Titus 2

Wat of Titus mensken inprenten mout

¹ Mor doé most heur veurholden wat of stemt mit gezonde leer: ² dat ol manlu nöchtern wezen mouten, respekt ofdwingen, zokzulm in haand hebben, zond wezen in t geleuf, in laifde en in geduld. ³ Ol vraauwlu krekt geliek mouten zok zo gedroagen, dat ze in tempel ² dainen kinnen, gain lasterproat rondstreuen, nait aan draank versloafd wezen, mor n aander goie road geven. ⁴ Den kinnen ze jonge vraauwlu leren van heur man en kinder te holden, ⁵ zokzulm in haand te hebben en zedeg te wezen, heur hoesholden goud noa te kommen, heur aigen man onderdoaneg wezen. Aans zol God zien bosschop mor in opsproak kommen.
⁶ Net zo mostoe jonge manlu der tou aanzetten zokzulm in ale opzichten in haand te holden. ⁷ Geef heur in diezulm n veurbeeld van goud gedrag. Dat ze in heur onderwies zok nait omkopen loaten, mor respekt ofdwingen. Heur bosschop mout zond wezen en gain aanlaaiden geven veur ofkeuren. Den zel wèl of ons integen komt, biedraaien: hai het den ja niks lèlks over ons te zeggen.
⁹ Sloaven mouten heur boazen onderdoaneg wezen, heur t in alles noar t zin doun zunder tegenkekeln; ¹⁰ niks achterover drukken, mor zain loaten, dat ze rondom betraauwboar binnen. Zo moaken ze wat of God, ons Redder, ons leert, deur heur haile optreden aantrekkelk.
¹¹ God zien genoade kwam ja opdoagen as n oetkomst veur ale mensken ¹² deurdat ze ons der tou opvudt, dat we ons goddeloze levent ter aan geven en ons wereldse lusten, en dat we bedachtsoam, rechtschoapen en vroom leven in dizze wereld, ¹³ omdat we n zoalege toukomst verwachten, noamelk dat ons grode God en Redder, Jezus Christus, mit stoatsie verschienen zel. ¹⁴ Hai het zok veur ons opovverd, dat E ons vrijmoaken zol van aal wat tegen (God zien) wet in gaait en zok zo n keurvolk der oet schonen, dat zok ter op toulegt goud te doun.
¹⁵ Dat mostoe heur veurholden. Most heur aanpeerdjen en terechtwiezen. Doar hestoe ale volmacht tou. Loat gainain t woagen op die deel te kieken.