Openboaren 21

t Nije Jeruzelem

⁹ Dou kwam ain van zeuven engels mit de zeuven schoalen, vol mit de zeuven leste ploagen, op mie tou. "Kom!", zee e, "Ik zel joe bruud zain loaten, t Laam zien vraauw." ¹⁰ In de gaist brochde hai mie op n dikke, hoge baarg. Hai luit mie Jeruzelem zain, de haailege stad dij deelkwam oet hemel, bie God vandoan. ¹¹ Ze stroalde van God zien glorie en glìnsterde as dure edelstain. Krekt jaspis, zo kristalhelder. ¹² Om stad tou ston n grode, hoge muur mit twaalf poorten. Bie elke poort ston n engel. Der stonden ook noamen op schreven: noamen van Izrel zien twaalf stammen. ¹³ Op t oosten lagen drij poorten, op t noorden drij, drij op t zuden en drij op t westen. ¹⁴ Stadsmuur haar twaalf fonnementblokken. Doar stonden noamen op van t Laam zien twaalf apostels.
¹⁵ Dij mit mie aan proat was, haar n golden doemstok bie hom. Doar wol e stad, poorten en muur mit opmeten. ¹⁶ Stad is aanlegd as n vaaierkaant, net zo laank as braid. Hai meette mit zien doemstok stad op en kwam oet op twaalfdoezend stoadies59.Lengte, bredte en hoogte binnen geliek. ¹⁷ Dou mat e heur muur op: ¹⁴⁴ èl, ⁶⁰ rekend noar moat dij mensken bruken; dij bruukte engel ook. ¹⁸ Muur was moakt van jaspis, stad zulm van zuver gold, helder as glaas. ¹⁹ Fonnementblokken van stadsmuur wazzen mit allerhande edelstainen versierd. Eerste blok was jaspis, twijde was saffier, daarde was agaat, vaaierde was smaragd, ²⁰ viefde was onyx, zèsde was karneool, zeuvende was chrysoliet, aachtste was beryl, negende was topaas, tiende was chrysopraas, elfde was hyacint en twaalfde was ametist. ²¹ De twaalf poorten wazzen twaalf perels: ain veur ain wazzen dij poorten oet ain perel moakt. En stroaten wazzen van zuver gold, deurzichteg as glaas.
²² n Tempel heb ik doar in stad nait zain. God de Heer, de Aalbestuurder, is heur tempel ja, net as t Laam. ²³ Stad het gain verlet om licht van zun of moan. God zien glaans en glorie verlichtte heur ja en t Laam is heur laamp. ²⁴ Volken zellen in heur licht rondlopen en keunenks van haile wereld brengen heur riekdom der noar tou. ⁶¹ ²⁵ Stadspoorten goan dag en deur nait meer dicht. t Zel doar ja gain naacht meer worden. ⁶² ²⁶ Ze zellen doar pracht en schatten van volken noar tou brengen. ²⁷ Mor aal wat onnuur is, zel stad nait inkommen, en dij smerege en vaalze dingen dut, dij net zo min. Aans gainent as dij heur noamen in t levensbouk van t Laam stoan, kommen der in.

22

¹ Dou wees engel mie n revier mit wotter, dat levent geft. Helder as kristal was e. Hai kwam tou troon van God en van t Laam oet. ² Hai laip midden deur heur stroat. ⁶³ Aan weerskanten van dij revier stoan levensbomen, dij twaalf moal droagen: elke moand zitten der weer nije vruchten aan. En t blad der van daint haaidens as medesien. ³ Niks van wat of verflukt is, zel der meer wezen. Troon van God en van t Laam zellen doar stoan. En zien knechten zellen Hom vereren ⁴ en Hom persoonlek te spreken kriegen. Zien noam zellen ze veur op kop droagen. ⁵ Der zel gain naacht meer wezen. Om licht van laamp of zun is gain verlet. God de Heer let zien licht ja over heur schienen. Zo zellen ze regaaiern veur aiweg en aaid.
(Engel:)
⁶ Hai zee tegen mie: "Wat of Ik die nou zegd heb, doar kinst van op aan! t Is eerlieks woar! En de Heer, de God dij perfeten begaistert, het zien engel stuurd om zien knechten zain te loaten wat of der eerdoags te gebeuren staait."
(Christus:)
⁷ "En denkt ter om: Ik kom al gaauw! Zegend is, dij zok holdt aan perfeten heur woorden in dit bouk."
(Schriever en engel:)
⁸ En ik, Johannes, bin t dij dit heurde en zag. En dou ik t heurd en zain haar, luit ik mie op knijen valen vlak veur engel, dij mie t zain luit. ⁹ Mor hai zee: "Nait doun! Ik bin ook ja mor n knecht, net zo as ie en joen bruiers de perfeten en net as dijent, dij zok holden aan wat of ter in dit bouk staait. Veur Gód mout ie op knijen goan!" ¹⁰ Hai ging wieder: "Sluut perfeten heur woord in dit bouk nait òf mit n zegel. Tied is ter ja hoast heer! ¹¹ Dij kwoad dut, mout nóg meer kwoad doun. Wèl of smereg is, loat e zok nóg smereger moaken. Mor rechtveerdege lu, loat ze nóg rechtveerdeger worden, en haailege lu nóg haaileger."
(Christus:)
¹² "Denkt ter om: Ik kom gaauw! En mien loon heb Ik bie mie. Elkenain krigt betoald noar wat of e doan het. ¹³ Ik bin alfa en omega, eerste en leste, begun en t ènd. ⁶⁴
¹⁴ Gelukkeg binnen lu dij heur klaaier schoonwasken. Zai kriegen recht op levensboom en ze maggen der in kommen deur poorten van stad. ¹⁵ Honden blieven boeten stoan, zo as teuvenoars, hoerelopers, moordenoars en vereerders van ofgoden. En dij t laigen nait loaten kinnen, net zo.
¹⁶ Ik, Jezus, heb mien engel stuurd. Dij zel joe alles kundeg moaken veur de gemaintes. Ik bin worreltak van Doavid zien geslacht. Ik bin glìnsternde mörgensteern."
(Gemainte:)
¹⁷ Gaist en bruud zeggen: "Kom!"
Wèl of t heurt, loat e zeggen: "Kom!"
Dij dörst het, loat e kommen. Wèl wil, krigt t leventgevende wotter vergees.