Titus 3

Hou of Christenmensken leven mouten

¹ Herinner heur der hailtied weer aan, dat ze wèl of regaaiern en gezag droagen, onderdoaneg wezen mouten; dat ze dij geheurzoamen mouten en kloarstoan om wat gouds te doun, net geliek wat. ² Dat ze gainain oetschelden maggen, gain roezie moaken, mor zok fersounlek gedroagen en elkenain veurkommend behandeln mouten. ³ Vrouger bruukten wie ja ook ons verstand nait, wazzen ongezeggelk, op biesterboan en versloafd aan allerhande zinnen en lusten. Wie verdeden ons tied mit lèlke streken en ofgunst; wazzen lu om van te waalgen en konden mekoar nait oetstoan.
⁴ Mor dou kwam aan t licht, hou goud of God, ons Redder, wel is,
en hou veul of Hai van t menskdom holdt.
⁵ Nait dat wie t ter noar moakt haren
deur ons rechtschoapen gedrag.
Nee, t begrootte Hom om ons.
Dóárom het Hai ons dou red deur ons zo te wasken, dat wie vannijs geboren werden,
en dat Hillege Gaist nije mensken van ons muik.
⁶ Dij Gaist het E rij over ons oetgoten
deur Jezus Christus, ons Redder.
⁷ Den kon we, deur zien genoade vrijsproken,
aarfgenoamen worden mit oetzicht op aiweg levent.
⁸ Dij bosschop doar kin je van op aan; en ik wil, dastoe mensken dát verzekerst. Den kinnen wèl of in God leuven der om denken, dat ze veurop lopen mouten, as ter wat gouds te doun is. Dat is mooi waark! Doar het t menskdom wil van! ⁹ Mor dat onzinneg gehakketak en dat oetpluzen van ofstammen, dat kifken en bekvechten over wet, hol die dóár boeten. Doar het ja gain mensk wat aan, en t het niks om hakken. ¹⁰ As ain op n ofsplitsen aanstuurt, loat hom den noa ain of twij woarschaauwens schaiten. ¹¹ Waist ja, dat zo aine deurhèn verkeerd is en dat e zundegt tegen beder waiten in.