Jona 1

Jona zien opdracht en vlucht

¹ t Woord van de Heer kwam tot Jona, zeun van Amittai: ² "Moak joe raaisveerdeg en goa noar Ninevé dij grode stad, zeg heur aan dat heur verdurvenhaid tot Mie deurdrongen is." ³ Mor Jona ging aan raais om te vluchten noar Tarsis, bie de Heer vandoan, hai ging noar Jafo, von doar n schip dij noar Tarsis goan zol, betuil t raaisgeld en ging aan boord om mit heur noar Tarsis te goan, bie de Heer vandoan.
⁴ Mor de Heer bestelde n haarde wind over zee en der stook n swoare störm op, t schip kon ale ogenblikken stokkend sloagen worden. ⁵ t Scheepsvolk kreeg t benaauwd en elk raip zien aigen god aan en zai gooiden loaden in zee om t schip mor lichter te kriegen. Jona was in t roem van t schip goan en haar zok doar deel legd. Hai was in daipe sloap valen. ⁶ Kaptaain kwam bie hom en zee: "Hou kin ie toch zó sloapen. Man kom in t èn en roup joen god aan. Meschain dat dij god zok om ons bekommert, dat wie nait vergoan."
⁷ En zai zeden tegen nkander: "Kom, loat wie lötten, den zel wie waiten om wèl dit onhaail over ons komt." Zai deden t en t löt vuil op Jona. ⁸ Dou zeden zai tegen hom: "Zeg ie ons toch deur wèl zien schuld dit onhaail over ons komt, wat heb ie mit dizze raais veur en woar kom ie heer, wat is joen voaderlaand, tou welk volk bin ie?" ⁹ Hai zee tegen heur: "k Bin n Hebreeër, ik dain de Heer, God van de hemel, dij de zee en t dreuge moakt het." ¹⁰ Dou werden dij manlu doodsbenaauwd en zai zeden tegen hom: "Wat heb ie wel doan", want dij mannen wozzen dat hai veur God op vlucht was bie de Heer vandoan. Dat haar hai heur ja verteld. ¹¹ Zai vruigen hom: "Wat mout wie mit joe doun, dat zee nait langer tegen ons te keer gaait. Zee wordt ja aal roeger en roeger." ¹² Hai antwoordde heur: "Neem mie mor en gooi mie in zee, den zel zee zok bedoaren. Want k wait hail wel dat om mie dizze störm over joe komt." ¹³ Mor t scheepsvolk ging aan t roeien om t schip nog aan laand te kriegen. Mor ze kloarden t nait, want zee ging al meer tegen heur te keer. ¹⁴ En zai raipen de Heer aan: "Och Heer, loat ons toch nait omhaals kommen om t levent van dizze man en reken ons t nait tou as t bloud van n onschuldege. Ie Heer, Ie doun ja wat Joe gouddunkt. Ie hebben ja doan zo as Ie dochten dat t goud was." ¹⁵ Dou nammen zai Jona, gooiden hom in zee en zee wer stil. ¹⁶ En t scheepsvolk kreeg daip ontzag veur de Heer; zai slachtten Hom n ovver en deden Hom geloftes. ¹⁷ En de Heer bestelde n grode vis, dij Jona deurslook en Jona was drij doagen en drij naachten in t ingewand van dij vis.