Jozua 21

Oet ale stammen worden n poar steden aan noazoaten van Levi toupaart

¹-² Laaiders van femilies dij ofstamden van Levi kwammen in Silo bie priester Eleazar en Jozua en laaiders van ale aander stammen in Silo. Zai zeden: "Mozes het in opdracht van de Heer zegd, dat ie ons steden geven mozzen mit gruinlaand der omtou, veur ons vij." ³ Izrelieten deden wat de Heer zegd haar. Zai paartten aan Levieten steden tou in heur aigen kontraainen, dij deur t löt aanwezen werden.
⁴-⁵ t Eerste paart was veur noazoaten van Kehat dij van priester Aäron ofstamden. Heur femilies kregen dattien steden van stammen Judoa, Simeon en Benjamin. Aander noazoaten van Kehat kregen tien steden van stammen Efraïm, Dan en haalfschaid Manasse aan westkaant Jordoan.
⁶ Noazoaten van Gerson kregen dattien steden in kontraainen van stammen Issakar, Aser, Naftali en aander haalfschaid van Manasse.
⁷ Femilies van Merari kregen twaalf steden van stammen Ruben, Gad en Zebulon.
⁸ Zo hebben Izrelieten heur dizze steden mit gruinlaand toupaart zo as Mozes zegd haar in opdracht van de Heer.
⁹-¹⁰ Noazoaten van Kehat dij van Aäron ofstamden moggen t eerst lötten. Zai kregen negen steden, in kontraainen van stammen Judoa en Simeon. Noamen van dij steden wazzen: ¹¹-¹⁶ Hebron, Libna, Jattir, Estemoä, Cholon, Debir, Aïn, Jutta en Bet-Semes, mit gruinlaand der omtou. Stad Hebron was ain van de vluchtsteden. Hai lag in t baarglaand van Judoa en haitte doudestieds stad van Arba, (Arba was voader van Anak). t Laand en dörpen om Hebron tou haar Kaleb, Jefunne zien zeun, al in aigendom kregen, mor stad zulm en t gruinlaand der omtou was veur noazoaten van Aäron, net as dij aander aacht steden. ¹⁷-¹⁸ In Benjamin zien kontraainen kregen zai nog vaaier steden: Gibeon, Geba, Anatot en Almon, mit gruinlaand. ¹⁹ Zodounde kregen priesters, dij van Aäron ofstamden, mit nkander dattien steden.
²⁰-²⁶ Ale aander noazoaten van Kehat kregen tien steden mit gruinlaand in kontraainen van stammen Efraïm, Dan en haalfschaid Manasse aan westkaant Jordoan, dat is te zeggen: vaaier steden in Efraïm noamelk: Sichem in t baarglaand, ain van de zes vluchtsteden, Gezer, Kibsaïm en Bet-Choron, vaaier in Dan: Elteke, Gibbeton, Ajjalon en Gat-Rimmon, en nog twij in Manasse: Taänak en Jibleam.
²⁷-³³ Noazoaten van Gerson kregen dattien steden mit gruinlaand der bie in stammen Manasse aander kaant Jordoan, Issakar, Aser en Naftali: twij in Manasse, vluchtstad Golan in Basan en stad Beëstera, vaaier in Issakar: Kisjon, Daberat, Jarmut en Gannim, vaaier in Aser: Misal, Abdon, Chelkat en Rechob, en nog drij in Naftali: vluchtstad Kedes in Galileoa, Chammot-Dor en Kartan, mit gruinlaand.
³⁴-⁴⁰ Aander noazoaten van Levi, dat is te zeggen femilies van Merari, kregen twaalf steden mit gruinlaand der bie in stammen Zebulon, Ruben en Gad. Vaaier steden in Zebulon: Jokneam, Karta, Dimna en Nahalal, vaaier in Ruben: Beser, Jasa, Kedemot en Mefaät, en nog vaaier in Gad: vluchtstad Ramot in Gilead, Machanaïm, Chesbon en Jazer.
⁴¹-⁴² Zo kregen Levi zien noazoaten mit nkander achtenvatteg steden mit gruinlaand ter bie in kontraainen van ale Izrelieten.

⁴³ Zo het de Heer dit haile laand aan Izrelieten geven, zo as Hai t heur veurolders al beloofd haar. Zai hebben t in bezit nomen en binnen der wonen goan. ⁴⁴ Ze wazzen aan ale kanten vaaileg en gain vijand duurde heur meer te noa te kommen. De Heer haar ale vijanden in Izrelieten heur macht geven. ⁴⁵ De Heer het alles doan wat e heur beloofd het.