Jozua 2

n Vraauw oet Jericho helpt spionnen van Izrel

¹ Dou stuurde Jozua, zeun van Nun, twij spionnen op pad, oet Sittim vandoan, om kontraainen sekuur op te nemen. Benoam de stad Jericho. Dou zai in dij stad kommen wazzen, gingen zai noar t hoes van Rachab tou, n houer, om doar te overnachten. ² Mor keunenk van Jericho wer woarschaauwd: "Pas op! Der binnen hier vanoavend n poar Izrelitische kerels kommen om hier wat te lakschaauwen." ³ Hai stuurde Rachab bosschop: "Kom op mit dij kerels dij bie die in hoes binnen, want ze binnen kommen om t haile laand te bespionneren!" ⁴ Mor zai haar manlu bezied stopt en zee: "Joa wis! Der hebben n poar kerels bie mie west, mor ik wait nait woar ze heer kwammen. ⁵ Tegen duustern, vlak veur poort dicht ging, binnen ze ofstoken. Woarhèn wait ik nait. As ie gaauw binnen, kin ie heur nog wel inhoalen!" ⁶ Mor zai haar heur boven op t platdak brocht en onder vlasschoven dij doar lagen, bestopt.
⁷ Keunenk zien manlu juigen achter heur aan, kaant van Jordoan op, tot aan steden tou woar t wotter nait daip was. Doalek dou achtervolgers tou stad oet wazzen, wer poort weer gröndeld.
⁸ Veurdat baaide manlu sloapen gingen, kwam Rachab bie heur op t dak ⁹ en zee: "Ik wait dat de Heer joe dit laand geven het. Schrik veur joe zit ter goud bie ons in. Wie binnen apmoal doodsbenaauwd veur joe. ¹⁰ Wie hebben ja heurd dat, dou ie vot gingen tou Egypte oet, de Heer de Raait Zee dreug legd het, dat ie der deur konden. Wie hebben ook heurd dat ie baaide keunenks van Amorieten, Sihon en Og, aan gun kaant Jordoan versloagen en dood moakt hebben. ¹¹ Zodounde bin wie doodsbenaauwd veur joe worden en heb wie moudveren hangen loaten. Want de Heer, joen God, is God in hemel en op eerde. ¹² Ik heb goud veur joe west. Sweert mie den in noam van de Heer, dat ie ook goud veur mien volk wezen zellen. ¹³ Geeft mie t bewies dat ik ter jechteg op aan kin, dat ie mien voader en mouder en bruiers en zusters mit heur hoesholdens mit vree loaten, dat zai t levent ter òf brengen." ¹⁴ Zai zeden tegen heur: "Staarvenswoar! Gainain van joe zel wat overkommen, as ie gain mensk vertellen dat wie hier west hebben. Den zeg wie joe tou dat wie goud om joe denken zellen, as de Heer ons dit laand geft." ¹⁵ Dou luit Rachab heur aan n taauw deur t roam omdeel zakken, want heur hoes ston op stadsmuur. ¹⁶ "Ie mouten drij doag bezied kroepen in baargen, aans kriegen manlu dij achter joe heer zitten joe nog te pakken", zee ze. "As ze weerom goan binnen noar stad tou, kin ie vaaileg overaal hèn goan." ¹⁷ Spionnen zeden: "Wie zellen ons wis en zeker holden aan wat wie joe touzegd hebben! ¹⁸ Mor den mout ie wel, as wie t laand binnen trekken, dat rooie koord aan t roam binden, woar ie ons deur omdeel zakken loaten hebben. En ie mouten joen voader en mouder, joen bruiers en aal joen volk, bie nkander hoalen bie joe in hoes. ¹⁹ As ain van joe in boeten komt, doar stoan wie nait veur. Mor wie stoan der wel veur dat ter bie joe in hoes gainent wat overkomt. ²⁰ Mor as ie ons verroaden, goan wie vrij oet." ²¹ "Dat is goud", zee Rachab, "en nou moaken dat ie votkommen!" Dou zai vot wazzen, bon zai t rooie koord aan t roam. ²² Baaide spionnen gingen op pad en kropen drij doagen bezied in baargen tot achtervolgers weerom gingen. Want achtervolgers haren haile buurt ofstruund mor heur nait vonden. ²³ Dou eerst kwammen spionnen weer veurndag, gingen Jordoan over weerom noar Jozua, Nun zien zeun, en vertelden hom aal heur wederwoardegheden. Ze zeden: "Wie binnen der wis van dat de Heer ons t haile laand geven het. Elkenain is doodsbenaauwd veur ons."