Jozua 22

Stammen dij aan aander kaant Jordoan wonen, goan weerom

¹ Jozua raip manlu van stammen Ruben en Gad en haalfschaid Manasse bie nkander. ² Hai zee: "Ie hebben alles doan wat Mozes, de Heer zien knecht, zegd het en ook alles woar ik joe order tou geven heb. ³ Zo laank as joen volk verlet om joe haar, heb ie heur holpen. Ie hebben t aal krekt zo doan as de Heer, ons God, t wol. ⁴ De Heer haar d'aander stammen beloofd dat zai in vree wonen zollen in Kanan. En nou het Hai doan wat Hai heur touzegd haar. Van dij gevolgen dat ie nou weer noar hoes tou kinnen, noar t laand dat Mozes joe al geven het, aan aanderkaant Jordoan. ⁵ Mor dou der denk om dat ie krekt doun wat Mozes, de Heer zien knecht, joe zegd het: heb laifde veur de Heer, joen God, dou van haarten geern wat Hai zegd het en blief Hom aaltied traauw." ⁶ Dou nam Jozua ofschaaid van heur. Hai wenste heur de Heer zien zegen tou en zee dat ze noar hoes goan konden. Votdoalek gingen ze op pad. ⁷ Manlu van haalve stam Manasse gingen ook mit. Mozes haar ja aan aine haalfschaid laand geven aan oostkaant van Jordoan, in Basan. Jozua gaf aan aander haalfschaid n woonstee bie stammen aan westkaant van Jordoan.
⁸ Eer ze aan raais gingen zee Jozua tegen lu van Manasse: "Ie goan nou noar hoes mit n haile riekdom: n hail bult vij, zulver en gold, koper en iezer en n bult klaaieroazie. Ie hebben dat aalmoal joen vijanden ofwonnen. Dat mout ie dailen mit joen stamgenoten." ⁹ Zo nammen dij twij en haalve stam ofschaaid van aander Izrelieten in Silo, in t laand Kanan. Zai gingen noar heur aigen laand tou, Gilead, dat zai veroverd haren, zo as Mozes in opdracht van de Heer zegd haar.