Jozua 19

Stam Dan zien kontraainen

⁴⁰ Zeuvende paart was veur ale femilies van stam Dan. ⁴¹-⁴⁶ In heur kontraainen lagen dizze steden: Sora, Estaöl, Ir-Semes, Saällabbin, Ajjalon, Jitla, Elon, Timna, Ekron, Elteke, Gibbeton, Baälat, Jehud, Bene-Barak, Gat-Rimmon, Me-Hajjarkon en Rakkon mit kontraainen om Jafo tou. ⁴⁷ Mor loater binnen ze heur laand kwiet worden en dou binnen ze op stad Lesem òf goan in t hoge noorden. Dij hebben ze veroverd en ale lu doar doodmoakt. Dou binnen ze doar zulm wonen goan en hebben noam van stad veraanderd in Dan omreden heur veurvoader haitte zo. ⁴⁸ Aal dizze steden mit dörpen dij doarbie heurden werden aan femilies van stam Dan toupaart.