Jozua 7

Achan zien ongeheurzoamhaid dragt wied

¹ Toch bleven Izrelieten nait òf van wat veur de Heer bestemd was. Ain van heur, Achan, pakte vot doar hai nait aankommen mog. Zien voader haitte Karmi, zien grootvoader Zabdi en dij zien voader Zerach. Hai heurde bie stam Judoa. Dou wer de Heer gloeiend glìn op Izrelieten.
² Jozua stuurde n man of wat van Jericho noar Ai, n stadje aan oostkaant van Betèl, nait wied van Bet-Awen. Hai zee tegen heur: "Goat noar Ai en kiekt hou of t doar bie staait." Zai gingen der op òf. ³ Dou ze weerom wazzen, zeden ze tegen Jozua: "t Haile leger huift ter nait op òf, twij of drij batteljons is genogt." ⁴ Doarom stuurde Jozua der om en bie drij batteljons op òf. Mor mensken in Ai juigen heur op loop. ⁵ Zai zatten achter heur heer van stadspoort òf, bie heuvel omdeel tot staingoaten aan tou en haauwden zo'n zesendatteg van heur dood. Dou sluig Izrelieten schrik om t haart en ze luiten moudveren hangen. ⁶ Jozua en laaiders van Izrel wazzen zo oet stuur, dat ze heur klaaier stokkend reten. Ze luiten zok deel valen veur aark mit stof op kop. Aan oavend tou bleven ze zo liggen. ⁷ Jozua zee: "Och heden, aalmachtege Heer, Ie hebben ons toch wis en woarachteg nait aan diskaant Jordoan brocht, bloots dat Amorieten ons oetreuden kinnen? O, was wie mor aan aander kaant bleven! ⁸ Och Heer, reken mie t nait aan. k Wait ja nait meer wat k zeg. Ons volk is ja op loop goan veur zien vijanden. ⁹ Kananieten en ale aandern dij hier wonen, zellen t gewoar worden. Den zellen ze der over tou kommen en ons apmoal van kaant moaken. En wat zel Ie den doun as ze Joe gek aanscheren, omreden Ie konden ons nait helpen?"
¹⁰ Dou zee de Heer tegen Jozua: "Nait langer plat op grond! Allee, in t èn! ¹¹ t Volk het t goud verdurven. Zai hebben nait doan wat ik verordonnaaierd haar. Zai hebben vot pakt wat mienent was. Ze hebben t stiekem bie heur aigen goud legd. ¹² Zo komt t, dat ze heur vijanden nait aan kinnen en der veur op loop goan. t Is heur aigen schuld as ze der altmoal aan goan. Ie mouten eerst dij kerel dij t doan het, mit aal zien hebben en holden der veurgoud oet smieten. Aans help K joe nait laanger. ¹³ Allee! Moak dat t volk Mie mörgen onder ogen kommen kin. Zeg heur: 'Mörgen wil de Heer joe zain, omreden ain van joe het zok vergrepen aan wat mienent is. Vijand zel joe boas worden as ie dat nait weer liek moaken. De Heer zel zulm aanwiezen wèl of t doan het. Stam veur stam, femilie veur femilie, hoesholden veur hoesholden en op t leste man veur man, mout ie mörgen veur de boalie. ¹⁵ En wèl den as schuldege veur t licht komt, dij mout dood moakt worden. Hai en zien haile hoesholden en aal wat van hom is, zel opbraand worden, omreden hai het ongeheurzoam west aan God zien opdracht. En dat betaikent n swoare zunde dij t haile volk aangaait.'"
¹⁶ Aanderdoagsmörgensvro luit Jozua stam veur stam noar veuren kommen. Stam Judoa wer vaastlöt. ¹⁷ Dou luit e femilies van Judoa noar veuren kommen en femilie Zerach kwam der oet. Dou mos dij femilie noar veuren kommen, man veur man, en ze kwammen oet bie Zabdi. ¹⁸ Van dij zien hoesholden luit e manlu ain veur ain noar veuren kommen. Dou kwam der oet dat Achan schuldege was. Achan zien voader was Karmi, zien grootvoader Zabdi, zien overgrootvoader Zerach. Hai was ain van stam Judoa. ¹⁹ Dou zee Jozua tegen Achan: "Jong, most mor liekoet schuld bekennen veur de Heer, Izrel zien God, en der nou vot mit veurndag kommen. Zeg mor krekt hou en wat." ²⁰ "t Is woar!", zee Achan, "ik bin t ja dij t doan het wat de Heer verboden haar. Zo is t goan: ²¹ Bie t goud dat veur t griepen lag, zag ik n mooie mantel oet Sinear, zowat vief pond zulver en n stoaf gold van goud n pond. Ik kon handen nait in buus holden. Goat mor kieken! t Ligt apmoal begroaven in mien tent, t zulver onderaan." ²² Jozua stuurde der vot n poar manlu op òf, en joa kerel, doar vonden ze t haile spul krekt zo as Achan zegd haar. ²³ Ze huilen t ter oet en brochten t bie Jozua, dij t aan Izrelieten zain luit. Zai legden t veur aark. ²⁴ Dou brochten Jozua en ale Izrelieten Achan mit zulver, mantel en stoaf gold, zien zeuns en dochters, zien koien, ezels, schoapen, zien tent en aal wat van hom was, noar leegte van Achor. ²⁵ Doar zee Jozua: "Doe hest ons in t ongeluk stört, nou stört de Heer die in t ongeluk!" Mit nkander gooiden ze hom dood mit stainen. Dou verbraandden ze hom mit zien hoesholden en aal zien spullen, en vlijden der stainen boven op. ²⁶ Ze muiken der n dikke stainbult van, dij der vandoag aan dag nog is.
Doarom hait dij stee nog aaltied: Ongeluksleegte. Dou was de Heer nait meer vergramd op heur.