Matteüs 24

t Ènd van wereld

¹ Jezus kwam tou tempel oet en ging wieder. Zien leerlingen kwammen noar Hom tou en wezen Hom op tempelgebaauwen. ² "Kiek joe dat altmoal ais aan", zee Jezus tegen heur. "Mor neem van Mie aan: gain stain dervan zel op n aander liggen blieven. Alles gaait tegen de vlakte!"
³ Op Olievenbaarg ging E zitten en zien leerlingen kwammen bie Hom. Dou ze mit Hom allain wazzen, vruigen ze: "Nou mout Ie ons toch ais vertellen, wanneer dat dat wezen zel en woar of je aan zain kinnen, dat Ie weer kommen en dat wereld op t ènd lopt."
⁴ "Wees ter op verdocht dat gainent joe wat wiesmoakt", was Jezus zien antwoord. ⁵ "Der zellen hail wat kommen onder mien noam en zeggen: 'Ik bin de Christus.' Doar zellen ze hail wat lu mit op biesterboan brengen. ⁶ Ie zellen van oorlogen en van proat over oorlogen heuren. Mor loat joe nait oet stuur brengen. Dat mout altmoal gebeuren, mor t èn is dat vot nog nait. ⁷ t Aine volk zel ja tegen t aander in opstand kommen, en t aine keunenkriek tegen t aander. Der zellen hongersnoden wezen en eerdbevens, nou hier en den doar. ⁸ Mor dat is altmoal nait meer as t begun van ale ellèn.
⁹ Den zellen ze joe onder drok zetten en doodmoaken. Ale volken zellen joe mit n schaive nek aankieken, omreden ie kommen veur Mie oet. ¹⁰ En den zellen n bult mensken t opgeven, nkander verroaden en hoaten. ¹¹ Den zellen veul vaalze perfeten aantreden, dij mensken op t verkeerde pad brengen. ¹² En omdat t levent zunder god of gebod aal meer aanwazzen dut, zel laifde onder mensken kold worden. ¹³ Mor wèl volholdt aan t èn tou, dij zel red worden. ¹⁴ Bliede bosschop van t Keunenkriek zel over haile wereld bekend moakt worden as n getugenis veur ale volken. En den zel t ènd ter heer wezen.
¹⁵ As ie den in dizze haailege stee 'Iezelke ofbroak' ⁵⁵ stoan zain - perfeet Doaniël het t ter over had - en wèl of t leest, mout goud acht geven: ¹⁶ Den mouten lu, dij in Judeoa touholden, baargen in vluchten. ¹⁷ Wèl of op t platdak van zien hoes touholdt, mout nait ommeneden kommen om zien hoesgroad op te hoalen. ¹⁸ Dij boeten op t laand is, mout nait weerom kommen om zien jak op te hoalen. ¹⁹ Aarme stumpers van vraauwlu, dij in dij doagen in verwachten binnen of n lutje aan bòrst hebben! ²⁰ Bee mor gaauw, dat t gain winter of sabbat is, as ie aan hakken trekken mouten. ²¹ Want t zel der n big om weg goan, zo as wereld nog nooit mitmoakt het, van t begun òf, aan nou tou. En zo slim zel t ook nooit weer worden. ²² As dij doagen nait inkört worden zollen, gain mensk zol t ter ofredden. Mor om heur dij oetkeurd binnen, zellen dij doagen inkört worden.
²³ Leuf t mor nait, as ain tegen joe zegt: 'Kiek, hier is de Christus!' of: 'Doar is E!' ²⁴ Der zellen ja hail wat lu kommen dij beweren, dat ze de Christus binnen, of n perfeet. Grode taikens en wonders zellen ze doun om, as t aaids meugelk wezen zol, alderdeegs dij oetkeurd binnen op biesterboan te brengen. ²⁵ Paas op! Ik heb joe aaltied al woarschaauwd!
²⁶ As mensken tegen joe zeggen: 'Kiek es, Hai is in woestijn!', goa doar den nait hèn. Of as ze zeggen: 'Kiek es, Hai is binnen in hoes!', leuf ter den niks van. ²⁷ t Zel mit Menskenzeun zien komst krekt zo goan, as t mit weerlicht gaait. Dij komt oet t oosten en in t westen zai je hom nog.
²⁸ Overaal doar n dood daaier ligt, doar kommen gieren mit nkander op òf."