Jozua 24

Jozua zien leste tousproak

¹ Jozua raip ale stammen van Izrel bie nkander in Sichem. Oldsten, laaiders, richters en ofsieren mozzen noar veuren kommen, zee e. Dij gingen dou stoan veur stee doar God was. ² Dou zee Jozua tegen t haile volk: "Dit zegt de Heer, Izrel zien God tegen joe: 'n Haile zet leden hebben joen veurolden, Terach en zien zeuns Oabram en Nachor aan gunt kaant van Eufraat woond en aander goden eerd. ³ Mor Ik heb joen veurvoader Oabram doar heerhoald en noar Kanan brocht. Doar luit Ik hom deur t haile laand rond trekken. Ik heb hom n bult noazoaten geven: eerst zien zeun Isaak. ⁴ Dij kreeg twij zeuns: Joakob en Esau. Esau gaf Ik t heuvellaand van Edom, Joakob en zien kinder gingen noar Egypte. ⁵-⁶ Loater heb Ik Mozes en Aäron doar ook noar tou stuurd. Egypte wer bezöcht deur swoare ploagen. Mor Ik heb joe, dat is te zeggen, joen veurolders, doar vothoald en bie Raait Zee brocht. Egyptenoars vanzulm achter heur heer mit gevechtswoagens en peervolk. ⁷ Zai raipen zo haard as ze konden aan Mie om heur te helpen en Ik schoof n swaarde wolk tussen joe en Egyptenoars in. Dou luit ik boaren van zee over Egyptenoars hèn rollen en zo binnen ze aalmoal omhaals kommen. Ie hebben zo t rekent zulm zain wat Ik mit Egyptenoars doan heb. Dou heb ie joaren laank in woestijn omswonnen. ⁸ Op n duur brochde Ik joe in t laand van Amorieten aan oostkaant Jordoan. Dij vochten mit joe in t laand, mor Ik zörgde der veur dat ie t wonnen. Ik heb heur verdizzelwaaierd, zo kon ie heur laand in bezit nemen. ⁹ Dou kwam Balak, keunenk van Moäb, Sippor zien zeun, tegen joe in aksie. Hai luit Bileam, Beor zien zeun, ophoalen en vruig hom om joe te verfluiken. ¹⁰ Mor Ik wol nait noar Bileam lustern, en zo kon e in stee van verfluiken niks doun as te zegen. Zo heb Ik ter veur zörgd dat Balak niks tegen joe oetrichten kon. ¹¹ Dou bin ie Jordoan overstoken en bie Jericho kommen. t Volk doar wol tegen joe in aksie kommen. Ook Amorieten, Perizzieten, Kananieten, Girgazieten, Chiwwieten en Jebuzieten vochten mit joe. Mor Ik heb ter veur zörgd dat ie wonnen, ¹² En dat ze schietensbenaauwd veur joe op loop gingen, net as baaide keunenks van Amorieten aan gunkaant Jordoan. t Was nait deur joen sweerd en boog. ¹³ Ik heb joe laand geven doar ie nait op aarbaid haren en steden dij ie nait baauwd haren en doar ie toch in wonen kinnen. Ie kinnen wiendroeven eten van droevebozzen dij ie nait kweekt hebben en olieven van bomen dij ie nooit poot hebben.'"