Hooglaid 1

Hoofdstuk 1

¹ Dit is t mooiste laid van de laifde, n laid van Salomo.

(zai:) ² Bedek mie mit dien kuskes, mit kuskes van dien mond.
t Vuilen van dien laifde is mie lekkerder tou as goie wien.
³ Dien eulie is kostelk om te roeken;
Klaank al van dien noam is net as zuvere eulie.
Doarom binnen jonge wichter aalmoal gek op die.
⁴ Neem mie mit; wie goan der vandeur.
Breng mie noar dien woonstee, mien keunenk!

(wichter van Jeruzelem:) Loat ons blied wezen en jubeln over die.
Loat ons snaren van dien laifde,
dij zuiter is as de beste wien.
Elk mout ja wel wies mit die wezen.

(zai:) ⁵ Donker van vèl bin ik, wichter van Jeruzelem,
mor evenzogoud mooi !
Donker en mooi as tìnten van Kedar;
mooi en donker as wandklaiden van Salomo.
⁶ Kiek mie der nait op aan, dat ik donker van vèl bin:
zun het mie verbraand.
Mien bruiers haren t op mie veurzain,
want ik mos bie heur droevetoenen wacht holden;
mien aigen droevetoen kwam ik hail nait aan tou!
⁷ Vertel mie toch, doe, alderlaifste van mie,
woarstoe dien schoapen waaiden letst;
woarstoe touholdst, as zun op t hoogste is,
en kudde rusten mout?
Den huif ik nait in t veld omswinden,
nait noar die zuiken bie kuddes van dien kammeroaden.

(wichter:) ⁸ Astoe nait waist, woar ik touhol,
doe, aldermooiste maank de wichter,
goa hom den achternoa in t voutspoor van zien kudde;
loat dien segen waaiden bie tìnten van de hedders.

(hai:) ⁹ Doe bist mie tou, mien laif wicht,
as n tuugpeerd veur farao zien woagen.
¹⁰ Wat lieken dien wangen mooi tussen dien oorhangers!
Wat komt dien haals mooi oet mit dat koralensnoer!
¹¹ Hangers van gold zel wie veur die moaken loaten,
mit zulvern bèltjes.

(zai:) ¹² As mien keunenk aanzit aan zien toavel,
hangen geuren van mien nardus om hom tou.
¹³ Mien laiverd is mie tou
as n ponkje mirre, dat tussen mien bòrsten rust,
¹⁴ as n trös hennabloumen oet droevetoenen van Engedi.

(hai:) ¹⁵ Wat bistoe mooi, mien laifke, wat bistoe mooi!
Dien ogen lieken wel doefkes!

(zai:) ¹⁶ En doe bist zo mooi, mien laif, zo zaacht.
Ons bèr is hier in t vrizze gruin.
¹⁷ Ceders binnen gebinten van ons hoes
en wanden van t hoes binnen cypressen.