Genesis 6

Noach - de grode vloud

⁵ De HEER zag hou slecht of mensk op eerde was en dat allenneg verkeerde dingen bie hom opkwammen. ⁶ De HEER haar beraauw dat Hai mensk op eerde schoapen haar. Dat verdrutte Hom aldernoarst. ⁷ En de HEER zee: "Ik zel de mensken dij Ik schoapen heb, oetruden van eerde. Mensken, en aal t vij ook, kroepende daaier en vogels in lucht, want Ik heb der beraauw van dat Ik heur schoapen heb." ⁸ Bloots Noach von genoade in ogen van God.
⁹ Dit is t levensverhoal van Noach. Noach was onder ale mensken in zien tied n rechtschoapen kerel, doar niks op aan te maarken was. Noach wandelde mit God. ¹⁰ Hai kreeg drij zeuns: Sem, Cham en Jafet. ¹¹ God zag dat eerde verdurven was. Eerde was vol geweld. ¹² En God bezag eerde en woar: dij was verdurven, omreden aal wat leefde was op t verkeerde pad goan.
¹³ God zee tegen Noach: "t Zel tied worden dat aan aal wat leeft n ènd komt, want deur heur schuld is eerde vol ongerechteghaid. ¹⁴ Moak die van goferholt ² n aark. Mit vakken mostoe dij moaken en dij aan binnen- en boetenkaant in de teer zetten. ¹⁵ En zo zelstoe aark moaken: lengte van aark mout drijhonderd èl wezen, bredte fiefteg en hoogte datteg èl. ¹⁶ Doe most ter n dak op moaken mit n roam, en dij n èl van bovenòf open loaten. Moak ingang van aark aan ziedkaant. Baauw n onder-, n middel- en n bovendek in aark. ¹⁷ Eerdoags loat Ik n wottervloud over eerde kommen om aal wat oam het onder hemel, oet te ruden. Op eerde zel alles omkommen. ¹⁸ Mor mit die zel Ik mien verbond sluten. Doe zelst in aark goan, doe mit dien zeuns, dien vraauw en vraauwen van dien zeuns. ¹⁹ En doe zelst van ale leventege wezens twij in aark brengen, ain mannelk en ain vraauwelk, om ze mit die in t levent te holden. ²⁰ Van ale soorten van vogels, van vij en van daaier dij over t laand kroepen, zellen der twij bie die kommen, dat ze in leven blieven. ²¹ En doe most van alles wat eten wordt, verzoameln en opsloagen, dastoe en zai te eten hebben." ²² En Noach dee t. Krekt zo as God hom t zegd haar.

7

¹ Dou zee de HEER tegen Noach: "Goa in de aark, doe en dien haile femilie, want in mien ogen bistoe de ainegste dij deugt van dit geslacht. ² Van ale baisten dij kouster ³ binnen mostoe manjes en wiefkes, zeuven span, mitnemen, en van baisten dij nait kouster binnen ain span, n manje en n wiefke. ³ Ook zeuven span van vogels, mannelk en vraauwelk, om op haile eerde heur soort in stand te holden. ⁴ Want over zeuven doagen zel Ik t vatteg doagen en vatteg nachten op eerde regen loaten. En alles wat ter is, wat Ik moakt heb, zel Ik van eerde wisken." ⁵ En Noach dee alles wat de HEER zegd haar.
⁶ Noach was zèshonderd joar dou wotter van vloud over eerde kwam. ⁷ Om aan vloud te ontkommen, ging Noach mit zien zeuns, zien vraauw en vraauwen van zien zeuns, in aark. ⁸ Van koustere daaier en van daaier dij dat nait wazzen, van vogels en van alles wat op eerde kropt, ⁹ kwammen spannen bie Noach in aark: manje en wiefke, zo as God Noach t zegd haar. ¹⁰ Zeuven doagen loater kwam wotter van vloud over eerde.
¹¹ Op zeuventiende dag van twijde moand in t zèshonderdste levensjoar van Noach kolkte en spoot t wotter van oervloud omhoog en sluzen van hemel werden openzet. ¹² Regen spoulde vatteg doagen en vatteg naachten op eerde. ¹³ Aigenste dag nog ging Noach mit Sem, Cham en Jafet, zeuns van Noach in aark. Zien vraauw en de drij vraauwen van zien zeuns mit heur, ¹⁴ zai en ale soorten van wilde daaier, t vij in ale soorten en aal t kroepende gedaaierte dat op eerde kropt in ale soorten en t gevogelte in ale soorten, ale sjilpers, en aal wat vleugels haar. ¹⁵ Van aal wat leefde, kwammen ze as span bie Noach in aark. ¹⁶ Dij der kwammen, kwammen as manje en wiefke, van aal wat leeft zo as God hom opdroagen haar. En de HEER dee zulm deur achter Noach dicht. ¹⁷ Dou kwam vloud over eerde, vatteg doagen laank. t Wotter wer hoger en hoger en aark wer optild en kwam lös van t laand. ¹⁸ Der kwam aal meer wotter, t kwam aal hoger, aark begunde te drieven. ¹⁹ t Wotter wer aldernoarste hoog op eerde en ale hoge baargen, dij der onder hemel binnen, kwammen der onder. ²⁰ Baargen stonden onder wotter en dou kwam t nog vieftien èl hoger. ²¹ Aal wat leefde, zok bewoog op eerde, vogels, vij, wilde daaier, ale kroepende daaier dij op eerde touhuilen en ale mensken kwammen om. ²² Aal wat levent in zok haar, aal wat op t dreuge was, ging dood. ²³ Aal wat ter was op t laand wer oetrud. Oetrud werden mensken, vij, t kroepend gedaaierte en vogels in lucht. Allenneg Noach bleef der over mit wat bie hom was in aark. ²⁴ t Was áin wottervlakte op eerde, honderdfiefteg doagen.

8

¹ Dou dochde God om Noach, om ale wilde daaier en aal t vij dat bie hom in aark was. God luit wind over eerde waaien en t wotter zakte. ² t Wotter van oervloud kolkte en spoot nait laanger, sluzen van hemel gingen dicht, regen huil op. ³ t Wotter zakte stoadegaan. In n tiedsbestek van honderdfiefteg doagen wer t oardeg leger. ⁴ Op zeuventiende dag van zeuvende moand laip aark vaast op baargen van Ararat. ⁵ Aan tiende moand tou bleef t wotter zakken. Op eerste dag van tiende moand kwammen baargtoppen weer veur t zicht.
⁶ En vatteg doagen loater dee Noach t roam open dij hai in aark moakt haar. ⁷ Hai luit n roaf lös, dij aal in en oet vloog tot t wotter vot was. ⁸ Dou luit hai n doef lös om te zain of t wotter op eerde al zakte. ⁹ Mor doef von gain dreug stee om deel te strieken, wotter ston nog overaal. Noach stook zien haand oet, pakte hom en zette hom weer bie zok in aark. ¹⁰ Hai wachtte nog zeuven doagen. Dou luit hai doef vannijs lös oet aark. ¹¹ Tegen oavend kwam doef weer bie hom en joa hur, hai haar n vris oliefblad in zien snoavel. Zo wos Noach dat t wotter op eerde zakt was. ¹² Hai wachtte nog zeuven doagen veur hai doef weer vlaigen luit. Dóu kwam e nait weerom. ¹³ In zien zèshonderdeerste joar, op eerste dag van eerste moand, was t wotter van t laand òf. Dou dee Noach t loek van aark òf, keek noar boeten en zag dat t laand ofdreugd was. ¹⁴ Op zeuventwinnegste van twijde moand was eerde dreug.
¹⁵ Dou zee God tegen Noach: ¹⁶ "Goa tou aark oet, doe en dien vraauw, dien zeuns en vraauwen van dien zeuns. ¹⁷ Loat ale daaier dij bie die binnen, aal wat leeft, vogels, vij en ale kroepende daaier op eerde, mit die tou aark oetgoan. t Zel der van wemeln, ze zellen vruchtboar wezen en op eerde in tal tounemen." ¹⁸ En Noach ging der oet mit zien zeuns, zien vraauw en vraauwen van zien zeuns. ¹⁹ Ale wilde daaier, ale kroepende daaier, ale vogels en aal dat zok op eerde beweegt, soort bie soort, gingen tou aark oet.
²⁰ Dou baauwde Noach n altoar veur de HEER en hai kreeg van aal t koustere vij en ale koustere vogels en brochde braandovvers op t altoar. ²¹ Dou God vernam hou lekker of t rook, zee Hai bie zokzulm: "Ik zel eerde nait weer verfluiken om de mensk, al is wat in t menskehaart omgaait ook min van jongs òf aan. Ik zel nait weer doun wat Ik nou doan heb en aal wat leeft ombrengen.
²² Zo laank as wereld bestoan blift
zellen van nou òf aan tieden van zaaien en oogsten,
kòlle en hètten,
zummer en winter, dag en naacht
nait weer opholden."