Jozua 18

Stam Benjamin zien kontraainen

¹¹ Paart dat ter oetlöt wer veur ale femilies van stam Benjamin lag tussen Judoa en Jozef heurent.
¹² In t noorden begon grens van heur laand bie Jordoan, den omhoog bie noordkaant van baargrug bie Jericho laans, en op t westen aan deur t baarglaand hèn aan woestijn van Bet-Awen tou. ¹³ Doarvandoan op stad Luz aan, dij ook Betèl hait, aan zuudkaant van baargrug bie Luz laans, en den noar Atrot-Addar dij op t gebaargte aan zuudkaant van Leeg-Bet-Choron ligt. ¹⁴ Den laip grens mit n bocht noar t zuden bie westkaant van t gebaargte laans, aan Kirjat-Baäl tou. Dizze stad, dij ook wel Kirjat-Jearim hait, is van stam Judoa. Dit is westgrens.
¹⁵ Zuudgrens laip stoef bie Kirjat-Jearim laans noar puunbulten en den noar Neftoächdob tou. ¹⁶ Den laip e aan onderkaant van baarg laans doar t Bin-Hinnomdaal begunt, aan noordkaant van Refaïetenvlakte, en wieder deur t Hinnomdaal noar zudelke hellen van baarg doar Jeruzalem op ligt en wieder noar Rogelbron. ¹⁷ Den muik hai n bocht noar t noorden noar Zunnebron tou, doarvandoan noar Gelilot liek tegen Adummimpas over. Den noar beneden noar stain van Bohan. Dij Bohan was n zeun van Ruben. ¹⁸ Bie noordkaant laans van baargrug dij t oetzicht het op vlakte van Jordoan. ¹⁹ Bie noordkaant laans van baargrug bie Bet-Chogla, en op n duur komt grens den oet bie noordpunt van Dode Zee, doar Jordoan in zee komt. Dit was zuudgrens.
²⁰ Jordoan was oostgrens.
Dit wazzen rondom heer grenzen van stam Benjamin zien paart. ²¹-²⁸ Zai kregen twaalf steden mit dörpen dij doar bie heurden: Jericho, Bet-Chogla, Emek-Kesis, Bet-Araba, Semaraïm, Betèl, Awwim, Para, Ofra, Kefar-Haämoni, Ofni en Geba. En nog vattien aander steden mit heur dörpen: Gibeon, Rama, Beërot, Mispa, Kefira, Mosa, Rekem, Jirpeël, Tarala, Sela, Elef, Jebusi (dat is Jeruzalem), Gibat en Kirjat-Jearim. Dit waren kontraainen dij Benjaminieten toupaart werden.