Jozua 4

Gedenkstainen oet Jordoan as aandenken

¹ Dou t haile volk goud en wel aan aanderkaant van Jordoan was, zee de Heer tegen Jozua: ² "Ie mouten twaalf manlu kaizen, oet elke stam ain. ³ Zegt heur dat elk n dikke vlint doargunders oet Jordoan pakken mout van stee doar priesters stoan. Dus mit nkander twaalm. Dij mouten ze mitnemen en deel leggen op stee doar vannacht joen kaamp is." ⁴ Dou raip Jozua dij twaalf manlu bie zok ⁵ en zee tegen heur: "Goat over Jordoan hèn aan aark tou. Doar mout ie elk ain stain oppakken, veur elke stam ain. ⁶ Dij binnen veur joe n aandenken van wat de Heer hier veur joe doan het. As joen kinder loater vroagen: 'Pa, wat hebben dij vlinten ainlieks te beduden?', ⁷ den mout ie heur vertellen, dat Jordoan ophuil mit stromen dou aark van de Heer der deur ging. Dizze vlinten zellen t volk Izrel hier aaltied aan denken doun." ⁸ Manlu van Izrel deden wat de Heer tegen Jozua zegd haar. Zai pakten twaalf stainen tou Jordoan oet, veur elke stam ain, nammen dij mit noar t kaamp tou en legden ze doar deel. ⁹ Jozua luit ook twaalf stainen in Jordoan opvlijen, op stee doar priesters mit aark stoan haren. Dij stainen binnen doar nou nog.
¹⁰ Jozua gaf t volk de Heer zien zegen en alles gebeurde krekt as Mozes t ook al tegen Jozua zegd haar. Ondertied dat priesters mit aark in Jordoan stoan bleven, trok t volk rad noar overkaant. ¹¹ Dou ze den apmoal goud en wel aan aanderkaant wazzen, gingen priesters der ook over mit de Heer zien aark en zöchten heur olde stee weer op. ¹² Net as Mozes zegd haar, gingen ook manlu van stammen Ruben en Gad en haalfschaid van Manasse veur t volk aan, kloar om in aksie te kommen. ¹³ Ze gingen mit om en bie vatteg batteljons veur aark aan, noar vlakte bie Jericho. ¹⁴ Dij dag zörgde de Heer der veur dat Jozua bie t haile volk hoog in aanzain kwam. Zai haren ontzag veur hom, zien haile levent laank, net as aaltied veur Mozes.
¹⁵-¹⁷ Dou zee Jozua in opdracht van de Heer tegen priesters dij aark mit wet der in druigen, dat zai ook oet Jordoan op waal kommen mozzen. ¹⁸ Vot dou priesters aan aanderkaant kommen wazzen, kwam t wotter weer opzetten en wer weer net zo braid as veurtied.
¹⁹ t Was tiende dag van eerste moand dou t volk aan overkaant kwam en ze heur kaamp opsluigen bie Gilgal, aan Jericho zien oostgrens. ²⁰ Doar luit Jozua ook dij twaalf vlinten dij ze oet Jordoan mitnomen haren, in t èn zetten. Hai zee tegen Izrelieten: "As joen kinder joe loater vroagen wat dizze vlinten te beduden hebben, den mout ie heur vertellen dat Izrel hier mit dreuge vouten deur Jordoan goan is. ²³ De Heer, joen God, het Jordoan veur joe opdreugen loaten. Net as Hai dat ook doan het mit Raait Zee. ²⁴ De Heer het dit doan, omreden Hai wil dat ale mensken op wereld der wait van hebben hou machteg Hai is, en aaltied ontzag veur Hom hebben."