestijn, doar dij achter heur aan zeten haren. Dou ze heur aan leste man tou over klink jagd haren, gingen ze weerom noar Ai en muiken doar elkenain van kaant. ²⁵ Zo is in ain dag aal t volk van Ai omhaals brocht, manlu en vraauwlu, mit nkander twaalfdoezend. ²⁶ Jozua stook zien spies omhoog noar Ai tou, net zo laank dat aal t volk van Ai dood moakt was, as n ovver veur de Heer. ²⁷ Mor diskeer moggen Izrelieten aal t goud dat zai in stad vonden en t vij zulm holden, zo as de Heer tegen Jozua zegd haar. ²⁸ En Jozua luit Ai aan grond tou plat braanden, dat ter allenneg n male stainbult over bleef. Dij is ter nou nog. ²⁹ Keunenk van Ai wer ophongen aan n boom. Hai mos doar hangen blieven aan oavend tou. Tegen twijduustern luit Jozua hom der ofhoalen en deel gooien bie ingang van stadspoort. In opdracht van Jozua hebben ze n dikke bult stainen boven op hom vlijd, en dij is ter nou nog aaltied.