2 Soamuël    10

¹ n Zetje loater kwam Nachas, keunenk van Ammonieten, oet tied. Zien zeun Chanun volgde hom op. ² Doaved dochde: "Ik zel zörgen dat ik n goie verstandholden krieg mit Chanun, net zo as ik haar mit zien voader." Hai stuurde dus ofgezanten mit raauwbeklag noar Chanun. Mor dou dij in t laand van Ammonieten kommen wazzen, ³ zeden veurmannen van Ammonieten tegen Chanun, heur heer: "Leuf mor driest dat dat haile raauwbeklag n lozeghaid van Doaved is. Hai het heur vanzulm stuurd om stad te beloeren en den dommee te verrinnewaaiern." ⁴ Dou luit Chanun Doaved zien bodes oppakken. Hai luit heur board aan ain zied ofscheren en heur klaaier ofsnieden aan t gat tou. Zo stuurde hai heur weerom. ⁵ Dou Doaved heurde wat of der gebeurd was, stuurde hai zien bodes bericht, dat ze in Jericho blieven mozzen totdat heur board weer aangruid was. Ze schoamden heur ja dood. ⁶ Ammonieten haren wel in de goaten, dat ze t bie Doaved slim verdurven haren. Doarom bestelden ze twinnegdoezend Aramese huursoldoaten oet Bet-Rechob en Soba, doezend man van keunenk van Maäka en twaalfdoezend oet Tob. ⁷ Dou Doaved dit heurde, stuurde hai Joäb der op òf mit ale keurtroepen. ⁸ Ammonieten trokken op mit heur troepen en stelden heur in t gelid veur poort van heur hoofdstad Rabba. Dij aandern, Arameeërs van Soba en Rechob, en soldoaten oet Tob en Maäka, stelden heur op in t open veld. ⁹ Joäb zag wel, dat zai op dij menaaier zien leger netzowel van veuren as van achtern aanvalen konden. Doarom stelde hai t aine dail van zien leger, keurtroepen oet zien striedmacht, zo op, dat ze front muiken tegen Arameeërs. ¹⁰ De rest van zien volk stelde hai onder bevel van zien bruier Abisai; dij mos post vatten tegen Ammonieten. ^{26 11} Tegen Abisai zee e: "As Arameeërs mie boas binnen, mostoe mie helpen en astoe t nait redden kinst tegen Ammonieten, help ik die. ¹² Kop ter veur! Wie goan der stief tegenaan, t is ja veur ons volk en steden van ons God. De HEER zel doun wat Hom goud ducht." ¹³ Dou Joäb mit zien leger op Arameeërs òf ging, gingen dij vot op loop. ¹⁴ En dou Ammonieten dat zaggen, gingen dij der ook van deur en muiken dat ze in stad kwammen. Dou luit Joäb Ammonieten geworden en ging weerom noar Jeruzelem.
¹⁵ Arameeërs begrepen wel, dat ze t nait redden konden tegen Izrel. Doarom zöchten ze verstaarken: ¹⁶ Hadadezer ²⁷ stuurde bosschoppers noar Arameeërs aan aanderkaant Revier. ²⁸ Dij zollen noar Chelam goan en heur doar onder bevel stellen van Sobak, generoal van Hadadezer. Zo gebeurde. ¹⁷ Dou Doaved dat heurde, verzoamelde hai soldoaten van hail Izrel, ging over Jordaan en ook noar Chelam tou. Baaide legers stonden liek tegen nkander over en t vechten begunde. ¹⁸ Izrelieten juigen Arameeërs op vlucht. Dij verloren zeuvenhonderd span peerden en vattegdoezend man peervolk: apmoal dood! Heur generoal Sobak wer zo swoar trovven dat e doar op t slagveld dood bludde. ¹⁹ Dou ale keunenks dij zo te reken zetboazen wazzen van Hadadezer, in de goaten kregen haren, dat aal heur legers mit nkander t nait rizzen konden tegen Izrelieten, sloten ze vree mit Izrel en wazzen heur onderdoaneg. Arameeërs woarden heur der wel veur om Ammonieten nog ais te helpen.

11

© 2002 Liudgerstichten. All rights reserved.