Jozua 6

Jericho wordt innomen

¹ Oet vrees veur Izrelieten huil Jericho poorten potdicht. Der kon gain mensk oet of in. ² De Heer zee tegen Jozua: "Nou most goud lustern! Ik geef Jericho mit zien keunenk en aal zien soldoaten in dien macht. ³ Doe en aal dien weerboare manlu mouten ainmoal doags om stad tou trekken en dat zes doagen achterrad. ⁴ Aark gaait ook mit. Zeuven priesters mouten veur aark aan lopen, elk mit n ramshoorn. Op zeuvende dag mout ie zeuven moal om stad tou, en ondertied mouten priesters op hoorns bloazen. ⁵ Noa de zeuvende moal mout ie n laange toon bloazen. Votdoalek as ie dat heuren, mout t haile leger hail haard begunnen te roupen. Den zel haile stadsmuur instörten en ie mouten liekoet, elk van t stee doar e staait, tou stad in klimmen."
⁶ Dou raip Jozua priesters bie nkander en zee tegen heur: "Pakt aark op en zeuven van joe mouten elk mit n ramshoorn veur aark aangoan." ⁷ Tegen soldoaten zee hai: "Moakt joe kloar veur n mars om stad tou. Gounent van joe mouten as veurhoede veur aark aangoan, kloar om te vechten." ⁸-⁹ Krekt zo as Jozua order geven haar, gebeurde t. Veurhoede, priesters mit hoorns, den aark en doar achterheer t aander soldoatevolk. Aalvot klonk t hoornbloazen. ¹⁰ Jozua haar tegen zien volk zegd: "Ie maggen nait roupen en alderdeegs gain woord zeggen, tot t zo wied is dat ik joe opdracht geef om te roupen. Mor den ook vot zo haard as ie kinnen." ¹¹ Zo ging aark dij eerste dag ainmoal om stad tou. Dou gingen ze weer noar t kaamp en wachtten doar op dag van mörgen.
¹² Aanderdoags was Jozua der weer vro bie. Priesters pakten aark weer op scholders. ¹³ Krekt as eerste dag laipen zai om stad tou, veuraan de gevechtskloare veurhoede, den de zeuven priesters mit aark en doar weer achterheer t aander volk. Aalvot wer der op hoorns bloazen. ¹⁴ Dizze twijde dag gingen ze ook weer ainmoal rondom stad tou en noatied weer noar t kaamp. Zo ging dat zes doag achter nkander.
¹⁵ Mor zeuvende dag stonden ze veur dag en doage al kloar en gingen in aigenste volgorde as aander doagen rondom stad tou. Mor nait ain, mor zeuven moal. ¹⁶ Noa zeuvende moal, dou priesters op hoorns bloazen haren, zee Jozua tegen zien volk: "Roupt zo haard as ie kinnen! Nou zel t wezen! De Heer het stad ja aan joe geven. ¹⁷ Ie mouten stad en aal wat ter in is kört haauwen. En ale mensken en aal t vij van kaant moaken as n ovver veur de Heer. Bloots Rachab, dij houer, en elk dij bie heur in hoes is, mout ie leven loaten. Zai het spionnen ja bezied stopt. ¹⁸ Ie mouten overaal ofblieven wat as n ovver veur de Heer bestemd is. Aans kin joen aigen kaamp mit grond geliek moakt worden, en den is t joen aigen schuld. ¹⁹ Mor aal t zulver en gold, ale koper en iezerspullen mout ie in t schathoes van de Heer brengen as n ovvergoave." ²⁰ Dou wer der haard op hoorns bloazen. Votdoalek dou soldoaten dat heurden, begunden zai hail haard te roupen. Muur donderde deel en zai klommen noar binnen, elk van t stee doar e ston. Zo hebben ze stad veroverd. ²¹ Zai grepen t sweerd en muiken elkenain in stad van kaant, manlu, vraauwlu, kinder en olden. Koien en schoapen en ezels gingen der ook aan. Rachab en heur volk luiten ze leven.
²² Jozua haar tegen baaide manlu dij kontraainen teveuren bekeken haren, zegd: "Ie hebben dij vraauw touzegd dat aal dij bie heur in hoes wazzen, niks overkommen zol. Doarom hoalt heur altmoal op en brengt heur op n vaaileg stee." ²³ Jongkerels gingen noar heur hoes tou. Zai huilen Rachab op, ook heur voader en mouder, heur bruiers en aal dij sib tou heur wazzen. Zai brochten heur noar n stee doar ze vaaileg wazzen, boeten t kaamp van Izrel. ²⁴ Zai stoken stad in braand, oetgezunderd t zulver, gold en koper en iezerspul. Dat brochten ze in t schathoes van de Heer. ²⁵ Jozua luit Rachab en heur volk leven. Zai moggen middenmaank Izrelieten wonen blieven, omreden Rachel haar spionnen bezied stopt. Zai wonen nog aaltied in t laand.