Matteüs    24

²⁹ Votdoalek noa ale kripsie van dij tied, zel zun duuster worden, moan zel nait laanger schienen, steerns zellen van hemel valen en hemelse machten wibberg worden. ^{56 30} En den zel Menskenzeun zien taiken aan lucht te zain wezen. Ale volken op eerde zellen jammern en jeuzeln en ze zellen Menskenzeun kommen zain op wolken van hemel, mit grode macht en stoatsie. ³¹ Grode bezuun zel klinken en Hai zel zien engels oetsturen. Dij zellen dij E oetkeurd het, bie nkander brengen oet ale vaaier windstreken vandoan, van t aine ènd van wereld aan t aander tou.
³² Ie mouten van geliekenis over viegeboom dizze les leren: As dij zien toeken waik worden en knoppen oetkommen, den wait ie: nou is zummer nait wied meer vot. ³³ Zo mout ie ook waiten, as ie dat altmoal gebeuren zain: t staait veur deur! ³⁴ Ik verzeker joe: dizze generoatsie zel dat altmoal nog beleven. ³⁵ Hemel en eerde zellen vergoan. Mien woorden veurvaast nait!
³⁶ Mor wanneer of dij dag of dat uur kommen zel, dat wait gainain. Engels in hemel nait, Zeun nait, mor allain de Voader wait t. ³⁷ En zo as t ter aan tou ging in Noach zien tied, zo zel t ter ook heer goan as Menskenzeun komt. ³⁸ In tied van grode vloud gingen lu rusteg deur mit eten en drinken, manlu nammen n vraauw, vraauwlu kregen n man, aan dag tou dat Noach in aark ging. ³⁹ Ze huilen naargens reken mit, tot grode vloud lösbrook en heur altmoal vot spoulde. Krekt zo zel t goan as Menskenzeun komt. ⁴⁰ Den zellen der twij op t laand touholden: ain zel mitnomen worden, aander achterloaten. ⁴¹ Twij vraauwlu zellen aan t moalen wezen: aine zel mitnomen worden, aander achterloaten. ⁴² Doarom: blief woakzoam! Ie waiten ja nait op wat veur dag joen Heer kommen zel. ⁴³ Ie mouten hier mor om denken: as boas van t hoes waiten haar hou loat of daif kommen zol, den was e wel wakker bleven en haar e nait in zien hoes inbreken loaten. Doarom mout ie ook kloarstoan. Menskenzeun komt ja op n tied, woar ie der nait op reken.
⁴⁵ Welke knecht is nou zo traauw en verstandeg dat zien boas hom over t waarkvolk aanstellen kin om op tied veur heur gerak te zörgen? ⁴⁶ Dij knecht mag van geluk spreken as zien boas, as e thoeskomt, zigt, dat zien knecht doar dounde mit is. ⁴⁷ Ik verzeker joe: zien boas zet hom over aal wat e het. ⁴⁸ Mor as knecht nait deugt en bie zokzulm denkt: 'Boas komt nog lange nait thoes!', ⁴⁹ en hai begunt aander knechten te sloagen en mit klokjebruiers te vreten en te zoepen, ⁵⁰ den komt dij knecht zien boas net op dag, dat e zuks nait verwachten dee, en net in t uur, dat e nait wis. ⁵¹ Boas zel hom den n flink pak laaiter geven en hom stee aanwiezen bie mooiweerspeulers. Doar zellen ze hoelen en mit tanden knaarzen!"

© 2000 Liudgerstichten. All rights reserved.