Jozua 16

Laand dat noazoaten van Jozef kregen

¹ Zuudgrens van t laand dat noazoaten van Jozef bie t lötten kregen, begunde aan oostkaant bie Jordoan bie Jericho, ging deur woestijn en den omhoog deur t baarglaand noar Betèl. ² Van Betèl noar Luz en doar vandoan noar Atarot, in kontraain doar Arkieten wonen. ³ Den laip grens noar Luz, en doar vandoan noar Atarot, in kontraain van Jafletieten, zowat aan Leeg-Bet-Choron tou, en wieder stad Gezer. Grens holdt op bie Middellandse Zee. ⁴ Jozef zien noazoaten, dat is te zeggen stam Manasse en Efraïm kregen dit aarfdail.
⁵ Dit wazzen grenzen van pervinzie dij Efraïmieten kregen:
heur zuudgrens begunde aan oostkaant van Atrot-Addar en ging noar Hoog-Bet-Choron, ⁶ -⁸ en doar vandoan noar t westen, aan Middellandse Zee tou.
Noordgrens begunde bie stad Mikmetat, den noar t westen noar stad Tappuach en doar vandoan bie beek Kana laans aan Middellandse Zee tou.
Van Mikmetat ging oostgrens mit n bocht noar t zuden noar stad Taänat-Silo, omdeel noar Janoach, Atarot, Naärat, stoef bie Jericho laans aan Jordoan tou.
Dit wazzen grenzen van t aarfdail van Efraïm.
⁹ Zai kregen der ook nog n stok of wat steden mit heur dörpen bie dij in pervinzie van stam Manasse lagen. ¹⁰ Liekewel hebben Efraïmieten Kananieten nait votjagd oet Gezer, dat dij wonen doar nog aaltied bie heur. Mor Efraïmieten hebben t wel kloar kregen dat lu van Gezer haard veur heur waarken mouten.

17

¹ t Löt het ook oetwezen wat dail van t laand stam Manasse kreeg. Manasse was oldste zeun van Jozef.
Manasse zien oldste zeun Makir, voader van Gilead, was n alderiezelkste vechtersboas en doarom haar hai landstreken Gilead en Basan kregen aan oostkaant Jordoan. ² Aander noazoaten van Manasse kregen bie t lötten laand aan diskaant Jordoan. Dat wazzen Abiëzer, Chelek, Asriël, Sekem, Chefer en Semida, aaltemoal stamvoaders van femilies. ³ Ain van heur, Chefer, zeun van Manasse zien klaainzeun Gilead, haar n zeun, Selofchad, dij allenneg dochters haar. Zai haitten Machla, Noä, Chogla, Milka en Tirsa. ⁴ Dizze wichter gingen noar priester Eleazar, Jozua en laaiders van t volk en zeden: "De Heer het tegen Mozes zegd, dat wie net zo goud n aarfdail hebben mouten as manlu van ons stam." Dou gaven ze heur ook n aarfdail, omdat de Heer dat zegd haar. ⁵ Aan noazoaten van Manasse werden dus tien laandstreken toupaart, behaalve dij ze al kregen haren aan aanderkaant Jordoan, dat is te zeggen Gilead en Basan. ⁶ Want vraauwlu van stam Manasse kregen net zo goud n aarfdail as manlu. t Laand Gilead was al toupaart aan zien aander noazoaten.
⁷ In t noordwesten swette pervinzie van stam Manasse aan stam Aser.
Zuudgrens ging van Mikmetat, dat aan oostkaant van Sichem ligt, noar t zuden tou noar Jasub, dat bie welput van Tappuach ligt. ⁸ t Laand om Tappuach tou is van stam Manasse, mor stad Tappuach zulm, dij op grens ligt, is van Efraïmieten. ⁹ Van Tappuach òf ging zuudgrens bie heuvels omdeel noar beek Kana en doar bie laans westkaant oet aan Middellandse Zee tou. n Stok of wat steden aan zuudkaant van beek wazzen van Efraïm, mor dij streek doar heurde nog bie pervinzie van Manasse.
¹⁰ In t noordwesten swette pervinzie van stam Manasse aan stam Aser, in t noordoosten aan stam Issakar. ¹¹ In t laand van dizze baaide stammen haar Manasse boetendes nog verschaaiden steden: Bet-Sean, Jibleam, Dor, Endor, Taänak en Megiddo, elk mit zien stadjes. ¹² Mor lu van Manasse konden Kananieten, dij in dizze steden woonden, nait boas worden, dat dij bleven doar zunder woord zunder wies in wonen. ¹³ En of wazzen Izrelieten ook staark genog om heur fiks aan t waark te zetten, votjoagen konden ze heur nait.