Jozua 5

Besniedenis en Poask

¹ Dou ale keunenks van Amorieten aan westkaant van Jordoan en van Kananieten aan Grode Zee, heurden dat de Heer Jordoan opdreugen loaten haar, netzo laank dat Izrelieten aan overkaant wazzen, luiten ze moudveren hangen en werden schietensbenaauwd veur heur.
² Dou zee de Heer tegen Jozua: "Most mezzen moaken van vuurstain en Izrelieten besnieden, net as vrouger in Egypte." ³ Jozua zörgde der veur dat dij mezzen der kwammen en dat Izrelieten besneden werden. Stee doar dat gebeurde hait nog Besniedenisheuvel. ⁴-⁵ Besniedenis was n hail zet al nait gebeurd. Veurdat t volk oet Egypte votgoan was, was aal t manvolk besneden, mor was dat mit kinder dij onderwegens geboren wazzen nait gebeurd. ⁶ Aan t èn van dij joaren was ter gainain meer over van dij weerboare manlu dij oet Egypte votgoan wazzen, omreden zai haren nait doan wat of de Heer tegen heur zegd haar. Hai haar hail vrouger al aan veurolders touzegd dat Hai t volk wos en woarachteg dit vruchtboare laand geven zol, mor dizze lu moggen der nait in. Eerst dou zai oet tied kommen wazzen, het Hai ons in t laand van melk en hunneg brocht. ⁷ Zeuns van dij ongeheurzoame lu wazzen onderwegens nait besneden. Nou zörgde Jozua doarveur. ⁸ Dou t altmoal achter rug was, mozzen manlu weer genezen en doarom bleef t haile volk zo laank op stee. ⁹ Dou zee de Heer tegen Jozua: "In Egypte was ie sloaven, nou bin ie vrij. Dij schaande is nou vot." Doarom hait stee doar dat gebeurde aaltied nog: Gilgal, dat wil zeggen: Votnomen.
¹⁰ Intied dat Izrelieten bie Gilgal touhuilen in vlakte bie Jericho, vierden ze Poask op vattiende dag van moand Nisan. ¹¹ Aanderdoags bakten ze brood zunder gèst, van t koorn dat in t laand Kanan wozzen was. Wat ter van gingen ze povven. ¹² Van dou òf aan kwam der gain manna meer. Zai haren eerste joar genog aan wat of t laand opleverde.