Jozua 3

Tocht over Jordoan

¹ Aanderdoagsmörgens wazzen Jozua en ale Izrelieten der vroug bie en raaisden òf van Sittim noar Jordoan tou. Doar bleven ze n poar naachten eer ze overstoken. ² Drij doag noatied deden de laaiders de ronde deur t kaamp. ³ Zai zeden tegen t volk: "As ie zain, dat priesters aark van t verbond van de Heer, joen God, op scholders pakken, moet ie opbreken en der achterheer goan. ⁴ Mor ie mouten der veur zörgen dat ter tussen joe en aark n ofstand blift van om en bie doezend meter. Dichterbie kommen mag nait. Aark zel joe t pad wiezen, want ie binnen doar nog nooit laans kommen."
⁵ En Jozua zee tegen t volk: "Ie mouten joe nou kloarmoaken. Zörgt ter veur dat ie goud hemmel en schoon binnen, omreden de Heer zel mörgen n groot wonder doun, doar ie apmoal slim van opkieken zellen." ⁶ Tegen priesters zee Jozua: "Pakt verbondsaark op scholders en goat veur t volk aan." Dat deden ze.
⁷ Dou zee de Heer tegen Jozua: "Van vandoag òf aan zel Ik zörgen dat t haile volk Izrel joe n bult in reken het as laaider. Zai zellen waiten dat Ik noast joe stoa net zo as destieds bie Mozes. ⁸ Zeg tegen priesters dij aark droagen: 'As ie bie Jordoan kommen binnen, mout ie in t wotter stoan blieven.'" ⁹ Tegen Izrelieten zee Jozua: "Komt hier heer en lustert goud wat de Heer, joen God, zegd het wat of Hai doun zel. ¹⁰ Den zel ie begriepen dat God dij leeft, bie joe is en dat ie der op aan kinnen dat Hai Kananieten, Hethieten, Chiwwieten, Perizzieten, Girgazieten, Amorieten en Jebuzieten verjoagen zel. ¹¹ Lustert goud wat of ik joe zeg: Verbondsaark van de Heer van haile wereld, zel veur joe aan over Jordoan goan. ¹² Nou mout ie twaalf manlu oet stammen van Izrel kaizen, van elke stam ain. ¹³ Zo gaauw as priesters dij aark droagen van t verbond van de Heer, dij Heer over haile wereld is, heur vouten in t wotter zetten, zel der gain stroom meer wezen en zel t wotter oet t noorden as n daam stoan blieven."
¹⁴ Dou t volk tou t kaamp oet ging om over Jordoan te trekken, was t tied van oogsten, en den staait t wotter aaltied hoger as aans. ¹⁵ Priesters gingen veurop mit aark op scholder. Dou dij bie Jordoan kwammen en heur vouten doar in t wotter zetten, was t doan mit stromen. ¹⁶ n Hail ènd wieder op, bie stad Adam stoef bie Saretan, kwam t wotter in t èn en bleef stoan as n daam. Der stroomde gain wotter meer noar Dode Zee (dij ook wel Zolt Zee hait). Dou trok t volk over, tegen Jericho over. ¹⁷ Ondertied dat t volk over dreuge boom noar aanderkaant laip, bleven priesters mit aark doar op t dreuge stoan, tot ze der apmoal over hèn wazzen.