Jozua 12

Twij keunenks aan oostkaant Jordoan, dij heur kontraainen Izrelieten onder

laaiden van Mozes veroverd hebben ¹ Onder laaiden van Mozes haren Izrelieten aal t laand van baaide keunenks aan oostkaant van Jordoan veroverd en in bezit nomen. Van Arnon-daal òf tot aan baarg Hermon aan tou in t noorden.
² Aine was Sichon, keunenk van Amorieten, in stad Chesbon. Hai was boas over zudelke haalfschaid van t laand Gilead, dat is te zeggen kontraainen tussen beek Arnon aan zuudkaant en beek Jabbok aan noordkaant. Zien keunenkriek ging in t zuudoosten aan stad Aroër tou, dij haalfweg beek Arnon ligt, tot aan beek Jabbok tou, doar t laand van Amorieten begunt. ³ Westgrens van zien riek was Leegte bie Jordoan, van t meer van Kinneret in t noorden, aan Zolt Zee in t zuden tou. Ook kontraainen aan oostkaant Zolt Zee, kaant van Bet-Hajjesimot en doar t Pisgagebaargte begunt, heurden der bie.
⁴ Aander keunenk dij ze versloagen haren, was Og, keunenk van Basan, ain van leste Refaïeten (dat wazzen reuzen). Hai haar n pelaais in Asterot en in Edreï. ⁵ Hai regaaierde over t laand van baarg Hermon en stad Salka in t noorden, over hail Basan aan grens van Gesur en Maäka in t oosten tou, en over noordelke haalfschaid van Gilead, aan t laand van Sichon tou.
⁶ Onder laaiden van Mozes, de Heer zien knecht, haren Izrelieten dizze baaide keunenks overwonnen, en Mozes haar t laand verdaild onder stammen Ruben en Gad en haalfschaid Manasse.