Genesis 1

Scheppen van hemel en eerde

¹ In t begun het God hemel en eerde schoapen. ² Eerde was onlaand en t duustern lag over oervloud en Gaist van God zweefde over t wotter.
³ God zee: "Loat ter licht kommen!" En der was licht. ⁴ God zag dat t licht goud was; God muik schaaiden tussen licht en duuster. ⁵ God nuimde t licht dag en t duustern nuimde Hai naacht. t Haar oavend west en t haar mörgen west, eerste dag.
⁶ God zee: "Der zel n gewulf wezen midden in t wotter, dat wotter van wotter schaaidt." ⁷ God muik dat gewulf en Hai brocht schaaiden aan tussen wotter dat onder dat gewulf was en dat ter boven was. En zo wer t. ⁸ En God nuimde t gewulf hemel. Dou haar t oavend west en t haar mörgen west, twijde dag.
⁹ En God zee: "Loat t wotter onder hemel noar ain stee bie nkander stromen en t dreuge veur t zicht kommen." En zo wer t. ¹⁰ En God nuimde t dreuge laand en wotters dij zok verzoameld haren, nuimde Hai zee. En God zag dat t goud was.
¹¹ En God zee: "t Laand zel vol worden mit gras, mit kruden dij zok zulm weer oetzaaien, vruchtbomen dij noar heur soort vruchten droagen, mit pitten dij op t laand valen." En zo wer t. ¹² En t laand kwam vol mit gras, mit kruden dij zok zulm noar soort weer oetzaaien en vruchtbomen mit pitten, noar heur soort. ¹³ En God zag dat t goud was. Dou haar t oavend west en t haar mörgen west, daarde dag.
¹⁴ God zee: "Loaten der lichten kommen aan t hemelgewulf om dag en naacht te schaaiden en om taikens te wezen dij vaaste tieden en doagen en joaren aanduden. ¹⁵ En zai zellen lichten wezen aan t gewulf van hemel om licht te geven op eerde." En zo wer t. ¹⁶ En God muik baaide grode lichten. t Grootste licht veur t bepoalen van dag, t klaainere licht veur naacht en steerns ook. ¹⁷ God zette heur aan hemelboog om op eerde licht te geven. ¹⁸ Om dag en naacht te bepoalen en om onderschaaid te moaken tussen t licht en t duuster. En God zag dat t goud was. ¹⁹ Dou haar t oavend west en t haar mörgen west, vaaierde dag.
²⁰ En God zee: "t Zel wemeln van leven in t wotter en vogels zellen vlaigen onder t hemelgewulf over t laand." ²¹ Dou muik God grode zeedaaier en aal t vrummelnde leven doar dat wotter van wemelt, aalmoal noar heur oard, en verschaaidenhaid van vogels, elk noar heur oard. En God zag dat t goud was. ²² En God zegende heur en zee: "Weest vruchtboar en wordt talriek en moakt, dat t wotter van zee vol wordt. En loat vogels groot in tal worden op t laand." ²³ Dou haar t oavend west en t haar mörgen west, viefde dag.
²⁴ God zee: "Eerde mout leventege wezens oplevern, elk noar zien oard: vij, kroepende daaier en wilde daaier, aalmoal noar heur oard." En zo was t. ²⁵ God muik wilde daaier, aalmoal noar heur oard en alles wat op grond kropt noar zien oard. En God zag dat t goud was.
²⁶ God zee: "Loat Wie mensken moaken noar Ons beeld, dij op Ons lieken. Dij zellen boas wezen over vizzen in zee, over vogels in lucht en over t vij en over haile eerde en over alles wat op eerde omkropt." ²⁷ En God muik mensk noar zien beeld. Noar t beeld van God muik Hai hom: man en vraauw muik Hai heur. ²⁸ En God zegende heur en Hai zee tegen heur: "Weest vruchtboar en wordt talriek. Moakt eerde vol, onderwaarpt heur, weest boas over vizzen in zee, over vogels in lucht en over ale daaier dij op eerde omkroepen."
²⁹ En God zee: "Ik geef joe aal t gewas dat zoad dragt op eerde, en ale bomen dij vrucht droagen; dij binnen veur joe om van te eten. ³⁰ Mor aan ale daaier op t veld en ale vogels in lucht en aal wat op eerde omkropt doar leven in is, geef Ik aal t gruin as eten." En zo wer t. ³¹ En God zag aal wat Hai schoapen haar en t was haile goud. Dou haar t oavend west en t haar mörgen west, zèsde dag.

2

¹ Zo kwammen hemel en eerde en aal wat ter bie heurt, kloar. ² Op zeuvende dag haar God t waark doar Hai mit dounde west haar, kloar en op zeuvende dag rustte Hai van ale waark dat Hai volbrocht haar. ³ En God zegende zeuvende dag en haailegde dij, omreden Hai het dou oetrust van aal t waark dat Hai scheppend tot stand brocht haar.
⁴ Dit is t reloas van hemel en eerde, dou ze schoapen werden.