Jozua 13

Kontraainen dij nog veroverd worden mouten

¹ Dou Jozua stafold worden was, zee de Heer tegen hom: "t Ènd is in zicht, hest nait laank meer te goan. Mor der is nog n hail bult laand dat veroverd worden mout:
² t Haile laand van Filistijnen, doar vief keunenks regaaiern over vief steden: Gaza, Asdod, Askelon, Gat en Ekron; en t haile laand van Awwieten in t zuden. ³ Ook heb ie t laand nog nait veroverd, dat begunt bie Sichor, dat is te zeggen bie grens van Egypte, in t noorden tot aan Ekron tou. Aal dizze kontraainen heuren nog bie t laand Kanan.
⁴ En doar heurt haile kontraain in t noorden ook nog bie, van Ara òf, n stad dij aan Sidoniërs heurt, aan stad Afek tou, bie grens van Amorieten.
⁵ Ook heb ie kontraainen van Gebol nog nait veroverd, en haile Libanon oostelk van Gebal, van Baäl-Gad, aan zuudkaant van Baarg, tot Hamatpas tou, ⁶-⁷ dat is t haile gericht van Sidon, van Libanon òf tot Misrefot-Maïm tou. Ale Sidoniërs dij doar wonen, zel Ik veur Izrelieten op loop joagen. Heur laand mostoe aan Izrelieten touwiezen, aan tiendaalf stam. Dat heb Ik ja bevolen. Der mout om löt worden wat stok elke stam, krigt. Allee, verdail t vot mor!"