Jozua 15

Wat of stam Judoa kreeg

¹ Lu van stam Judoa kregen bie t lötten t laand dat in t zuden aan grens van Edom tou gaait, aan woestijn Tsin tou, haildaal in t zuden.
²-⁴ Heur grens aan zuudkaant begon bie zudelke punt van Zolt Zee, den onder Schorpiounenpas deur, noar woestijn Tsin tou omhoog bie zuudkaant van Kades-Barnea laans, bie Chesron laans omhoog noar Adar en mit n bocht noar Karka, bie Asmon laans, kwam grens bie beek van Egypte oet en doar bie laans laip e op n duur aan Middellandse Zee tou. Dat is veur hail Izrel zuudgrens.
⁵ Oostgrens van stam Judoa was haile westkaant van Zolt Zee tot doar Jordoan in Zolt Zee oetkomt.
Noordgrens begon op aigenste stee en ⁶ den omhoog noar Bet-Chogla tou, boven Bet-Araba laans en omhoog noar stain van Bohan tou (dij Bohan was n zeun van Ruben). ⁷ Wieder van daal Achor omhoog noar stad Debir en den mit n bocht noar Gilgal, stoef tegenover Adummim. Pas aan zuudkaant van beek, bie drinkeldob van Zunnebron laans komt noordgrens den oet bie Klanderijbron. ⁸ Doar vandoan ging grens omhoog deur t daal van Bin-Hinnom noar zudelke baarghellen van Jebusietenbaarg, dat is te zeggen van Jeruzalem. En doar vandoan noar top van baarg dij aan westkaant van t Hinnomdaal ligt en dij t Refaïetendaal aan noordkaant ofslut. ⁹ Den muik grens n bocht van baargtop òf noar bron van Me-Neftoächdob en kwam zo bie ruïnes (puunbulten) op baarg Efron, en weer n bocht noar Baäla, dat nou Kirjat-Jearim hait. ¹⁰ Van Baäla weer n bocht noar t westen tou, noar baarg Seïr, en wieder bie noordelke hellen van baarg Jearim laans (dij nou Kesalon hait), en den omdeel noar Bet-Semes en wieder noar Timna, ¹¹ doar vandoan noar noordelke hellen van Ekron, mit n bocht noar Sikkaron, den bie baarg Baäla laans noar Jabneël, en op t lest kwam e oet bie Middellandse Zee, dij westgrens van lu van Judoa was.
¹² Dit wazzen rondom grenzen van stam Judoa.