Jozua 20

Zes vluchtsteden aanwezen

¹ Dou zee de Heer tegen Jozua: ² "Izrelieten mouten nou dij vluchtsteden aanwiezen, doar Ik t al eerder mit Mozes over had heb, dat dij dat tegen joe zeggen zol. ³ As ain bie ongeluk n aander om t levent brocht het, nait mit opzet, den kin hai doarhèn vluchten. Man, dij dood van zien femilielid aigliek vreken mout, mag hom den niks doun. ⁴ Hai mout as de weerlicht moaken dat e in ain van dij vluchtsteden komt en doar bie stadspoort stoan goan en de oldsten van dij stad persies vertellen wat e doan het. Dij mouten hom permizzie geven om in heur stad te blieven en hom n stee geven doar e wonen kin. ⁵ As man dij zien femilie vreken mout, achter hom heer zit, maggen ze hom nait overlevern. Hai het t ja bie ongeluk doan en nait omdat e hom nait lieden mog. ⁶ Den mout e doar wonen blieven tot dat e veur t gericht west het. Nait eerder as dat ter n nije hogepriester is omdat de olde sturven is, mag e weerom goan noar zien aigen stad en zien aigen hoes tou."
⁷ Dou zunderden Izrelieten zes steden òf. Aan westkaant van Jordoan:
Kedes in Galileoa, in t heuvellaand van Naftali,
Sichem in t baarglaand van Efraïm
en Kirjat-Arba - dat is n aander noam veur Hebron - in t baarglaand van Judoa.
⁸ En aan aanderkaant Jordoan:
Beser in woestijn op hoogvlakte, aan oostkaant van Jericho, in kontraainen van stam Ruben,
en Ramot in Gilead in kontraainen van stam Gad,
en Golan in kontraainen van stam Manasse.
⁹ Elke Izreliet en ook elke boetenlander dij in Izrel woonde, kon noar ain van dizze steden vluchten as hai bie ongeluk ain om t leven brocht haar. Den mog dij zien femilie hom niks doun zo laank as hai nait veur t gericht west haar.